រថយន្តម៉ាកស្តារិចបើកបរដោយបុរសជនជាតិថៃ និងម៉ូតូ ដឹកជញ្ជូនគ្រឿងឧបភោគ បរិភោគឲ្យភ្ញៀវ បុកគ្នាយ៉ាងពេញទំហឹង នៅខាងមុខកាស៊ីណូផ្កាយប្រាំ ក្រុងប៉ោយប៉ែត បណ្ដាលឱ្យបុរសម្នាក់រងរបស់ធ្ងន់ ដឹកបញ្ជូនទៅសង្គ្រោះនៅឯបន្ទីរពេទ្យភ្លាមៗ
ខេត្តបន្ទាយមានជ័យ៖ដោយសារកត្តាបើកបរខ្វះការប្រុងប្រយ័ត្ន ជាហេតុធ្វើឲ្យរថយន្តនិងម៉ូតូបុកគ្នាយ៉ាងពេញទំហឹង បណ្ដាលឱ្យបុរសម្នាក់រងរបួសធ្ងន់ ត្រូវបានក្រុមជួយសង្គ្រោះបឋមក្រុងប៉ោយប៉ែត ដឹកបញ្ជូនទៅសង្គ្រោះនៅឯមន្ទីរពេទ្យភ្លាមៗ នាវេលាម៉ោងជាង ៩ព្រឹក ថ្ងៃទី៩ ខែតុលា ឆ្នាំ ២០២៣ នៅចំណុចខាងមុខកាស៊ីណូផ្កាយប្រាំ ស្ថិតនៅក្នុងសង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនជួបគ្រោះថ្នាក់ចរាចរណ៍គេបានឃើញរថយន្តម៉ាកស្តារិចមួយគ្រឿងពណ៌ខ្មៅ ពាក់ស្លាកលេខ ភ្នំពេញ 2AW-3263 បើកបរដោយបុរសជនជាតិថៃ និងអ្នករួមដំណើរជាជនជាតិចិនម្នាក់ បានបើកបត់ក្នុងគោលបំណងចូលទិញឥវ៉ាន់នៅក្នុងម៉ាត ក៏ស្រាប់តែមានម៉ូតូម៉ាកឃ្លីក០៦ ដែលដឹកជញ្ជូនគ្រឿងឧបភោគ បរិភោគឲ្យភ្ញៀវដែលបើកបរដោយបុរសជនជាតិខ្មែរនោះ បានបើកបោះពួយយ៉ាងលឿនក្នុងទិសដៅពីផ្សាររាត្រីទឹកពុះ ក្រោយកាស៊ីណូផ្កាយប្រាំ លុះមកដល់ចំណុចកើតហេតុខាងលើ ក៏ស្រាប់តែបុកពេញទំហឹង បណ្ដាលឲ្យរងរបួសធ្ងន់ ចំណែកមធ្យោបាយធ្វើដំណើរទាំងពីរ រថយន្តបែកកញ្ចក់មួយផ្ទាំង រីឯម៉ូតូរងការខូចខាតយ៉ាងដំណាំ។
ពាក់ព័ន្ធករណីគ្រោះថ្នាក់ចរាចរណ៍នេះដែរបើតាមតៃកុងរថយន្តដែលជាជនជាតិថៃ បានឲ្យដឹងថា មុនកើតហេតុខ្លួនបានស៊ីញ៉ូហើយក៏បត់ចូល ក៏ស្រាប់តែម៉ូតូបើកបរក្នុងល្បឿនយ៉ាងលឿនបានបុកយ៉ាងពេញទំហឹងតែម្ដង ។តែទោះយ៉ាងនេះក្តីប្រជាពលរដ្ឋ ដែលបានឃើញហេតុការណ៍បានបញ្ជាក់ថា រថយន្តបង្កខាងលើបត់ចូលមិនបានស៊ីញ្ញូនោះទេ ក្រោយកើតហេតុទើបបានស៊ីញ៉ូ ។
តែទោះយ៉ាងណាក្តី ក្រោយពីកើតហេតុកម្លាំងនគរបាលជំនាញផ្នែកចរាចរណ៍ផ្លូវគោក បានចុះធ្វើការសម្រួលចរាចរណ៍ និងវាស់វែង រួចនាំយកមធ្យោបាយបង្កហេតុ យកទៅរក្សាទុកនៅអធិការដ្ឋាននគរបាលក្រុងប៉ោយប៉ែត រង់ចាំដោះស្រាយគ្នាជាក្រោយតាមនីតិវិធី៕
