ឧបទ្ទវហេតុគ្រោះថ្នាក់ចរាចរណ៍ រវាងរថយន្តបុកម៉ូតូ បណ្តាលឲ្យស្ត្រីម្នាក់ស្លាប់ភ្លាមៗ ឯអ្នកបង្កហេតុរត់គេចខ្លួន
ខេត្តមណ្ឌលគិរី៖ស្ត្រីម្នាក់បានស្លាប់ភ្លាមៗ នៅនឹងកន្លែងកើតហេតុ ក្នុងហេតុការណ៍គ្រោះថ្នាក់ចរាចរណ៍ ដែលបង្កឡើងដោយរថយន្តបុកម៉ូតូ បង្កការភ្ញាក់ផ្អើលកាលពីថ្ងៃទី៨ ខែឧសភា ឆ្នាំ២០២២ ត្រង់ចំណុចផ្លូវបត់កោងចន្លោះគីឡូម៉ែត្រលេខ៩៨–៩៩ លើដងផ្លូវជាតិ៧៦ ស្ថិតក្នុងភូមិអណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ។អ្នកបើកបររថយន្ត ក្រោយពីបង្កហេតុ បណ្តាលឲ្យមានមនុស្សស្លាប់បានរត់គេចខ្លួនបាត់ស្រមោល។
បើតាមប្រភពព័ត៌មានពីកន្លែងកើតហេតុបានឲ្យដឹងថា ករណីគ្រោះថ្នាក់ចរាចរណ៍ខាងលើនេះ គឺបង្កឡើងដោយរថយន្តសាំយ៉ុង ពណ៌លឿង ពាក់ស្លាកលេខ ភ្នំពេញ2AV -4683 បើកបរដោយឈ្មោះ ផា គឹមឡេង ភេទប្រុស អាយុ១៧ឆ្នាំ ជនជាតិខ្មែរ មានទីលំនៅភូមិដោះក្រមុំ ក្រុងសែនមនោរម្យ ខេត្តមណ្ឌលគិរី បើកបរក្នុងទិសដៅបញ្ច្រាសទិសគ្នា លុះមកដល់ចំណុចកើតហេតុខាងលើ ក៏ទៅបុកនឹងម៉ូតូពេញទំហឹង បណ្តាលឱ្យស្លាប់ស្រ្តីម្នាក់ រីឯអ្នកបើកបររថយន្តបង្កហេតុបានរត់គេចខ្លួនបាត់ភ្លាមៗ។
ប្រភពបន្តស្រ្តីរងគ្រោះមានឈ្មោះអ៊ី ដានី អាយុ២៦ឆ្នាំ ជនជាតិខ្មែរ មានទីលំនៅ ភូមិចំការតែ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី បើកបរម៉ូតូម៉ាក់វ៉េវ ពណ៌ខ្មៅ ពាក់ស្លាកលេខមណ្ឌលគិរី1A-6385បានស្លាប់នៅនឹងកន្លែងកើតហេតុ។
ក្រោយពីកើតហេតុកម្លាំងនៃអធិការដ្ឋាននគរបាលស្រុកអូររាំង និងកម្លាំងជំនាញការិយាល័យចរាចរណ៍ខេត្ត បានធ្វើការវាស់វែង ត្រួតពិនិត្យសាកសព រួចធ្វើកំណត់ហេតុ ប្រគល់ឱ្យសាច់ញាតិក្រុមគ្រួសារយកទៅធ្វើបុណ្យតាមប្រពៃណី ៕
