បើករថយន្តស៊េរីទំនើប បោះពួយល្បឿនលឿនខ្វះការប្រយ័ត្ន បណ្ដាឲ្យរ៉េសចង្កូតទៅបុកបង្គោលភ្លើងបំភ្លឺរបស់រដ្ឋ បណ្តាលឲ្យខូចខាតយ៉ាងដំណំ សំណាងហើយមិនមានអ្នករងគ្រោះថ្នាក់
(ភ្នំពេញ)៖សំណាងហើយមិនមានអ្នករងគ្រោះថ្នាក់ ដោយសាររថយន្តស៊េរីទំនើបម៉ាក Land cruiserមួយគ្រឿងពណ៍ស បើកបរបោះពួយល្បឿនលឿនមិនប្រយ័ត្ន បណ្ដាឲ្យរ៉េចង្កូតទៅបុកបង្គោលភ្លើងបំភ្លឺផ្លូវរបស់រដ្ឋ បណ្ដាលឲ្យដួលត្រេតដល់ដី រីឯរថយន្តរងការខូចខាតយ៉ាងដំណំនៅវេលាម៉ោងជាង៥ព្រឹក ថ្ងៃទី២៩ ខែវិច្ឆិការ ឆ្នាំ២០២៣ ត្រង់ចំណុចបណ្ដោយផ្លូវ១១៤ ស្ថិតក្នុងភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។
ប្រភពពីប្រជាពលរដ្ឋឲ្យដឹងថា៖ ក្រោយពីកើតមានរថយន្តសេរីទំនើប០១គ្រឿងម៉ាក Land cruiser មិនស្គាល់សេរីឆ្នាំ ពណ៍ស មានស្លាកលេខភ្នំពេញ៖ 2AS-0202 បើកបរដោយបុរសម្នាក់មិនស្គាល់អត្តសញ្ញាណ បានបុកបង្គោលភ្លើងបំភ្លឺដងផ្លូវរបស់រដ្ឋ បណ្តាលឲ្យរបើកដួលត្រេតដល់ដី ចំណែករថយន្តបង្កបានប្រឡាប់ផ្ងារជើងរងការខូចខាតយ៉ាងដំណំ រីឯម្ចាស់រថយន្ត ក្រោយពីបង្កហេតុបានរត់គេចខ្លួនបាត់ បន្សល់ទុករថយន្តនៅកន្លែងកើតហេតុ។
ក្រោយពីកើតហេតុការណ៍កម្លាំងជំនាញផែនចរាចរណ៍សង្កាត់ព្រែកថ្មី បានសហការជាមួយកម្លាំងជំនាញចរាចរណ៍ខណ្ឌច្បារអំពៅ ចុះពិនិត្យទីតាំងកើតហេតុធ្វើការវាស់វែងរង់ចាំឱ្យម្ចាស់រថយន្តបង្ករ ចេញខ្លួនមកដោះស្រាយជាមួយបង្គោលភ្លើងរបស់រដ្ឋ៕
