ព្រោះតែរឿងមិនបានហូបផ្លែឪឡឹក បុរសម្នាក់ទាញដំបងវ៉ៃជនរងគ្រោះ រហូតដល់ស្លាប់ នៅស្រុកស្វាយចេក
ខេត្តបន្ទាយមានជ័យ៖ពិតជាសង្វែកខ្លាំងណាស់ ព្រោះតែរឿងផ្លែឪឡឹក ជាហេតុធ្វើឲ្យលោកតា វ័យ៨១ឆ្នាំម្នាក់បានស្លាប់ ដែលបង្កឡើងដោយបុរសដៃឆៅម្នាក់បានទាញដំបងវ៉ៃ ដោយសាខឹងសុំផ្លែឪឡឹកមិនបានហូប បង្កការភ្ញាក់ផ្អើលកាលពីថ្ងៃទី២៥ ខែកក្តដា ឆ្នាំ២០២៣ ស្ថិតនៅក្នុងភូមិកកោះ ឃុំស្លក្រាម ស្រុកស្វាយចេក ខេត្តបន្ទាយមានជ័យ។
លោកវរៈសេនីយ៍ឯក ជា ឈ្លូញ អធិការនគរបាលស្រុកស្វាយចេក បានឲ្យដឹងថា៖ជនសង្ស័យមានឈ្មោះ សូ ឡិ ភេទប្រុស អាយុ៣១ឆ្នាំ ។ចំណែកជនរងគ្រោះឈ្មោះ ព្រឿង ព្រឿយ ភេទប្រុស អាយុ៨១ឆ្នាំ (ស្លាប់) រស់នៅភូមិកើតហេតុខាងលើ។
លោកបានបញ្ជាក់ថា៖ពាក់ព័ន្ធករណីជនសង្ស័យវ៉ៃ ជនរងគ្រោះ បណ្តាលឲ្យស្លាប់នេះដែរ គឺផ្តើមចេញពីជនរងគ្រោះឈ្មោះ ព្រឿង ព្រឿយ បានទិញឪឡឹកពីផ្សារមកដល់ផ្ទៈ ហើយក៏បានពុះអោយចៅហូប ហើយនៅពេលនោះជនសង្ស័យឈ្មោះ សូ ឡិ ដែលជាអ្នករស់នៅជិតខាងបានដើរមកសុំឪឡឹកហូបផង ពេលនោះជនរងគ្រោះបានចែកកូនចៅអស់ ដោយសារខឹងសុំមិនបានក៏ស្រាប់តែទាញដំបងវ៉ៃចំឆ្អឹងជំនីខាងស្តាំ បណ្តាលដួលសន្លប់ ឃើញដូច្នោះជនដៃដល់ក៏បានរត់គេចខ្លួន។
លោកវរៈសេនីយ៍ឯក ជា ឈ្លូញ បានបញ្ជាក់ទៀតថា៖ក្រោយជនសង្ស័យវ៉ៃជនរងគ្រោះរយៈពេល ៣០នាទីទើបស្លាប់ ហើយជនដៃដល់ក៏រត់គេចខ្លួនទៅដល់ចុងភូមិ ក៏ត្រូវកម្លាំងនគរបាលស្រុកស្វាយចេក ចាប់បានបញ្ជូនទៅអធិការដ្ឋាននរបាលស្រុកស្វាយចេក ដើម្បីអនុវត្តនីតិវិធីបន្ត ។ចំណែកសាកសពត្រូវបានសមត្ថកិច្ចប្រគលឲ្យក្រុមគ្រួសារយកទៅធ្វើបុណ្យតាមប្រពៃណី៕
