បុរសម្នាក់ត្រូវខ្សែភ្លើងឆក់ស្លាប់ភ្លាមៗ ក្រោយពីឡើងលួចកាត់ខ្សែភ្លើង នៅចំណុចក្បែរក្រុមហ៊ុនថ្មម៉ាត ឃុំស្វាយជ្រះ ស្រុកស្នួល
ខេត្តក្រចេះ៖ បុរសម្នាក់ ឡើងលួចកាត់ខ្សែភ្លើងនៅតាមបង្គោលភ្លើងក្បែរក្រុមហ៊ុនថ្មម៉ាត ស្ថិតនៅក្នុងភូមិរវៀងជ័យ ឃុំស្វាយជ្រះ ស្រុកស្នួល ខេត្តក្រចេះ ត្រូវបានឆក់ស្លាប់ភ្លាមៗ បង្កការភ្ញាក់ផ្អើលដល់ប្រជាពលរដ្ឋ នៅវេលាម៉ោងជាង២រំលងអាធ្រាត ថ្ងៃទី០១ ខែវិច្ឆិកា ឆ្នាំ២០២៣ ។ក្រោយពីទទួលបានព័ត៌មាននេះនៅវេលាម៉ោងជាង ៨ព្រឹកថ្ងៃខែដដែលកម្លាំងសមត្ថកិច្ចជំនាញនៃអធិការដ្ឋាននគរបាលស្រុកស្នួលផ្នែកកោសល្យវិច្ច័យ រួមនិងក្រុមគ្រូពេទ្យ បានចុះធ្វើការពិនិត្យនិងធ្វើកោសល្យវិច័យទៅលើសាកសពផងដែរ។
សមត្ថកិច្ចបានឲ្យដឹងថា សពមានឈ្មោះ ឆេង ណូ អាយុ ២៤ឆ្នាំ រស់នៅភូមិរវៀងជ័យ ឃុំស្វាយជ្រះ ស្រុកស្នួល ខេត្តក្រចេះ។
ប្រភពព័ត៌មានពីប្រជាពលរដ្ឋបានឲ្យដឹងថា នៅមុនពេលកើតហេតុគេបានឃើញបុរសខាងលើបានឡើងទៅលួចកាត់ខ្សែភ្លើងនៅតាមបង្គោល ត្រង់ចំណុចខាងលើ ក៏ត្រូវបានឆក់ធ្លាក់មកពីលើបោកក្បាលទៅនឹងថ្ម បណ្តាលឲ្យស្លាប់ភ្លាមៗតែម្តង។
ក្រោយពីសមត្ថកិច្ចជំនាញនិងក្រុមគ្រូពេទ្យធ្វើការពិនិត្យនៅកន្លែងកើតហេតុ និងធ្វើកោសល្យវិច្ច័យរួចជាលទ្ធផលឃើញថា សពជនរងគ្រោះពិតជាស្លាប់ដោយសារឆក់ខ្សែភ្លើងពិតប្រាកដមែនរួចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕ ដោយ ៖ លោក សួន វ៉ាន់ឌេន
