អភិបាលខេត្តប៉ៃលិន អញ្ជើញចុះសាកសួរសុខទុក្ខកូនៗកុមារកំព្រា នៅមណ្ឌលកុមារកំព្រាខេត្ត ក្នុងភូមិអូរតាពុកក្រោម
ប៉ៃលិន៖ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន អមដំណើរដោយ ក្រុមការងារ និងមន្ត្រីជំនាញពាក់ព័ន្ធ នាថ្ងៃទី២៨ ខែកញ្ញា ឆ្នាំ២០២៣ បានអញ្ជើញចុះសួរសុខទុក្ខ ម៉ែដោះ និងកូនៗកុមារកំព្រា នៅក្នុងមណ្ឌលកុមារកំព្រា ខេត្តប៉ៃលិន ស្ថិតក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន ។
លោកជំទាវបណ្ឌិត បាន ស្រីមុំ អភិបាលខេត្តប៉ៃលិន បានមានប្រសាសន៍លើកឡើងថា៖ រាជរដ្ឋាភិបាលកម្ពុជា បានយកចិត្តទុកដាក់ខ្ពស់ និងគិតគូរពីសុខទុក្ខរបស់កុមារកំព្រាគ្រប់កន្លែងតាមរយ:រដ្ឋបាលខេត្ត ហើយកន្លងទៅកូនៗ ក្មួយៗនៅទីនេះ តែងតែទទួលបាននូវការទំនុកបំរុងជាហូរហែរ ដោយមានការចូលរួមបន្ថែមពីសប្បុរសជនគ្រប់ទិសទី ធ្វើ យ៉ាងណាធានាបានការហូបចុក ស្លៀកពាក់គ្រប់គ្រាន់ ជាមួយការលើកទឹកចិត្តឲ្យកូនក្មួយបន្តសិក្សារៀន សូត្រដូចកុមារដទៃ ទៀតដែរ និងឈានទៅបន្តការសិក្សានៅបណ្តាសាកលវិទ្យាល័យ ដើម្បីឆ្ពោះទៅយកជំនាញសម្រាប់កសាងជីវិត។
លោកជំទាវបណ្ឌិតអភិបាលខេត្ត បានមានប្រសាសន៍លើកឡើងថា៖ កូនៗ ក្មួយៗដែលជាក្មេងកំព្រា មិនឯកោនោះទេ គឺនៅតែទទួលបានការយកចិត្តទុកដាក់ និងផ្តល់ភាពកក់ក្តៅពីរាជរដ្ឋាភិបាលកម្ពុជា ក៏ដូចជាថ្នាក់ដឹកនាំខេត្ត គ្រប់ជាន់ថ្នាក់ ជាពិសេសម៉ែដោះ ដែលបានជួយបីបាច់ថែរក្សា និងស្រលាញ់ដូចជាកូនបង្កើតរបស់ខ្លួនឯង ដូច្នេះកូនៗ ក្មួយៗ ត្រូវ ខិតខំរៀនសូត្រឱ្យបានខ្ពង់ខ្ពស់ ដើម្បីចាប់យកចំណេះដឹង ឬជំនាញពិតប្រាកដណាមួយ សម្រាប់ខ្លួនឯង អាចចិញ្ចឹមបី បាច់ថែរក្សា និងរកទទួលទានបានដោយខ្លួនឯង ដោយមិនចាំបាច់ពឹងផ្អែកលើអ្នកដទៃឡើយ។
នៅក្នុងឱកាសនោះផងដែរ លោកជំទាវបណ្ឌិត បាន ស្រីមុំ ក៏បានមានប្រសាសន៍កោតសរសើដល់ម៉ែដោះ នៅក្នុងមណ្ឌលទាំងអស់ ដែលបាន ខិតខំប្រឹងប្រែងចិញ្ចឹមបីបាច់ថែរក្សាដល់កូនៗ ក្មួយៗ កុមារកំព្រា ដោយការយកចិត្តទុក្ខដាក់ខ្ពស់ និងសូមផ្តាំផ្ញើដល់កូនៗ ក្មួយៗកុមារកំព្រាទាំងអស់ ត្រូវយកចិត្តទុកដាក់ ខិតខំរៀនសូត្រ ស្តាប់ការណែនាំពីសំណាក់ លោកគ្រូ អ្នកគ្រូ និងត្រូវធ្វើខ្លួន ជាកូនល្អ សិស្សល្អ ជាទំពាំងស្នង ឫស្សី ជាពិសេសត្រូវជៀសឱ្យឆ្ងាយពីគ្រឿងញៀន និងអំពើ អបាយមុខផ្សេងៗ ដើម្បីមាន ឱកាសគ្រប់គ្រាន់ ក្នុងការអភិវឌ្ឍខ្លួន ហើយត្រូវតែរឹងប៉ឹង និងជឿជាក់លើខ្លួនឯង ក្នុងការសម្រេច នូវក្ដីសុបិន និងបំណងប្រាថ្នា របស់ខ្លួននាថ្ងៃអនាគត់៕ ដោយ ៖ លោក ក្រូច ណាវី
