អភិបាលខេត្តកណ្ដាល ៖ កត្តាសុខសន្តិភាព ស្ថេរភាពនយោបាយ នាំមកនូវការអភិវឌ្ឍឥតឈប់ឈរ ទាំងផ្នែកអាណាចក្រ និងពុទ្ធចក្រ
(ខេត្តកណ្ដាល)៖ថ្លែងក្នុងពិធីបុណ្យឆ្លងព្រះវិហារ និងបុណ្យឆ្លងសមិទ្ធផលនានា នៅក្នុងវត្តជ្រៃមាសសាគរ ស្ថិតនៅភូមិវត្តថ្មី ឃុំព្រែកដំបង ស្រុកមុខកំពូល ខេត្តកណ្ដាល នាព្រឹកថ្ងៃទី០៤ ខែមីនា ឆ្នាំ២០២៣ ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានមានប្រសាសន៍ថា សមិទ្ធិផលនានាក្នុងវត្តជ្រៃមាសសាគរ ដែលបានកសាងនាឱកាសនេះ គឺផ្ដើមចេញពីសទ្ធាជ្រះថ្លារបស់ពុទ្ធបរិស័ទជិតឆ្ងាយទាំអស់ ដែលបានឧបត្ថម្ភជាសំភារៈ ថវិកា ក្នុងការកសាងនូវសមិទ្ធិផលទាំងនេះឡើង។ ក្នុងនោះឯកឧត្ដមអភិបាលខេត្ត ក៏បានស្នើឱ្យរដ្ឋបាលស្រុក អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ ប្រភេទ យកចិត្តទុកដាក់ គិតគូ ប្រែក្លាយទីធ្លាវត្តអារាម ឱ្យក្លាយទៅជាកន្លែងទេសចរណ៍ បែបសាសានា និងជាទីកន្លែងធ្វើវិប្បសាសនាជាដើម។ ត្រូវយកចិត្តទុកដាក់អនុវត្តគោលនយោបាយ «ភូមិ ឃុំ–សង្កាត់ មានសុវត្ថិភាព» ដែលមានលក្ខណៈសម្បត្តិ ៧យ៉ាង ឱ្យបានល្អប្រសើរផងដែរ។
ជាមួយគ្នានោះដែរឯកឧត្តមក៏បានបញ្ជាក់ដែរថា កត្តាសុខសន្តិភាព ស្ថេរភាពនយោបាយ នាំមកនូវការអភិវឌ្ឍឥតឈប់ឈរ ទាំងផ្នែកអាណាចក្រ និងពុទ្ធចក្រ ។ដូច្នេះយើងទាំងអស់គ្នាត្រូវរួមគ្នាប្ដេជ្ញាថែរក្សាសន្តិភាពនេះឱ្យបានស្ថេរ និងគង់វង្សយូអង្វែងរហូតទៅ ដើម្បីឱ្យប្រទេសជាតិរបស់យើងមានការអភិវឌ្ឍន៍បន្តទៀត។
ឯកឧត្ដមអភិបាលខេត្ត បញ្ជាក់ទៀតថា ក្រោមការដឹកនាំដ៏ប៉ិនប្រសព្វរបស់សម្តេចអគ្គមហាសេនាបតី ហ៊ុន សែន នាយករដ្ឋមន្ត្រី នៃព្រះរាជាណា ចក្រកម្ពុជា ជាស្ថាបនិកមគ្គុទេសន៍ឯក ប្រតិបត្តិករនយោបាយឈ្នះ– ឈ្នះ ដោយបានផ្តើមចេញពីការយកអាយុជីវិត សាច់ស្រស់ ឈាមស្រស់ ធ្វើជាដើមទុនដើម្បី ស្វែងរកសន្តិភាព និងបានដាក់ចេញគោលនយោបាយស្ដារសេដ្ឋកិច្ច សង្គម ពីកំទេចផេះផង់ ឈានទៅរកការរីកចម្រើននូវផ្នែក សេដ្ឋកិច្ច នាំមកនូវការអភិវឌ្ឍឥតឈប់ឈរ ទាំងអាណាចក្រ និងពុទ្ធចក្រ រក្សាបាននូវស្ថិរភាព នយោបាយ មានសន្តិភាពពិតប្រាកដ ធ្វើឱ្យប្រជាពលរដ្ឋរស់នៅដោយភាពសុខសាន្ត ៕
