យុវសិស្ស២នាក់ ជិះម៉ូតូទៅសាលា ត្រូវរថយន្តមិនស្គាល់ម៉ាក បុកពីក្រោយពេញទំហឹង បណ្តាលអោយស្លាប់ម្នាក់ និងរបួសធ្ងន់ម្នាក់
(បាត់ដំបង)៖យ៉ាងហោចណាស់មានយុវសិស្សម្នាក់បានស្លាប់ភ្លាមៗ និងម្នាក់ទៀតរងរបួសធ្ងន់ ដឹកយកទៅសង្គ្រោះនៅឯមន្ទីពេទ្យ ក្រោយជិះម៉ូតូដឹកគ្នាទៅសាលា ត្រូវបានរថយន្តធុនធ្ងន់ប្រភេទសណ្តោងកន្ទុយមួយគ្រឿងមិនស្គាល់ម៉ាក បើកបុកពីក្រោយពេញទំហឹង ។ ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះបានកើតឡើងកាលពីវេលាម៉ោង៦និង៤០នាទី ថ្ងៃទី១៦ ខែមករា ឆ្ឆ្នាំ២០២៣ នៅតាមបណ្តោយផ្លូវជាតិលេខ០៥ ស្ថិតក្នុងភូមិពុកឆ្មា ឃុំអន្លង់វិល ស្រុកសង្កែ ខេត្តបាត់ដំបង។
ប្រភពនៅកន្លែងកើតហេតុបានអោយថា នៅមុនពេលកើតហេតុគេបានឃើញម៉ូតូម៉ាកហុងដាឌ្រីមពណ៌ខ្មៅមួយគ្រឿង ពាក់ផ្លាកលេខ បាត់ដំបង 1X -1105 បើកបរដោយយុវសិស្សម្នាក់ឈ្មោះ ភូ លីហេង ភេទប្រុស អាយុ ១៦ឆ្នាំ និងអ្នករួមដំណើរជាប្អូនបង្កើតម្នាក់ឈ្មោះ ភូ លីហ៊ួរ អាយុ ១៣ឆ្នាំ ទាំងពីរនាក់រស់នៅក្នុងភូមិកំពង់ព្រះ ឃុំកំពង់ព្រះ ស្រុកសង្កែ ខេត្តបាត់ដំបង បើកបរក្នុងទិសដៅពីត្បូងទៅជើង ក្នុងគោលបំណងដើម្បីទៅសាលារៀន លុះមកដល់ចំណុចកើតហេតុ ក៏ស្រាប់តែមានរថយន្តធុនធ្ងន់សណ្តោងកន្ទុយមួយគ្រឿងមិនស្គាល់ម៉ាក បើកក្នុងល្បឿនលឿនបុកពីក្រោយពេញទំហឹង និងកិនបណ្តាលអោយជនរងគ្រោះជាបងស្លាប់ភ្លាមៗ និងអ្នករួមដំណើរជាប្អូនរងរបួសធ្ងន់ ចំណែករថយន្តគេចខ្លួនបាត់ស្រម៉ោល។
ក្រោយពេលកើតហេតុ សមត្ថកិច្ចបានដឹកបញ្ជូនជនរងគ្រោះទៅសង្គ្រោះព្យាបាលនៅមន្ទីរពេទ្យ ចំណែកសាកសព ត្រូវបានបញ្ជូនអោយខាងសាច់ញាតិយកទៅធ្វើបុណ្យតាមប្រពៃណី ដោយឡែកមធ្យោបាយម៉ូតូ ត្រូវបានវាស់វែងយកទៅរក្សាទុកនៅការិយាល័យចរាចរណ៍ផ្លូវគោកខេត្ត ដើម្បីរងចាំស្វែងរកម្ចាស់រថយន្តអោយចូលខ្លួនមកដោះស្រាយតាមផ្លូវច្បាប់៕
