ក្មេងទំនើង៦នាក់ ពាក់ព័ន្ធករណីកាន់កាប់ ឬដឹកជញ្ជូនអាវុធដោយគ្មានការអនុញាត ត្រូវអាវុធហត្ថចាប់ឃាត់ខ្លួនបញ្ជូនទៅតុលាការ
(បន្ទាយមានជ័យ)៖កម្លាំងមូលដ្ឋានកងរាជអាវុធហត្ថក្រុងសិរីសោភ័ណ បានទទួលព័ត៌មានពីប្រជាពលរដ្ឋថា មានក្មេងទំនើងមួយក្រុម មានគ្នាចំនួន០៦នាក់ ប្រមូលផ្ដុំគ្នាដោយមានកាំបិត និងដុំថ្ម ត្រៀមបង្កជម្លោះជាមួយក្រុមម្ខាងទៀត នៅចំណុចតារាងបាល់ទះ ស្ថិតក្នុងភូមិ១ សង្កាត់ព្រះពន្លា ក្រុងសិរីសោភ័ណ ។ ក្រោយពីទទួលបានព័ត៌មានភ្លាម លោកវរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុង បានដឹកនាំកម្លាំង ចុះដល់ទីតាំងខាងលើបានធ្វើការឃាត់ខ្លួនជនសង្ស័យដែលជាក្មេងទំនើងចំនួន៦នាក់ ១.ឈ្មោះ ឡៃ គណ្ណិត ភេទប្រុស អាយុ១៧ឆ្នាំ, ២.ឈ្មោះ អៀម ចៅវាំង ភេទប្រុស អាយុ១៧ឆ្នាំ, ៣.ឈ្មោះ រ៉ាហ៊ូ សាំយូអែល ហៅក្រៅ សាំ ភេទប្រុស អាយុ១៥ឆ្នាំ, ៤.ឈ្មោះ ឧត្តម សត្យា ហៅក្រៅ ញ៉ា ភេទប្រុស អាយុ១៤ឆ្នាំ, ៥.ឈ្មោះ ងួន សុជា ភេទប្រុស អាយុ១៧ឆ្នាំ, ៦.ឈ្មោះ ម៉ៅ ឃុនណារ៉ារី ភេទប្រុស អាយុ១៩ឆ្នាំ ។ ក្មេងទំនើងទាំង៦នាក់ គឺជាសមាជិកក្រុម MTមានឈ្មោះជាភាសាខ្មែរម៉ាក់តី ព្រមទាំង ដកហូតវត្ថុតាង កាំបិត និងដុំថ្ម រួចនាំទៅកាន់មូលដ្ឋានកងរាជអាវុធហត្ថក្រុងសិរីសោភ័ណ ដើម្បីសូរនាំនិងចាត់ការតាមនីតិវិធី។
លោកវរសេនីយ៍ត្រី សុខ ឡេង បានឱ្យដឹងថា ក្រោយឃាត់ខ្លួន និងសួរនាំរួច ជនសង្ស័យបានឆ្លើយសារភាពថា ក្រុមរបស់ពួកគេ គឺមានទំនាស់ ជាមួយក្រុម បេនឡាន និងក្រុម KPS (កំពង់ស្វាយ) គឺតែងតែដេញវាយ និងកាប់គ្នាឱ្យតែជួបគ្នា។ ហើយកាលពីថ្ងៃទី០៤ ខែធ្នូ ក្រុមខ្លួនកំពុងតែអង្គុយ នៅតារាងបាល់ ម៉ាក់ តី ដែលស្ថិតក្នុងភូមិ១ សង្កាត់ព្រះពន្លា ក្រុងសិរិសោភ័ណ ស្រាប់តែមានក្រុមបេនឡាន មានគ្នាចំនួន០៣នាក់ ជិះម៉ូតូចំនួន០២គ្រឿង បានទាញកាំបិតមកកាប់ទៅលើឈ្មោះ ថៃ ដែលជាសមាជិកក្រុមMT(ម៉ាក់ពី)របស់ខ្លួនតែមិនមានរងរបួសទេ។ ដោយផ្អែកលើចម្លើយសារភាព និងមានវត្ថុតាងជាក់ស្តែងកម្លាំងមូលដ្ឋានកងរាជអាវុធហត្ថក្រុងកសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើសបានឱ្យដឹងថា បច្ចុប្បន្ន ជនសង្ស័យត្រូវបានបញ្ជូនទៅសាលាដំបូងខេត្តហើយ នៅរសៀលថ្ងៃសៅរ៍ ទី០៧ ខែធ្នូ ឆ្នាំ២០២៤នេះ ដើម្បីអនុវត្តតាមនីតិវិធី៕
