ស្នើឯកឧត្តម នាយឧត្តមសេនីយ៍ នេត សាវឿន ដុះក្អែលអធិការនគរបាលក្រុងដូនកែវ និងនាយប៉ុស្តិ៍ផ្សារធំតាកែវ ខណៈល្បែងស៊ីសងលេងយ៉ាងគគ្រឹកគគ្រេងទាំងក្នុងផ្សារ និងក្រៅផ្សារធំតាកែវ រាយការណ៍ជាច្រើនដងគ្មានចំណាត់ការ
ខេត្តតាកែវ៖ក្រោយពីភ្នាក់ងារយើងបានខលទូរស័ព្ទរាយការណ៍ទៅលោកវរសេនីយ៍ឯក ឥន្ទ មណ្ឌល អធិការនគរបាលក្រុងដូនកែវ និងលោក ជ័យ សុង នាយប៉ុស្តិ៍នគរបាលផ្សារធំតាកែវ ជាច្រើនដង និងអង្គភាពយើក៏បានធ្វើការផ្សព្វផ្សាយហើយដែរ ពាក់ព័ន្ធករណីល្បែងស៊ីសងតាមអនឡាញប្រភេទឡូតូមានច្រើនប្រភទ ដូចជា ឡូតូ ឡូតូខែឆ្នាំទាំង១២ ឡូតូ៩០ ។ល។ និងជល់មាន់តាមលេបថប (កុំព្យូទ័រ) នៅចំណុចក្នុងផ្សារ និងខាងក្រៅផ្សារធំតាកែវ ដែលបើកឲ្យក្រុមអ្នកញៀនល្បែងចូលលេងយ៉ាងគគ្រឹកគគ្រេងភ្លេចបាយ ភ្លេចទឹក បង្វក់ស្មារតីប្រជាពលរដ្ឋ ពីការធ្វើស្រែចំការ និងប្រកបមុខរបរទទួលទានផ្សេងៗ ងាកមកប្រគុំគ្នាលេងល្បែងស៊ីសង អ្នកឈ្នះសប្បាយ អ្នកចាញ់ប្រពន្ធកូនអត់បាយទឹក បន្តស្រង់ដើម លក់អស់ទ្រព្យ សម្បត្តិ ដីធ្លី ព្រមទាំងជំពាក់បំណុលគេជំទិស បង្កបញ្ហាអសន្តិសុខសង្គមជាដើម រហូតមកដល់ពេលនេះនៅតែបន្តបើកឲ្យដំណើការណ៍ដោយរលូនដដែល លោកអធិការ និងលោកនាយប៉ុស្តិ៍មិនខ្វល់។ទោះជាមានបញ្ជារបស់សម្តេចតេជោ ហ៊ុន សែន នាយករដ្ឋមន្ត្រី កាលពីថ្មីៗកន្លងទៅនេះបានដាក់ចេញយ៉ាងដាច់ណាត់ឲ្យមន្ត្រីថ្នាក់ក្រោមចុះអនុវត្តឲ្យខានតែបាន នូវល្បែងស៊ីសងគ្រប់ប្រភេទ នៅក្នុងប្រទេសកម្ពុជា ពិសេសល្បែងអនឡាញតែម្តង ក្នុងនោះរាប់ទាំងឡូតូ ជល់មាន់ និងកន្ទុយលេខទៀតផង មិនទាន់បានប៉ុន្មានផងពេលនេះ នៅក្នុងទឹកដីក្រុងដូនកែវ ពិសេសនៅចំណុចខាងលើល្បែងស៊ីងសង កើតមានឡើងរីកដូចផ្សិត លោកអធិការ និងលោកនាយប៉ុស្តិ៍ធ្វើជាមិនដឹង ។
ពាក់ព័ន្ធទៅនឹងល្បែងស៊ីសងខាងលើនេះដែរបើយោងតាមសេចក្តីរាយការណ៍ដែលភ្នាក់ងារយើងចុះផ្តិតយករូបភាពដោយផ្ទាល់បានបញ្ជាក់ថា ល្បែងស៊ីសងដែលកំពុងបើកដំណើរការទាំងក្នុង និងក្រៅផ្សារធំតាកែវរួមមាន៖នៅខាងមុខប៉ុស្តិ៍ផ្សារ និងខាងមុខផ្សារធំតាកែវមាន ៥ទីតាំង ក្នុងផ្សារ ៥ទីតាំង ខាងកើតផ្សារមានចំនួន ៤ទីតាំង និងមួយទីតាំងទៀតខាងត្បូងជ្រុងខាងលិចផ្សារធំតាកែវផ្ទះលក់កាហ្វេ បើកមាន់ជល់អនឡាញ និងឡូតូ online តាមលេបថត(កុំព្យូទ័រ) ដែលស្ថិតនៅភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ។
ជុំវិញរឿងខាងលើនេះលោក ជ័យ សុង នាយប៉ុស្តិ៍ផ្សារតាកែវ បានប្រាប់ភ្នាក់ងារយើងតាមទូរស័ព្ទថា លោកទទួលស្គាល់ថា វាមានពិតប្រាកដ តែដោយសារតែលោកទើបតែមកកាន់តំណែងជាមេប៉ុស្តិ៍បានត្រឹមតែ៥ថ្ងៃតែប៉ុណ្ណោះ ហើយល្បែងដែលគេកំពុងបើកដំណើការនេះជារបស់គេចាស់ គឺបានន័យថាជារបស់មេប៉ុស្តិ៍ចាស់ជាអ្នកគ្រប់គ្រង ឯរូបលោកកំពុតែទទួលរងពីគេទេ បច្ចុប្បន្នកំពុងតែដើរដោះស្រាយជំនួសគេទាំងអស់។តែទោះយ៉ាងនេះក្តីបើតាមប្រភពព័ត៌មានបានឲ្យដឹងថា លោក ជ័យ សុង នាយប៉ុស្តិ៍ផ្សារតាកែវ ត្រូវបានប្រកាសតែងតាំងឲ្យចូលកាន់មុខតំណែងជានាយប៉ុស្តិ៍តាំងពីថ្ងៃទី១៩ ខែឧសភា ឆ្នាំ២០២៣ម្លេះ ហើយម្យ៉ាងវិញទៀតចាប់តាំងពីរូបលោកចូលមកកាន់ជាមេប៉ុស្តិ៍នៅចំណុចខាងលើនេះមក ដូចនាំល្បែងមកជាមួយអញ្ជឹង ពីព្រោះថា ល្បែងស៊ីសងមិនតិចកន្លែងទេ នៅជុំវិញប៉ុស្តិ៍ និងនៅផ្សារ ពិសេសតំបន់ភូមិសាស្ត្រដែលលោកគ្រប់គ្រងតែម្តង ។
ចំណែកលោកវរសេនីយ៍ឯក ឥន្ទ មណ្ឌល អធិការនគរបាលក្រុងដូនកែវ វិញឲ្យដឹងដែរថា មិនដឹងថាឡូតូនេះមកពីណាពីណីនោះទេអត់យល់ មានច្បាប់តែមួយទេ ហើយមិនដឹងជាយ៉ាងមិចលោកមេប៉ុស្តិ៍ឡើងមកថ្មីនេះ។លោកអធិការបញ្ជាក់ថា កាលពីមុនមេប៉ុស្តិ៍ឡើងថ្មីមក មិនមានល្បែងនោះទេ ហើយលោកមិនសូវបានដឹងនោះទេ មានតែអ្នកសារព័ត៌មានទេដែលបានដឹង ដូច្នេះបើដឹងសូមរាយការណ៍មកលោកនឹងចាត់កម្លាំងចុះទៅមើល។
ដោយឡែកកង អាណាន់ អភិបាលក្រុងដូនកែវវិញបានបញ្ជាក់ថា លោកបានបញ្ជាឲ្យអធិការចាត់ចែងមើលករណីហ្នឹងហើយ។តែជុំវិញករណីខាងលើនេះ គិតរហូតមកដល់ពេលនេះ ទីតាំងខាងលើនៅតែបន្តបើកដំណើរការយ៉ាងរលូនដដែល គ្មានអាជ្ញាធរ និងសមត្ថកិច្ចចុះណែនាំឬបង្ក្រាបឡើយ។
ដូច្នេះស្នើឲ្យឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងស្នងការនគរបាលខេត្តដាក់មន្ត្រីជំនាញបើកការស៊ើបអង្គេតឲ្យបានស៊ីជំរៅ និងមានចំណាត់ការផងទាន!! ដើម្បីឲ្យស្របតាមគោលនយោបាយភូមិ ឃុំ/សង្កាត់មានសុវត្ថិភាព របស់ប្រមុខរាជរដ្ឋាភិបាលកម្ពុជា និងបទបញ្ជាដ៏ដាច់ណាត់របស់សម្តេចតេជោ ដែលបានដាក់ចេញនាពេលកន្លងទៅ៕ នៅមានវគ្គបន្តទៀត ដោយ ៖ លោក ផូង បញ្ញា
សូមស្តាប់ប្រសាសន៍របស់សម្តេចតេជោ ដែលបញ្ជាយ៉ាងដាច់ណាត់ឲ្យមន្ត្រីថ្នាក់ក្រោមចុះអនុវត្តពាក់ព័ន្ធល្បែងស៊ីសង ដែលមានខ្លឹមសាដូចខាងក្រោម៖
