លោក លី សុវណ្ណារិទ្ធ ជំរុញបន្ថែមដល់អង្គការអន្តរជាតិទេសន្តប្រវេសន៍ (IOM) បន្តចិត្តទុកដាក់គាំពារទៅលើជនរងគ្រោះដែលមានបញ្ហាសុខភាព ពិសេសជំងឺឆ្លងផ្សេងៗ
ខេត្តបន្ទាយមានជ័យ៖ការអភិវឌ្ឍន៍ផែនទីបន្លាស់ទីប្រជាជន (PMM) គឺជាវិធីសាស្ត្រនៃការរៀបចំផែនទីបង្ហាញអំពីការបន្លាស់ទីរបស់ប្រជាជន ដែលមានគោលបំណងផ្តល់ព័ត៌មានអំពីទីតាំងអាទិភាព និងតំបន់នានា សម្រាប់អន្តរាគមន៍សុខភាពសាធារណៈ តាមរយៈការវិភាគថាមភាព(ភាពសកម្ម) និងរបៀបនៃការបន្លាស់ទីរបស់ប្រជាជន។លោកស្រី ឌុំ ច័ន្ទធីតា ប្រធានគម្រោងថ្នាក់ជាតិ ទទួលបន្ទុកផ្នែកសុខភាពទេសន្តរប្រវេសន៍ លើកឡើងបែបនេះក្នុងឱកាសអញ្ជើញចូលជួបថ្នាក់ដឹកនាំខេត្តបន្ទាយមានជ័យ នៅសាលប្រជុំ ខ សាលាខេត្ត ដើម្បីពិភាក្សាអំពីវឌ្ឍនភាពនៃការអភិវឌ្ឍផែនទី បម្លាស់ទីប្រជាជន នៅក្នុងខេត្តបន្ទាយមានជ័យ ដែលជាខេត្តជាប់ព្រំដែនកម្ពុជា–ថៃ។
លោកស្រីបន្តថា ការយល់ដឹងពីថាមភាពនៃការបន្លាស់ទីប្រជាជន បានជួយសម្រួលនៃការធ្វើសេចក្តីសម្រេចចិត្តរបស់រាជរាជរដ្ឋាភិ បាលសហគមន៍ និងសា្ថប័ន/ តួអង្គពាក់ព័ន្ធផ្សេងៗទៀត សម្រាប់ការត្រៀមបង្ការ និងឆ្លើយតបនៃការផ្ទុះឡើងនៃជំងឺឆ្លង និងការគំរាមកំហែងផ្នែកសុខភាពសារធារណៈ និងមានវិធានការទប់ស្កាត់និងបង្ការ ដែលទាំងនេះគឺជាលទ្ធផលរំពឹងទុក ដោយផ្ទាល់នៃការអនុវត្ត PMM។
លោកស្រីបញ្ជាក់ថា ៖ PMM មានគោលបំណងជាក់លាក់គឺ៖
១. ចាត់ថ្នាក់ព័ត៌មានផ្ទាល់ខ្លួនរបស់ជនទេសន្តរប្រវេសន៍ និងប្រជាជនចល័ត និងផ្លូវចល័តចម្បង ដែលបានប្រើប្រាស់នៅក្នុងតំបន់ភូមិសាស្ត្រដែលមានចំណាប់អារម្មណ៍ ទាំងនៅថ្នាក់អន្តរជាតិ និងនៅក្នុងប្រទេស។
២. កំណត់ទីតាំងងាយរងគ្រោះ ជាទីតាំងដែលជនទេសន្តរប្រវេសន៍ ឬប្រជាជនចល័តផ្សេងទៀត ប្រមូលផ្តុំ និង ធ្វើអន្តរកម្មជាមួយអ្នកធ្វើដំណើរផ្សេងទៀត និងសហគមន៍មូលដ្ឋាន ដែលបរិយាកាសនៃទីតាំងទាំងនេះ អាចបង្ករលក្ខណៈអំណោយផលដល់ការកើនឡើងហានិភ័យសុខភាព ដូចជា ការរីករាលដាលនៃជំងឺឆ្លង។
៣. កំណត់ទីតាំងអាទិភាពងាយរងគ្រោះ ឬតំបន់ដែលសមត្ថភាពនៅមានកម្រិតសម្រាប់ការត្រៀមបង្ការ និងឆ្លើយតបគ្រោះអាសន្នផ្នែកសុខភាពសាធារណៈ។
៤. គាំទ្រការបែងចែកធនធាន ការគ្រោងរៀបចំ និងការអនុវត្តកិច្ចអន្តរាគមន៍ផ្នែកសុខភាពសាធារណៈ និងគាំទ ការរៀបចំផែនការសកម្មភាព ដើម្បីកំណត់ទីតាំងអាទិភាព និងដើម្បីពង្រឹងសមត្ថភាពត្រៀមបង្ការ និងឆ្លើយតបគ្រោះអាសន្ន។
មានប្រសាសន៍នាឱកាសនោះលោក លី សុវណ្ណារិទ្ធ អភិបាលខេត្តស្តីទី ក៏បានធ្វើការថ្លែងអំណរគុណទៅដល់អង្គការទេសន្តរប្រវេសន៍ ដែលបានខិតខំរួមចំណែកជាមួយនឹងរាជរដ្ឋាភិបាលកម្ពុជា ជាពិសេសបានជ្រើសរើសខេត្តបន្ទាយមានជ័យជាខេត្តគោលដៅ សម្រាប់ការត្រៀមបង្ការ និងឆ្លើយតបនៃការផ្ទុះឡើងនៃជំងឺឆ្លង និងការគំរាមកំហែងផ្នែកសុខភាពសារធារណៈ និងមានវិធានការទប់ស្កាត់ និងបង្កាផ្សេងៗ ។ទន្ទឹមជាមួយគ្នានោះ លោកក៏បានជំរុញបន្ថែមដល់អង្គការត្រូវផ្តោតយកចិត្តទុកដាក់គាំពារទៅលើជនរងគ្រោះបន្តជួយដល់ជនរងគ្រោះ បន្ថែមទៀត ជាពិសេសអាជ្ញាធស្រុក–ក្រុងត្រូវយកចិត្តទុកដាក់តាមដានស្រង់ទន្និន័យពលរងគ្រោះ ដើម្បីដោះស្រាយបានទាន់ពេលវេលា៕
