ថ្នាក់ដឹកនាំស្នងការដ្ឋាននគរបាលខេត្តបន្ទាយមានជ័យ ប្រារព្ធទិវាសិទ្ធិនារីអន្តរជាតិ លើកទី១១១ ឆ្នាំ២០២២
(បន្ទាយមានជ័យ)៖នៅព្រឹកថ្ងៃទី០៨ ខែមិនា ឆ្នាំ២០២២នេះ នៅស្នងការដ្ឋាននគរបាលខេត្តបន្ទាយមានជ័យ បានប្រារព្ធធ្វើពិធីទិវាសិទ្ធិនារីអន្តរជាតិ ខួបលើកទី១១១ ក្រោមអធិបតីភាពលោកឧត្តមសេនីយ៍ទោ សិទ្ធិ ឡោះ ស្នងការ នៃស្នងការដ្ឋាននគរបាលខេត្តបន្ទាយមានជ័យ។ពិធីនេះមានការអញ្ជើញចូលរួមពីលោក លោកស្រី ឧត្តមសេនីយ៍ វរសេនីយ៍ ស្នងការរង ថ្នាក់ដឹកនាំនគរបាលគ្រប់លំដាប់ថ្នាក់ ក្នុងនោះក៏មានការចូលរួមពី កម្លាំងនគរបាលជាតិជានារីចំនួន៥៦នាក់ មកពីគ្រប់បណ្តាផែនការិយាល័យជំនាញទាំង៣១ផងដែរ។
លោកស្រីឧត្តមសេនីយត្រី ឌី សុជាតិ ស្នងការរង ទទួលផែនការងារប្រឆាំងការជួញដូរមនុស្ស និងយ៉ែនឌ័រ បានឡើងអានសារលិខិតជូនពររបស់ ឯកឧត្តម នាយឧត្តមសេនីយ៍ សន្តិបណ្ឌិត នសាវឿន អគ្គស្នងការនគរបាលជាតិ ដែលបានជូនពរនគរបាលជានារី។នារីក្រៅពីជាម្តាយ នារីក៏ជាកម្លាំងចលករ ដែលបានចូលរួមចំណែកក្នុងការអភិវឌ្ឍន៍សង្គមជាតិស្ទើរគ្រប់វិស័យ ដូចជា វិស័យឯកជន រាជការ និងជាកងកម្លាំងនារីជាដើម។
លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ក៏បានជួបសំណេះសំណាល សួរសុខទុក្ខ ដល់កងកម្លាំងនគរបាលជានារី និងបានវាយតម្លៃខ្ពស់ចំពោះការប្រឹងប្រែង និងការចូលរួមក្នុងសង្គមរបស់នគរបាលនារី។
នាឱកាសដ៏សែនរីករាយនេះ លោកឧត្តមសេនីយ៍ទោស្នងការ ក៏បានជូនបាច់ផ្កា សារ៉ុង១ អាវយឺត១ និងថវិការចំនួន៣.០០០០រៀល ដល់កម្លាំងនគរបាលនារី ក្នុងខួបទិវានារីអន្តជាតិ ៨ មិនា លើក១១១ផងដែរ៕
