សន្និបាតបូកសរុបការងារបោះឆ្នោតជ្រើសតាំងអ្នកតំណាងរាស្ត្រនីតិកាលទី ៧ សម្រាប់ខេត្តបន្ទាយមានជ័យ
ខេត្តបន្ទាយមានជ័យ៖នាព្រឹកថ្ងៃទី០៧ ខែសីហា ឆ្នាំ២០២៣ គណៈកម្មការរៀបចំការបោះឆ្នោតខេត្តបន្ទាយមានជ័យ បានរៀបចំសន្និបាតបូកសរុបការងារបោះឆ្នោតជ្រើសតាំងអ្នកតំណាងរាស្ត្រនីតិកាលទី៧ ឆ្នាំ ២០២៣។
លោក យ៉ង់ សក្ដិ ប្រធានគណៈកម្មការរៀបចំការបោះឆ្នោតខេត្តបានឲ្យដឹងថា យោងតាមរបាយការណ៍ស្ដីពីស្ថិតិប្រជាពលរដ្ឋ ប៉ាន់ស្មានសម្រាប់ការបម្រើឲ្យការពិនិត្យបញ្ជីឈ្មោះ នឹងការចុះឈ្មោះបោះឆ្នោតឆ្នាំ ២០២២ ដែលទទួលបានពីរដ្ឋបាល ឃុំ សង្កាត់ ទាំង ៦៧ ដោយមានប្រជាពលរដ្ឋសរុបចំនួន ៨០៨,០២៨នាក់ ស្រី ៤០៦,៩៣៨នាក់ ប្រជាពលរដ្ឋមានអាយុ ១៨ ឆ្នាំឡើងមានចំនួន ៥៤១,៤៧៧នាក់ ស្រី ២៧០,៨៥៩នាក់ ប្រជាពលរដ្ឋដែលមានឈ្មោះក្នុងបញ្ជីបោះឆ្នោតផ្លូវការសរុបចំនួន ៤៣១,៧៧៥នាក់។
លោក យ៉ង់ សក្ដិ បានបន្តថា មុនការបោះឆ្នោត និងក្រោយការបោះឆ្នោតគណៈកម្មការរៀបចំការបោះឆ្នោតខេត្ត បានធ្វើការទំនាក់ទំនងល្អជាមួយអាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធទាំង ៣ប្រភេទ បានអនុវត្តយ៉ាងម៉ឺងម៉ាត់និងយកចិត្តទុកដាក់ ខ្ពស់លើការងារសន្តិសុខ សុវត្ថិភាព សណ្តាប់ធ្នាប់សាធារណៈ ក្នុងដំណើរការបោះឆ្នោតក្នុងបរិយាកាសល្អស្ងប់ស្ងាត់ អព្យាក្រិតនិងយុត្តិធម៌សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី ៧ ឆ្នាំ ២០២៣ បានល្អប្រសើរ។ ជាលទ្ធផលនៃការបោះឆ្នោតជ្រើសតាំងតំណាងរាស្ត្រនីតិកាលទី ៧ សម្រាប់ខេត្តបន្ទាយមានជ័យ គឺមានគណបក្សនយោបាយចូលរួមចំនួន ១១ គណបក្ស រួមមាន ១.គណបក្សខ្មែរតែមួយទទួលបាន ១,៧០១សំលេង ២.គណបក្សសញ្ជាតិកម្ពុជាទទួលបាន ៦៧១សំលេង ៣.គណបក្សខ្មែររួបរួមជាតិទទួលបាន ១១.៦១៧សំលេង ៤.គណបក្សស្ត្រីដើម្បីស្ត្រីទទួលបាន ១,៨០២សំលេង ៥.គណបក្សខ្មែរឈប់ក្រទទួលបាន ១,៦៧១សំលេង ៦.គណបក្សហ៊ុនស៊ិនប៉ិចទទួលបាន ២៤,៧៩៥សំលេង ៧.គណបក្សធម្មាធិបតេយ្យទទួលបាន ១,៩០៣សំលេង ៨.គណបក្សខ្មែរអភិរក្សទទួលបាន ២,៥០០សំលេង ៩.គណបក្សយុវជនកម្ពុជាទទួលបាន ៣,៨២២សំលេង ១០.គណបក្សជនជាតិដើមប្រជាធិបតេយ្យកម្ពុជាទទួលបាន ២,៣៦៧សំលេង និងទី១១.គណបក្សប្រជាជនកម្ពុជាទទួលបាន ២៤៦,៧៧៤សំលេង សន្លឹកឆ្នោតបានការសរុបចំនួន ២៩៩,៦២៣សន្លឹក សន្លឹកឆ្នោតមិនបានការចំនួន ១២,៦៤៧សន្លឹក និងការបែងចែកចំនួនអសនៈ គឺគណបក្សប្រជាជនកម្ពុជាទទួលបានអសនៈក្នុងរដ្ឋសភាចំនួន ៦ អសនៈលើ ៦ អសនៈ។
លោក លី សុវណ្ណារិទ្ធ អភិបាលរងខេត្តបន្ទាយមានជ័យបានមានប្រសាសន៍ថា ដោយមានបទពិសោធពីការបោះឆ្នោតកន្លងមក និងមន្ត្រីគ្រប់លំដាប់ថ្នាក់មានការយល់ដឹងច្បាស់អំពីតួនាទី ភារកិច្ច ច្បាប់ស្ដីពីការបោះឆ្នោត បទបញ្ជា និងនីតិវិធីនៃការបោះឆ្នោតនិងក្រមសីលធម៌ គណៈកម្មការរៀបចំការបោះឆ្នោតខេត្តបន្ទាយមានជ័យបានចាត់ចែង រៀបចំ និងគ្រប់គ្រងដំណើរការការបោះឆ្នោតជ្រើសតាំងតំណាងរាស្ត្រនីតិកាលទី ៧ ឆ្នាំ ២០២៣ ឱ្យប្រព្រឹត្តទៅដោយរលូន គ្មានការរារាំង គ្មានការគំរាមគំហែង គ្មានអំពើហិង្សា ឬបញ្ហាអសន្តិសុខណាមួយកើតឡើងនោះទេ។ ដោយមានកិច្ចសហការល្អនិងចូលរួមយ៉ាងពេញទំហឹងពីសំណាក់អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ គណបក្សនយោបាយយោគយល់អធ្យាស្រ័យគ្នា មានភាពចាស់ទុំផ្នែកនយោបាយ និងការយល់ដឹងកាន់តែខ្ពស់របស់ប្រជាពលរដ្ឋពីគោលការណ៍លទ្ធិប្រជាធិបតេយ្យ និងបានចូលរួមបោះឆ្នោតច្រើនកុះករធ្វើឲ្យការបោះឆ្នោតជ្រើសតាំងតំណាងរាស្ត្រនីតិកាលទី ៧ ឆ្នាំ ២០២៣ ប្រព្រឹកទៅក្រោមបរិយាកាសល្អ និងប្រកបដោយសន្តិសុខ សុវត្ថិភាពខ្ពស់។ក្នុងនាមរដ្ឋបាលខេត្តខ្ញុំមានសេចក្ដីសង្ឃឹមយ៉ាងមុតមាំថា ការបោះឆ្នោតនៅអាណត្តិក្រោយៗ និងប្រព្រឹត្តទៅកាន់តែប្រសើរថែមទៀតទាំងផ្នែកបច្ចេកទេសបោះឆ្នោត ការងារសន្តិសុខ សុវត្ថិភាព និងសណ្ដាប់ធ្នាប់សាធារណៈ និងមានការចូលរួមច្រើនពីគ្រប់ភាគីពាក់ព័ន្ធ ធ្វើឱ្យប្រទេសកម្ពុជាមានការអភិវឌ្ឍន៍ និងរក្សាបាននូវលទ្ធិប្រជាធិបតេយ្យ សេរីពហុបក្ស យ៉ាងពិតប្រាកដ៕
