ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន អញ្ជើញ សំណេះសំណាលជាមួយកងកម្លាំងប្រដាប់អាវុធ នៅសាលាខេត្តបន្ទាយមានជ័យ
(បន្ទាយមានជ័យ)៖ក្រោយពីបានបញ្ចប់នូវពិធីបុណ្យចូលឆ្នាំថ្មីប្រពៃណីជាតិ ឆ្នាំថោះរួចមកនាព្រឹកថ្ងៃទី១៧ ខែមេសា ឆ្នាំ២០២៣ ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានអញ្ជើញ ជួបសំណេះសំណាលសាកសួរសុខទុក្ខដល់កងកម្លាំង ដែលឈរជើងក្នុងភូមិសាស្ត្រខេត្តបន្ទាយមានជ័យ និងកងកម្លាំងការពារសន្តិសុខ សណ្ដាប់ធ្នាប់សាធារណៈជូនដល់បងប្អូនប្រជាពលរដ្ឋ នាឱកាសបុណ្យចូលឆ្នាំថ្មី នាំមកនៅភាពសប្បាយរីករាយក្រៃលែង ស្ថិតក្រោមដំបូលនៃសុខសន្តិភាព។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានមានប្រសាសន៍ថា ក្រោមនយោបាយឈ្នះឈ្នះរបស់សម្ដេចតេជោ ហ៊ុន សែន ប្រមុខរាជរដ្ឋាភិបាលនាឆ្នាំ១៩៩៨ ខេត្តបន្ទាយមានជ័យជាខេត្តបញ្ចប់សង្គ្រាមក្រោយគេ ហើយក៏ជាសមរភូមិក្ដៅ ព្រមទាំងបានប្រើប្រាស់កម្លាំងសរុប វិធានការសរុប មធ្យោបាយសរុបធ្វើឱ្យខេត្តបន្ទាយមានជ័យ បោះជំហានទៅមុខយ៉ាងក្លៀវក្លាមោះមុត សម្រេចបាននូវសមិទ្ធផលដ៏ច្រើនរាប់មិនអស់ បំរើឲ្យជីវភាពនិងការរស់នៅរបស់ប្រជាពលរដ្ឋប្រកបដោយភាពសំបូរសប្បាយ សុខុមរម្យនា។
ថ្លែងនាឱកាសជួបសំណេះសំណាល សួរសុខទុក្ខដល់កងកម្លាំងប្រដាប់អាវុធ នៅសាលាខេត្តបន្ទាយមានជ័យ ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន បានមានប្រសាសន៍ថ្លែងនូវអំណរគុណដ៏កងកម្លាំងប្រដាប់អាវុធយើង ដែលបានចូលរួមចំណែកយ៉ាងសកម្មក្នុងកិច្ចការពារសន្តិសុខ ក្នុងខ្សែបន្ទាប់ព្រំដែនក្នុងមូលដ្ឋាន ផ្សព្វផ្សាយគោលនយោបាយ ភូមិ ឃុំ មានសុវត្ថិភាព ទប់ស្កាត់បទល្មើសវិបត្តិសង្គមនានា ធ្វើយ៉ាងណាឱ្យប្រជាពលរដ្ឋបានរស់នៅប្រកបដោយសេចក្ដីសុខនិងភាពកក់ក្ដៅ។ ចុងបញ្ចប់កម្មវិធីគណៈអធិបតីក៏បានផ្ដល់ជូន ជាថវិកា និងគ្រឿងបរិភោគមួយចំនួន ដល់កងកម្លាំងប្រដាប់អាវុធទាំងអស់ដែលបានខិតខំបំពេញភារកិច្ច ការពារជាតិមាតុភូមិ ខិតខំរៀនសូត្រលត់ដំខ្លួនបានល្អ សក្ដិសមជាកុលបុត្រដ៏ឆ្នើមរបស់ជាតិ នឹងធ្វើជាគំរូល្អសម្រាប់យុវជនជំនាន់ក្រោយបន្តទៀត៕
