ចាប់ខ្លួនឧកញ៉ា អ៊ឹម ប្រុស តាមសាលដីការបស់សាលាឧទ្ធរណ៍ត្បូងឃ្មុំ ពីបទ «ឆបោក», ឆែកឆេររកឃើញកាំភ្លើង៥ដើម និងគ្រាប់កាំភ្លើងជាង២០០គ្រាប់
(ខេត្តកំពង់ចាម) ៖កម្លាំងនគរបាលព្រហ្មទណ្ឌ នៃស្នងការដ្ឋាននគរបាលខេត្តកំពង់ចាម សហការជាមួយកម្លាំងជំនាញរបស់អធិការដ្ឋាននគរបាលស្រុកកំពង់សៀម ដឹកនាំដោយលោកឧត្តមសេនីយ៍ត្រី អ៊ិត ដារ៉ា ស្នងការរងទទួលផែនការងារព្រហ្មទណ្ឌ ក្រោមការដឹកនាំសម្របសម្រួលផ្ទាល់ពីលោក តូច ឧត្តម និងលោក តារា វិទូ ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម នៅវេលាម៉ោង១១និង៣០នាទីថ្ងៃទី៧ ខែមីនា ឆ្នាំ២០២៣ បានចុះអនុវត្តសាលដីកាស្ថាពររបស់សាលាឧទ្ធរណ៍ត្បូងឃ្មុំ បង្គាប់ឲ្យចាប់ខ្លួនទណ្ឌិតឈ្មោះ អ៊ឹម ប្រុស ហៅ គ្រូសីល ងារជា ឧកញ៉ា អាយុ៥៦ឆ្នាំ មានទីលំនៅភូមិអណ្តូងច្រុះ ឃុំអំពិល ស្រុកកំពង់សៀម ពីបទ «ឆបោក» ដែលប្រព្រឹត្តនៅភូមិអណ្តូងច្រុះ ឃុំអំពិល ស្រុកកំពង់សៀម កាលពីកំឡុងឆ្នាំ២០១៥ ២០១៦ និងឆ្នាំ២០១៧។នេះបើតាមការឲ្យដឹងពីមន្ត្រីនគរបាលខេត្តកំពង់ចាម។ការចាប់ខ្លួននេះ ក៏មានការភ្ញាក់ផ្អើល ខណៈគេមិនដឹងថា គាត់បានប្រព្រឹត្តដល់ថ្នាក់នេះសោះ។
មន្រ្តីនគរបាលបានបញ្ជាក់ទៀតថា ក្នុងពេលកិច្ចប្រតិបត្តិការអនុវត្តដីកាបង្គាប់ឱ្យចាប់ខ្លួនទណ្ឌិត, កម្លាំងជំនាញកំណត់បាន និងរកឃើញអាវុធខ្លី ចំនួន៥ដើម រួមមាន៖ ម៉ាកឡុក CF98 ពណ៌ខ្មៅ ចំនួន៣ដើម, ម៉ាក K59 ពណ៌ខ្មៅ ចំនួន ១ដើម ,ម៉ាក CZ75 ពណ៌ខ្មៅ ចំនួន១ដើម ,ប័ណ្ណសម្គាល់អាវុធខ្លីផុតសុពលភាព ចំនួន១៥សន្លឹក ចន្លោះពីឆ្នាំ២០០៧ និង២០០៨ ,គ្រាប់កាំភ្លើងចំនួន ២៥៩គ្រាប់
,គ្រាប់K59 ចំនួន ៤៩គ្រាប់,គ្រាប់ឡុកចំនួន២១០គ្រាប់ រួមទាំងសាន់តារ៉ុងចំនួន០៦, ម៉ាស៊ីនផ្ទុករូបភាពកាំម៉ារ៉ាសុវត្ថិភាពចំនួន០២គ្រឿ, ខ្នោះដៃចំនួន០៥គូ និងស្រោមខ្នោះចំនួន០៤ផងដែរ។
បច្ចុប្បន្នកម្លាំងស្នងការដ្ឋាននគរបាលខេត្តកំពង់ចាម បាននាំយកទណ្ឌិត រួមនិងវត្ថុតាង ទៅស្នងការដ្ឋាននគរបាលខេត្តកំពង់ចាម ដើម្បីបំពេញទម្រង់នីតិវិធី នឹងបញ្ជូនខ្លួនជនជាប់ចោទ ទៅតុលាការ៕
