មេបញ្ជាការកងរាជអាវុធហត្ថខេត្តបន្ទាយមានជ័យ ជួបសំណេះសំណាលជាមួយយោធិន នៃកងរាជអាវុធហត្ថ សោធននិវត្តន៍ យោធិនពិការ និងក្រុមគ្រួសារយោធិន ពលី-មរណៈ ក្នុងឱកាសបុណ្យចូលឆ្នាំខ្មែរប្រពៃណីជាតិ
(បន្ទាយមានជ័យ )៖ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យនៅរសៀលថ្ងៃសុក្រ ទី០៧ ខែមេសា ឆ្នាំ២០២៣នេះ អញ្ជើញជួបសំណេះសំណាលជាមួយ យោធិន នៃកងរាជអាវុធហត្ថ សោធននិវត្តន៍ យោធិនពិការ និងក្រុមគ្រួសារយោធិន ពលី–មរណៈ ក្នុងឱកាសបុណ្យចូលឆ្នាំខ្មែរប្រពៃណីជាតិ ឆ្នាំថោះ បញ្ចស័ក ព.ស ២៥៦៧ ដែលនឹងឈានមកដល់នាពេលដ៏ខ្លីខាងមុខនេះ។
ពិធីសំណេះសំណាលនេះ បានប្រារព្ធធ្វើឡើងនៅសាលប្រជុំ ( ធំ ) ជាន់ទី២ អគារសេនាធិការដ្ឋានកងរាជអាវុធហត្ថ ខេត្តបន្ទាយមានជ័យ ដោយមានការអញ្ជើញចូលរួមពីសំណាក់លោកមេបញ្ជាការរង និងយោធិន នៃកងរាជអាវុធហត្ថ សោធននិវត្តន៍ យោធិនពិការ និងគ្រួសារយោធិន ពលី–មរណៈ សរុបចំនួន៦៧នាក់(ក្នុងនោះយោធិនពិកា៤នាក់ គ្រួសារពលី–មរណៈ១២នាក់)ផងដែរ។
មានប្រសាសន៍ក្នុងពិធីសំណេះសំណាល នោះដែរ លោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្ត បានពាំនាំ នូវប្រសាសន៍ ផ្តាំផ្ញើសួរសុខទុក្ខ ពីសំណាក់នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ជូនចំពោះយោធិន នៃកងរាជអាវុធហត្ថ សោធននិវត្តន៍ យោធិនពិការ និងគ្រួសារយោធិន ពលី–មរណៈ ដោយក្តីនឹករលឹកក្នុងឱកាសចូលឆ្នាំថ្មីផងដែរ។
ជាមួយគ្នានោះដែរ លោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្ត ក៏បានរំលឹកពីវរៈភាពដ៏អង់អាចក្លាហាន របស់យោធិននៃកងរាជអាវុធហត្ថ សោធននិវត្តន៍ យោធិនពិការ និងគ្រួសារយោធិន ពលី–មរណៈទាំងអស់ ដែលបានលះបង់សាច់ស្រស់ ឈាមស្រស់ ដើម្បីបុព្វហេតុជាតិមាតុភូមិ រហូតដល់ប្រទេសជាតិមានសុខសន្តិភាពពេញលេញ សម្បូរសប្បាយក្រោមម្លប់នៃសន្តិភាព។ ទាំងអស់នេះ គឺជាការលះបង់យ៉ាងធំធេង មិនអាចកាត់ថ្លៃបានរបស់បងប្អូនយោធិនដែលមានស្នាដៃ ដើម្បីជាតិកម្ពុជាយើង។ ជាការតបស្នងសងគុណដ៏ធំធេងនេះ ប្រមុខរាជរដ្ឋាភិបាលកម្ពុជា ជាពិសេសនាយឧត្តមសេនីយ៍ សៅ សុខា តែងតែយកចិត្តទុកដាក់ទៅលើសុខទុកបងប្អូនយោធិន នៃកងរាជអាវុធហត្ថ សោធននិវត្តន៍ យោធិនពិការ និងគ្រួសារ យោធិន ពលី–មរណៈ ជាក់ស្តែងក្នុងឱកាសបុណ្យចូលឆ្នាំខ្មែរប្រពៃណីជាតិ ឆ្នាំថោះ បញ្ចស័ក ព.ស២៥៦៧នេះ ឯកឧត្តមបានចាត់ឱ្យក្រុមការងារ បញ្ជារការដ្ឋានកងរាជអាវុធហត្ថខេត្ត នាំយកនូវអំណោយផ្តល់ជូនដល់យោធិន សម្រាប់ចូលឆ្នាំថ្មី ក្នុងម្នាក់ៗទទួលបាន អង្ករ ២៥គីឡូក្រាម ,ទឹកក្រូច២យួរ , មី២កេស ,ត្រីខ២យួរ រួមនឹងថវិកាចំនួន២០ម៉ឺនរៀលផងដែរ៕
