ឃាត់ខ្លួនក្មេងទំនើងជាង៣០នាក់ យកទៅអប់រំ ក្រោយពីប្រើប្រាស់ម៉ូតូកែច្នៃបំពង់ស៊ីមាំងលាន់លឺខ្លាំងខុសលក្ខណះបច្ចេកទេស ធ្វើឲ្យរំខានដល់ប្រជាពលរដ្ឋ
(បន្ទាយមានជ័យ)៖ក្មេងទំនើងជាង៣០នាក់ ដែលបានធ្វើសកម្មភាពបង្ហោះម៉ូតូ និងប្រើប្រាស់ ម៉ូតូកែច្នៃបំពង់ស៊ីមាំងឲ្យលាន់លឺខ្លាំងខុសលក្ខណះបច្ចេកទេស ជិះរេចុះឡើងនៅតាមដងផ្លូវសាធារណៈ ធ្វើឲ្យរំខាន់ដល់ប្រជាពលរដ្ឋជារើយៗនោះ ត្រូវបានកម្លាំងអធិការដ្ឋាននគរបាលក្រុងសិរីសោភ័ណ ចុះបង្ក្រាបដោយឃាត់ខ្លួនក្មេងទំនើងបានជាបន្តបន្ទាប់សរុបចំនួន៣៣នាក់ រួមនឹងម៉ូតូចំនួន២៦គ្រឿងផងដែរ។
សមត្ថកិច្ចបានឲ្យដឹងថា ដោយអនុវត្តន៍តាមគោលការណ៍របស់លោកឧត្ថមសេនីយ៍ទោ សិទ្ធ ឡោះ ស្នងការនគរបាលខេត្តបន្ទាយមានជ័យ កម្លាំងអធិការដ្ឋាននគរបាលក្រុងសិរីសោភ័ណ បានចុះឃ្លាំមើលក្មេងទំនើងជិះម៉ូតូកែច្នៃបំពង់ស៊ីមាំងឲ្យលាន់លឺខ្លាំងខុសលក្ខណះបច្ចេកទេស ជិះរេចុះឡើង ធ្វើឲ្យរំខានដល់ប្រជាពលរដ្ឋ រយះពេលពីថ្ងៃ ចាប់ពីថ្ងៃទី០៩,១០ ខែមិថុនា ឆ្នាំ២០២២ ទើបបានជួបឈានដល់ការបង្ក្រាបនិងឃាត់ខ្លួនបានជាបន្តបន្ទាប់យកទៅអប់រំ។
សមត្ថកិច្ចបញ្ជាក់ថា ក្នុងករណីនេះកម្លាំងនគរបាលបានប្រើប្រាស់វិធានការអប់រំ ចំពោះជនទំនើង និងឲ្យជនទំនើងទាំងនោះដោះដូរបំពង់ម៉ូតូដែលកែច្នៃចេញ រៀបចំឲ្យត្រឹមត្រូវតាមលក្ខណះបច្ចេកទេស របស់ក្រុមហ៊ុនវិញ និងបានប្រើប្រាស់វិធានការច្បាប់ ដោយអនុវត្តន៍តាមអនុក្រិត្យ លេខ៣៩ ស្ដីពីការពិន័យអន្តរការចំពោះអំពើរល្មើស និងច្បាប់ចរាចរណ៍ផ្លូវគោក(ជំពូក៣,មាត្រា៦,ចំនុច៣ ត្រូវពិន័យ ១០០,០០០រៀល ល្មើសក្នុងចំនុច ក,ខ,គ) ចំពោះជនទំនើងដែលប្រើប្រាស់មធ្យោបាយល្មើសផ្ទាល់៕
