សកម្មជនមកពីគណបក្សផ្សេងៗ ចូលជួបសម្តែងការគួរសម និងស្នើសុំឯកឧត្តម ដួង តារា ចូលរួមរស់ជីវភាពនយោបាយជាមួយគណបក្សប្រជាជនកម្ពុជា
(កណ្តាល)៖ដោយមើលឃើញពីកាដឹកនាំដ៏ត្រឹមត្រូវ មានសមត្ថភាពពិតប្រាកដក្នុងការដឹកនាំ រក្សាបាននូវសុខសន្តិភាព បង្រួបបង្រួមជាតិ ការអភិវឌ្ឍន៍ប្រកបដោយចីរភាព របស់គណបក្សប្រជាជនកម្ពុជានោះ នៅព្រឹកថ្ងៃទី២០ ខែកុម្ភៈ ឆ្នាំ២០២៣ បងប្អូនប្រជាពលរដ្ឋដែលមកពីគណបក្សប្រឆាំង បានចូលជួបសម្តែងការគួរសម និងស្នើសុំឯកឧត្តម ដួង តារា រដ្ឋលេខាធិការទីស្តីការគណៈរដ្ឋមន្ត្រី និងជាជំនួយការផ្ទាល់សម្តេចតេជោ នាយករដ្ឋមន្ត្រី នៃកម្ពុជា រួមរស់ជីវភាពជាមួយគណបក្សប្រជាជនកម្ពុជា។ ក្នុងការជួបសំណេះសំណាលនេះបានធ្វើឡើងនាគេហដ្ឋានរបស់ឯកឧត្តមផ្ទាល់ស្ថិតនៅភូមិអរិយក្សត្រ សង្កាត់អរិយក្សត្រ ក្រុងអរិយក្សត្រ ខេត្តកណ្តាល។
ក្នុងនោះក៏មានការចូលរួមពីឯកឧត្តម ជីវ កត្តា អតីតប្រធានគណបក្ស ខ្មែរស្រលាញ់ជាតិ បច្ចុប្បន្នជាសមាជិកគណបក្សប្រជាជនកម្ពុជា និងជាទីប្រឹក្សារាជរដ្ឋាភិបាល, លោក ជា សំហុង ជំនួយការឯកឧត្តម ដួង តារា ,លោក ជា ឧត្តម ប្រធានគណបក្សខ្មែរស្រលាញ់ជាតិប្រចាំខេត្តព្រះវិហារ, លោកស្រី ឧត្តម ម៉ារ៉ានី ហេរញ្ញិក គណបក្សខ្មែរស្រលាញ់ជាតិប្រចាំខេត្តព្រះវិហារ ,លោកស្រី ហ៊ុ ផង់ សមាជិកគណបក្សខេត្តព្រះវិហារ, លោក ភន ភា ប្រធានគណបក្សខ្មែរស្រលាញ់ជាតិប្រចាំស្រុកសង្គមថ្មី, លោក នង វិន អនុប្រធានគណបក្សខ្មែរស្រលាញ់ជាតិប្រចាំស្រុកសង្គមថ្មី, លោក អាត់ ឡូញ ប្រធានគណបក្សខ្មែរស្រលាញ់ជាតិប្រចាំស្រុកគូលែន, លោក ច្រាត សុខ និងលោកស្រី រ៉ិត ភាណិត អតីតសមាជិកគណបក្សភ្លើងទៀន ដែលពេលនេះបានរួមរស់ជាមួយគណបក្សប្រជាកម្ពុជា។
នាឱកាសនោះឯកឧត្តម ដួង តារា បានផ្តល់អនុសាសន៍ជូនចំពោះបងប្អូនដែលបានចូលរួម គឺត្រូវតែមានភាពស្មោះត្រង់ហើយសូមជឿជាក់លើការដឹកនាំរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខ។ មានតែគណបក្សប្រជាជនកម្ពុជាទេដែលមានសមត្ថភាពពិតប្រាកដក្នុងការដឹកនាំ រក្សាបាននូវសុខសន្តិភាព បង្រួបបង្រួមជាតិ ការអភិវឌ្ឍន៍ប្រកបដោយចីរភាព។
ក្នុងវេលាដ៏មានតម្លៃនេះផងដែរ បងប្អូនដែលមកពីគណបក្សប្រឆាំងទាំងអស់ បានប្តេជ្ញាថា ក្រោយពេលដែលបញ្ចូលជាសមាជិកគណប្រជាជនកម្ពុជារួច ពួកគាត់នឹងខិតខំបំពេញការងារតាមមាគ៌ាដឹកនាំរបស់សម្ដេចតេជោនាយករដ្ឋមន្ត្រី និងគោរពតាមគោលការណ៍បទបញ្ជាផ្ទៃក្នុងរបស់បក្ស ព្រមទាំងខិតខំប្រឹងប្រែងពន្យល់បងប្អូនគណបក្សផ្សេងទៀត ដើម្បីមកចូលរួមជីវភាពជាមួយគណបក្សប្រជាកម្ពុជាផងដែរ៕
