ជនសង្ស័យ២នាក់ ពាក់ព័ន្ធករណី លួចមានស្ថានទម្ងន់ទោស(ឆក់ទូរសព្ទ) ត្រូវរាជឣាវុធហត្ថ ចាប់ឃាត់ខ្លួនបញ្ជូនទៅតុលាការ
(បន្ទាយមានជ័យ)៖ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ចាប់ឃាត់ខ្លួនជនសង្ស័យ២នាក់ ពាក់ព័ន្ធករណីលួចមានស្ថានទម្ងន់ទោស(ឆក់ទូរសព្ទ)កាលពីវេលាម៉ោង២២និង០០នាទី ថ្ងៃទី២៣ ខែមេសា ឆ្នាំ២០២៤។ការឃាត់ខ្លួនជនសង្ស័យនេះបានធ្វើឡើងក្រោយពីកម្លាំងកងរាជអាវុធហត្ថដែលដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជឣាវុធហត្ថក្រុងប៉ោយប៉ែត កំពុងចុះល្បាតការពារសន្តិសុខ រក្សាសណ្ដាប់ធ្នាប់ជូនប្រជាពលរដ្ឋ ក្នុងភូមិសាស្រ្តក្រុង លុះមកដល់ចំណុចភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ក៏ស្រាប់តែប្រទះឃើញសកម្មភាពក្រុមជនសង្ស័យឆក់ទូរសព្ទពីនារីម្នាក់ ក្នុងខណ:ជនរងគ្រោះកំពុងជិ:ម៉ូតូដេញប្រផាប់ប្រភីងហើយបុកម៉ូតូក្រុមជនសង្ស័យ បណ្ដាលឱ្យដួល ស្របពេលនោះកម្លាំងបានជួយធ្វើឣន្តរាគមន៍ ដោយឃាត់ខ្លួនជនសង្ស័យបានតែម្ដង។
លោកវរសេនីយ៍ត្រី នួន នីណារ៉ូ បានប្រាប់ឱ្យដឹងថា បើតាមការរៀបរាប់របស់ជនរងគ្រោះឈ្មោះ សឹង្ហ ស្រីលាប ភេទស្រី ឣាយុ២១ឆ្នាំ មុខរបរ បុគ្គលិកកាស៊ីណូ បច្ចុប្បន្ន រស់នៅភូមិក្បាលស្ពាន១ សង្កាត់/ក្រុងប៉ោយប៉ែត បានឱ្យដឹងថា រូបខ្លួនបានជិ:ម៉ូតូម៉ាកហុងដាឃ្លិច ទៅបន្ទប់ជួលរបស់បងស្រីនៅម្ដុំភូមិមិត្តភាព សង្កាត់ប៉ោយប៉ែត ស្រាប់តែមានមនុស្សប្រុសចំនួន២នាក់ ពុំស្គាល់ឣត្តសញ្ញាណ បានជិ:ម៉ូតូម៉ាកហុងដាឌ្រីម ពណ៌ខ្មៅ ធ្វើសកម្មភាពឆក់យកទូរសព្ទ១គ្រឿង ម៉ាកឣាយហ្វូន១៣ ពណ៌ស ដែលខ្លួនទុកនៅក្នុងឃ្លុបម៉ូតូខាងមុខហើយគេចខ្លួន ពេលនោះខ្លួនបានជិ:ម៉ូតូដេញតាម ហើយបានបុកម៉ូតូជនសង្ស័យ បណ្ដាលដួល ទើបកម្លាំងសមត្ថកិច្ចមកដល់តែម្ដង។
លោកវរសេនីយត្រី នួន នីណារ៉ូ បានបញ្ជាក់ទៀតថា ជនសង្ស័យទាំង២នាក់ ១.ឈ្មោះ ស៊ី រីឆា ភេទប្រុស ឣាយុ១៨ឆ្នាំ បច្ចុប្បន្ន ស្នាក់នៅភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត និង២.ឈ្មោះ ស្រស់ ម៉េងស្រុង ភេទប្រុស ឣាយុ១៦ឆ្នាំ បច្ចុប្បន្ន ស្នាក់នៅភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ។ ក្នុងពេលឃាត់ខ្លួនជនសង្ស័យទាំង២នាក់ សមត្ថកិច្ចក៏បានដកហូតវត្ថុតាងរួមមាន ម៉ូតូចំនួន១គ្រឿង ម៉ាកហុងដាឌ្រីម ពណ៌ខ្មៅ ផលិតឆ្នាំ២០១៦(ផ្ដូរតែមឆ្នាំ២០២២)ដែលជាម៉ូតូរបស់ជនសង្ស័យជិ:ធ្វើសកម្មភាពប្រព្រឹត្តបទល្មើស និងទូរសព្ទរបស់ជនរងគ្រោះចំនួន០១គ្រឿង ហើយនាំមកមូលដ្ឋានកងរាជឣាវុធហត្ថក្រុងដើម្បីសួរនាំតាមនីតិវិធី។ ជនសង្ស័យទាំង២នាក់ ក្រោយពីកម្លាំងជំនាញមូលដ្ឋានកងរាជឣាវុធហត្ថក្រុងសួរនាំរួច បានឆ្លើយសារភាពថា ពួកខ្លួនពិតជាបានជិ:ម៉ូតូធ្វើសកម្មភាពឆក់ទូរសព្ទរបស់ជនរងគ្រោះពិតប្រាកដមែន។ ដោយផ្អែកលើសកម្មភាពជាក់ស្ដែងនិងមានវត្ថុតាង កម្លាំងជំនាញមូលដ្ឋានកងរាជឣាវុធហត្ថក្រុង បានកសាងសំណុំរឿងបញ្ជូនមកបញ្ជាការដ្ឋានកងរាជឣាវុធហត្ថខេត្តចាត់ការបន្តតាមនីតិវិធី ចំណែកវត្ថុតាងទូរសព្ទត្រូវបានប្រគល់ឱ្យម្ចាស់ដើមវិញហើយ។
លោកវរសេនីយ៍ឯក ម៉ែន ភិរម្យ មេបញ្ជាការរង កងរាជឣាវុធហត្ថខេត្ត ទទួលការងារស្រាវជ្រាវនិងបង្រាបបទល្មើស បានឱ្យដឹងថា ក្រោយពីពិនិត្យលើសំណុំរឿងរបស់មូលដ្ឋានកងរាជឣាវុធហត្ថក្រុងប៉ោយប៉ែត ឃើញថាជនសង្ស័យទាំង២នាក់ មានភាពស៊ីសង្វាក់គ្នាយ៉ាងជាក់លាក់នៃករណីលួចមានស្ថានទម្ងន់ បច្ចុប្បន្ន ជនសង្ស័យទាំ២នាក់ ត្រូវបានកម្លាំងការិយាល័យព្រហ្មទណ្ឌ បញ្ជាការដ្ឋានកងរាជឣាវុធហត្ថខេត្ត បញ្ជូនទៅតុលាការហើយនៅថ្ងៃទី២៥ ខែមេសា ឆ្នាំ២០២៤នេះ ដើម្បីចាត់ការបន្តតាមនិតិវិធី៕
