(បន្ទាយមានជ័យ) ៖ក្រោយពីមើលឃើញពីការខ្វះខាតក្នុងជីវភាពរបស់បងប្អូនប្រជាពលរដ្ឋ នារសៀលថ្ងៃទី២៥ ខែកុម្ភៈ ឆ្នាំ២០២៥ លោក ហង្ស រ៉ាត់ ប្រធានសមាគមសម្ព័ន្ធយុវជនដើម្បីសន្តិភាព ហៅកាត់ថា (ស.ស.យ.ស) សាខាខេត្តបន្ទាយមានជ័យ បានដឹកនាំក្រុមការងារ នាំយកអំណោយជាគ្រឿងឧបភោគ បរិភោគ ចែកជូនដល់បងប្អូនប្រជាពលរដ្ឋ ដែលមានជីវភាពខ្វះខាត ស្ថិតនៅក្នុងភូមិ/ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។ក្នុងនោះក៏មានការអញ្ជើញចូលរួមពីលោកបណ្ឌិត ឌីម សុខុន អគ្គលេខាធិការ នៃសមាគមសម្ព័ន្ធយុវជនដើម្បីសន្តិភាព លោក គឹម សារឿន ប្រធាន សាខាខេត្តកំពង់ធំ ផងដែរ ។
ក្នុងឱកាសនោះលោកបណ្ឌិត ឌីម សុខុន អគ្គលេខាធិការ នៃសមាគម, លោក ហង្ស រ៉ាត់ ប្រធាន សាខាខេត្តបន្ទាយមានជ័យ និងលោក គឹម សារឿន ប្រធាន សាខាខេត្តកំពង់ធំ បានពាំនាំនូវប្រសាសន៍ផ្ដាំផ្ញើសាកសួរសុខទុក្ខពីសំណាក់ឯកឧត្តមបណ្ឌិត សុខ ចាន់ភក្តី ប្រធានសមាគម និងជារដ្ឋលេខាធិការក្រសួងព័ត៌មាន ដែលជានិច្ចជាការឯកឧត្តម បណ្ឌិត ប្រធានសមាគម តែងតែយកចិត្តទុកដាក់គិតគូរពីសុខទុក្ខរបស់បងប្អូនប្រជាពលរដ្ឋ ទោះបីជាអំណោយទាំងនេះមិនគ្រប់តាមតម្រូវការរបស់បងប្អូនក៏ពិតមែនក៏ប៉ុន្តែជាចំណែកមួយកាត់បន្ថយការខ្វះខាតមួយគ្រា ហើយក៏ជាការចូលរួមចំណែកជាមួយប្រមុខរាជរដ្ឋាភិបាលកម្ពុជាផងដែរ ហើយការចែកទានទាំងនេះមិនប្រកាន់ពូជសាសន៍ ពណ៌សម្បុរ និងនិន្នាការនយោបាយនោះឡើយ។អំណោយដែលត្រូវចែកជូនក្នុងមួយគ្រួសារទទួលបាន អង្ក,មីកញ្ចប់ និងកំប៉ុង,ទឹកក្រូច,ទឹកផ្លែឈើ,ទឹកត្រី,ប្រេងឆា,ស្កស,អំបិល,ថ្នាំដុះធ្មេញ,ច្រាសដុះធ្មេញ ,សាប៊ូ ,ទឹកបរិសុទ្ធ,ទៀនវស្សា និងថវិកាមួយចំនួនរផងដែរ៕
