មន្ទីរធម្មការនិងសាសនាខេត្តបន្ទាយមានជ័យ ធ្វើពិធីបិទអនុសំវច្ឆរ មហាសន្និបាតមន្ត្រីសង្ឃ
(បន្ទាយមានជ័យ)៖ក្រោយពីបានបែងចែងជាបីក្រុមនៃកិច្ចការពិភាក្សា ស្ដីពីបញ្ហាប្រឈមឬសំណូមពរផ្សេងៗ នៃកិច្ចដំណើរការរយៈពេលបីថ្ងៃ អនុសំវច្ឆរមហាសន្និបាតមន្ត្រីសង្ឃទូទាំងខេត្តបន្ទាយមានជ័យ ទទួលបានជាលទ្ធផលល្អ ជាផ្លែផ្ការួចមក នាថ្ងៃទី២០ ខែមីនាឆ្នាំ ២០២២ បានធ្វើពិធីបិទអនុសំវច្ឆរមហាសន្និបាតមន្ត្រីសង្ឃទូទាំងខេត្តបន្ទាយមានជ័យ ប្រព្រឹត្តទៅក្រោមអធិបតីភាពឯកឧត្តម នរៈ រតនវឌ្ឍនោ រដ្ឋលេខាធិការក្រសួងធម្មការ និងសាសនាតំណាងឯកឧត្តម ឈិក សុខុន រដ្ឋមន្ត្រី និងលោកជំទាវឧកញ៉ា ម៉ៅម៉ាល័យ កែ គឹមយ៉ាន ប្រធានកិត្តិយសសមាគមនារីសន្តិភាពខេត្តបន្ទាយមានជ័យ។
លោក បៀវ ថាន ប្រធានមន្ទីរធម្មការនិងសាសនាខេត្តបន្ទាយមានជ័យបានលើកឡើងថា ក្នុងរយៈពេល ៣ថ្ងៃមកនេះ អង្គមហាសន្និបាតទាំងមូលបានអនុវត្ត និងគោរពតាមកម្មវិធីដែលបានគ្រោងទុក ដោយសម្របសម្រួលពីមន្ទីរធម្មការ និងសាសនាខេត្ត និងព្រះមេគុណទាំងពីរគណៈ បានបង្ហាញពីគោលបំណងនិងទិសដៅរបស់អង្គមហាសន្និបាត ដើម្បីឆ្លុះបញ្ចាំងអំពី សង្ឃប្រកាសលើកទី ១ ដល់លើកទី ២៩ បានលើសពីបទអន្តរាគមន៍ បញ្ហាប្រឈមនិងដោះស្រាយ សំណូមពរសាលាគណ អាចារ្យខេត្ត ក្រុង ស្រុក និងសមាជិកសមាជិកា នៃអង្គមហាសន្និបាត បានពិភាក្សាយ៉ាងផុលផុស ដើម្បីប្ដូរបទពិសោធន៍គ្នាទៅវិញទៅមក ពីក្រុងស្រុកមួយទៅក្រុងស្រុកមួយ។
លោក បៀវ ថានបន្តថា ពិតមែនតែវិស័យព្រះពុទ្ធសាសនា មានការរីកចម្រើនគួរសមល្មម និងសេចក្ដីត្រូវការខាងស្មារតី ខាងការប្រតិបត្តិហើយក៏ដោយ ប៉ុន្តែយើងនូវមានការងារជាច្រើនទៀតដែលត្រូវខិតខំប្រឹងប្រែងទាំងអស់គ្នា ដើម្បីពង្រឹងគុណភាពថែមទៀង និងលើកទិសដៅអនុវត្តបន្តទៅមុខ ជាពិសេសបន្តពង្រឹងគុណភាពក្នុងការដឹកនាំគ្រប់គ្រងវត្តអារាម ឱ្យមានរបៀបរៀបរយ សាមគ្គីភាព រក្សាតម្លៃព្រះពុទ្ធសាសនា បន្តការរួមសាមគ្គីគ្នា អភិវឌ្ឍវិស័យពុទ្ធសាសនាឲ្យបានថ្កុំថ្កើង រុងរឿង ដោយជៀសវាងការប្រកាន់បក្សពួក ដែលជាហេតុអាចធ្វើឱ្យ ពុទ្ធបរិស័ទបាត់បង់ជំនឿនិងធ្វើឲ្យអាប់អោនដល់ព្រះពុទ្ធសាសនានៃយើង។
លោកជំទាវឧកញ៉ា ម៉ៅម៉ាល័យ កែ គឹមយ៉ាន និងឯកឧត្តម នរៈ រតនវឌ្ឍនោ រដ្ឋលេខាធិការក្រសួងធម្មការ និងសាសនាបានថ្លែងអគុណរព្រះគុណ និងសូមសំដែងនូវមនោសញ្ចេតនា អបអរសាទរចំពោះព្រះមេគណខេត្ត ព្រះរាជាគណៈព្រះមន្ត្រីសង្ឃ ព្រះគ្រូអនុគណៈ មន្ទីរធម្មការនិងសាសនាខេត្តទាំងអស់ ដែលបានផ្ដោតព្រះទ័យទុកដាក់ក្នុងការរៀបចំ អនុសំវច្ចរមហាសន្និបាតលើកទី ២៩ នេះ ដោយបានផ្ដោតលើប្រធានបទសំខាន់ៗ ដែលមានអត្ថន័យជ្រាលជ្រៅ ដើម្បីបរើឲ្យផលប្រយោជន៍នៃការបង្កើតធ្លុងសាមគ្គីគ្នា ក្នុងជួរព្រះសង្ឃនិងពុទ្ធសាសនិក សម្រាប់ប្រមូលផ្ដុំគំនិត បញ្ញាញាណដ៏ទូលំទូលាយ និងរិះរកវិធានការសមស្របដើម្បីចូលរួមចំណែកកាត់បន្ថយ លុបបំបាត់អំពើអកុសល និងអំពើហិង្សា ផងទាំងពួងនៅក្នុងសង្គម ដើម្បីឈោងចាប់យកសុខសន្តិភាពដ៏ពេញលេញ ទាំងសុខមាលភាព ផ្លូវកាយផ្លូវចិត្តនិងការអភិវឌ្ឍន៍។ ចុងបញ្ចប់គណៈអធិបតីបាននិមន្តអញ្ជើញ កាត់ខ្សែបូឆ្លងសមិទ្ធផល ស្ទបសម្រាប់តម្កល់ ស្គរជ័យនិងជួងក្នុងវត្តប្រាសាទស្រះកណ្ដាលខ្ចាស់ផងដែរ៕
