ឯកឧត្ដម ប៉ែន បូណា អញ្ជើញបើកវគ្គតម្រង់ទិស ស្ដីពីប្រសិទ្ធភាព នៃការគ្រប់គ្រងព័ត៌មាន និងនាំពាក្យជូនរដ្ឋបាលខេត្តបន្ទាយមានជ័យ
ខេត្តបន្ទាយមានជ័យ៖នៅសាលាខេត្តបន្ទាយមានជ័យ នាថ្ងៃទី១៨ ខែមីនា ឆ្នាំ២០២៤ រដ្ឋបាលខេត្តបន្ទាយមានជ័យ បានបើកវគ្គតម្រង់ទិស ស្ដីពីប្រសិទ្ធភាព នៃការគ្រប់គ្រងព័ត៌មាន និងនាំពាក្យក្រោមអធិបតីភាពឯកឧត្ដម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាព អ្នកនាំពាក្យរាជអភិបាល ដែលមានការអញ្ជើញចូលរួមពីសំណាក់ឯកឧត្តមលោកជំទាវ អស់លោក លោកស្រី តំណាងមន្ទីរអង្គភាពពាក់ព័ន្ធរដ្ឋបាល ស្រុក ក្រុង ឃុំសង្កាត់។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យបានមានប្រសាសន៍ថា នៅក្នុងដំណើរការនៃការគ្រប់គ្រងដឹកនាំ របស់រដ្ឋបាលខេត្ត ស្រុក ក្រុង ឃុំសង្កាត់ ក៏ដូចជា នៅតាមបណ្ដាមន្ទីរអង្គភាពនានា ថ្វីត្បិតតែមាន ភាពប្រសើរឡើងពីមួយថ្ងៃទៅមួយថ្ងៃសមិទ្ធផលអភិវឌ្ឍន៍នានា មានការរីកចម្រើនដុះដាលលើគ្រប់វិស័យ គួរឲ្យមានវឌ្ឍនភាព ទន្ទឹមនឹងនេះក៏នៅមានបញ្ហាខ្លះដែលតែងតែកើតមាន ដែលមកពីភាពចន្លោះខ្វះខាត នៃការគ្រប់គ្រងព័ត៌មាន ការប្រមូលព័ត៌មាននិងការផ្តល់ព័ត៌មាន និងនាំពាក្យពុំបានត្រឹមត្រូវ ទៅជាហេតុនាំឲ្យមហាជនប្រជាពលរដ្ឋទូទៅខ្វះព័ត៌មាន ឬមានភាពស្រពេចស្រពិល និងមានទុទិដ្ឋិនិយម មកលើស្ថាប័នរាជរដ្ឋាភិបាល រីឯការបន្សាបឬក៏លុបបំបាត់ នូវព័ត៌មានក្លែងក្លាយ ព័ត៌មានមិនពិត ការឆបោកញុះញង់ផ្សេងៗ នៅមានកម្រិតនៅឡើយដែលមើលឃើញពីភាពចាំបាច់ ទេីបរដ្ឋបាលខេត្តបានគោរពស្នើសុំដល់អង្គភាពអ្នកនាំពាក្យរាជរដ្ឋាភិបាល ដើម្បីជួយបណ្ដុះបណ្ដាល ណែនាំតម្រង់ទៅដល់រដ្ឋបាលខេត្តមន្ទីរអង្គភាពស្រុកក្រុងឃុំសង្កាត់ចំនួន ១វគ្គនាថ្ងៃនេះ។
ឯកឧត្តម ប៉ែន បូណា បានមានប្រសាសន៍លើកឡើងថា នាពេលបច្ចុប្បន្ននេះតាមរយៈព័ត៌មានក្នុងបណ្ដាញសង្គម រួមមាន Facebook Tik tok ផ្សេងៗ យើងសង្កេតឃើញព័ត៌មានមួយចំនួនពិត និងមួយចំនួនទៀតមិនពិត ក្នុងភាពញុះញង់ព័ត៌មានក្លែងក្លាយបំពុលសង្គម ទៅឲ្យប្រជាពលរដ្ឋយើងមានការយល់ច្រឡំ ដូច្នេះហើយក្នុងនាមយើងជាអ្នក នាំពាក្យ ត្រូវទាមទារឲ្យមានការឈ្លាសវៃ តបតយ៉ាងឆាប់រហ័ស ព្រមទាំងស្រាយបំភ្លឺរាល់មន្ទិលរបស់ពល ប្រជាពលរដ្ឋនៅពេលមានព័ត៌មានក្លែងក្លាយ។ ចុងក្រោយឯកឧត្តម ប៉ែន បូណា បានធ្វើការផ្ដាំផ្ញើដល់អស់លោកលោកស្រី ដែលបានចូលរួមវគ្គតម្រង់ទិសប្រសិទ្ធភាពនៃការគ្រប់គ្រងព័ត៌មាន និងនាំពាក្យ ក្នុងឱកាសនេះសង្ឃឹមថា គ្រប់អង្គភាពទាំងអស់នឹងយកនូវចំណេះដឹងនិងបទពិសោធល្អៗ សម្រាប់យកទៅអនុវត្តក្នុងការគ្រប់គ្រងព័ត៌មាន អ្នកនាំពាក្យឲ្យមានប្រសិទ្ធភាពខ្ពស់៕
