ម៉ូតូ និងម៉ូតូបុកគ្នាយ៉ាងពេញទំហឹង បណ្ដាលឱ្យបុរសវ័យចំណាស់ម្នាក់រងរបួសធ្ងន់ និង ២នាក់ផ្សេងទៀតរងរបួសស្រាល នៅក្រុងសិរីសោភ័ណ្ឌ
ខេត្តបន្ទាយមានជ័យ៖ បុរសវ័យចំណាស់ម្នាក់បានរងរបួសធ្ងន់ ត្រូវបានសាច់ញាតិនិងប្រជាពលរដ្ឋ ដឹកយកទៅសង្គ្រោះនៅឯបន្ទីរពេទ្យភ្លាមៗ និងពីរនាក់ទៀតរងរបួសស្រាល ក្នុងហេតុការណ៍គ្រោះថ្នាក់ចរាចរណ៍រវាងម៉ូតូ និងម៉ូតូ នៅវេលាម៉ោង១១ព្រឹក ថ្ងៃទី៩ ខែកក្កដា ឆ្នាំ២០២៣ នៅចំណុចខាងមុខសាលាបឋមសិក្សាម្កាក់ ស្ថិតនៅក្នុងសង្កាត់ម្កាក់ ក្រុងសិរីសោភ័ណ ។
ពាក់ព័ន្ធករណីគ្រោះថ្នាក់ចរាចរណ៍ខាងលើនេះដែរបើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលជួបគ្រោះថ្នាក់ចរាចរណ៍នេះកើតឡើងគេបានឃើញបុរសវ័យចំណាស់ម្នាក់បានបើកម៉ូតូម៉ាកវេវ ពាក់ស្លាកលេខ ប.មានជ័យ 1A-0998 ក្នុងទិសដៅពីរលិចទៅកើត ក្នុងគោលបំណងឆ្លងផ្លូវជាតិទៅម្ខាងទៀត មិនទាន់ដល់ពាក់កណ្ដាលផ្លូវផង ក៏ស្រាប់តែមានម៉ូតូម៉ាកឃ្លីកមួយគ្រឿងពាក់ស្លាកលេខ ប.មានជ័យ 1X-8324 ជិះគ្នាពីរនាក់ ប្រុសជាអ្នកឌុប ស្រីនៅពីក្រោយ អាយុប្រហាក់ប្រហែលគ្នាប្រមាណជាង២០ឆ្នាំ ក្នុងទិសដៅពីជើងទៅត្បូង បានបុកគ្នាមួយទំហឹង បណ្ដាលឲ្យបុរសវ័យចំណាស់រងរបួសធ្ងន់ ត្រូវបានក្រុមគ្រួសារ និងប្រជាពលរដ្ឋ ដឹកបញ្ជូនទៅសង្គ្រោះនៅឯបន្ទីរពេទ្យភ្លាមៗ រីឯខាងភាគីម៉ូតូឃ្លីករងរបួសស្រាល ចំណែកមធ្យោបាយទាំងពីររងការខូចខាតយ៉ាងដំណំផ្នែកខាងមុខ។
ក្រោយពីកើតហេតុកម្លាំងនគរបាលមូលដ្ឋានក្រុងសិរីសោភ័ណ្ឌ បានចុះមកដល់គោលដៅ ដើម្បីធ្វើការសម្រួលចរាចរណ៍ និងវាស់វែងតាមជំនាញនគរបាលផែនចរាចរណ៍ រួចនាំយកមធ្យោបាយទាំងពីរយកទៅរក្សាទុក ដើម្បីរង់ចាំដោះស្រាយគ្នាតាមនីតិវិធីច្បាប់ជាក្រោយ៕
