សមាគមសម្ព័នយុវជនដើម្បីសន្តិភាព សាខាខេត្តបន្ទាយមានជ័យ បាននាំយកអំណោយចែកជូនប្រជាពលរដ្ឋដែលមានជីវភាពខ្វះខាតចំនួន ២៥គ្រួសារ នៅឃុំចុងកាល ស្រុកចុងកាល ខេត្តឧត្តរមានជ័យ
ខេត្តបន្ទាយមានជ័យ៖ ដោយមើលឃើញពីទុកលំបាករបស់បងប្អូនប្រជាពលរដ្ឋនោះ នាថ្ងៃទី១១ ខែធ្នូ ឆ្នាំ២០២៤ លោកបណ្ឌិត ឌីម សុខុន អគ្គលេខាធិការ សមាគមសម្ព័នយុវជនដើម្បីសន្តិភាព ,លោក ហង្ស រ៉ាត់ ប្រធាន សាខាខេត្តបន្ទាយមានជ័យ លោក គឹម សារឿន ប្រធាន សាខាខេត្តកំពង់ធំ តំណាងឲ្យឯកឧត្តម បណ្ឌិត សុខ ចាន់ភក្តី ប្រធាន សមាគមសម្ព័ន្ធយុវជនដើម្បីសន្តិភាព ហៅកាត់ថា (ស.ស.យ.ស) បានដឹកនាំសមាជិក សមាជិការ ចុះសួរសុខទុក និងនាំយកអំណោយមនុស្សធម៌ជាគ្រឿងឧបភោគបរិភោគចែកជូនប្រជាពលរដ្ឋដែលមានជីវភាពខ្វះខាតចំនួន ២៥គ្រួសារ នៅចំណុចទួលវិមាន ស្ថិតនៅក្នុងភូមិអាតោ ឃុំចុងកាល ស្រុកចុងកាល ខេត្តឧត្តរមានជ័យ ។អំណោយដែលត្រូវចែកជូនក្នុងមួយគ្រួសារទទួលបាន អង្ក,មីកញ្ចប់ និងកំប៉ុង,ទឹកក្រូច,ទឹកផ្លែឈើ,ទឹកត្រី,ប្រេងឆា,ស្កស,អំបិល,ថ្នាំដុះធ្មេញ,ច្រាសដុះធ្មេញ និងសាប៊ូផងដែរ។
នាឱកាសនោះដែរ លោកបណ្ឌិត ឌីម សុខុន បានមានប្រសាសន៍ពាំនាំនូវការផ្តាំផ្ញើសាកសួរសុខទុកពីសំណាក់ឯកឧត្តម បណ្ឌិត សុខ ចាន់ភក្តី ប្រធាន សមាគមសម្ព័ន្ធយុវជនដើម្បីសន្តិភាព ដែលជានិច្ចជាកាលឯកឧត្តមបណ្ឌិត ប្រធាន សមាគម តែងតែយកចិត្តទុកដាក់គិតគូពីសុខទុករបស់ប្រជាពលរដ្ឋ ទោះបីជាអំណោយទាំងនេះមិនគ្រប់គ្រាន់តាមតម្រូវការរបស់បងប្អូនប្រជាពលរដ្ឋក៏ពិតមែន ក៏ប៉ុន្តែជាចំណែកមួយកាត់បន្ថយការខ្វះខាតមួយគ្រា ហើយក៏ជាការចូលរួមចំណែកជាមួយប្រមុខរាជរដ្ឋាភិបាលកម្ពុជា ផងដែរ ។
ដោយមើលឃើញពីទឹកចិត្តរបស់ថ្នាក់ដឹកនាំរបស់សមាគម ក្រោយពីទទួលបានអំណោយប្រជាពលរដ្ឋបានសម្តែងអារម្មណ៍រំភើបក្តុកក្តួល និងបានថ្លែងអំណអគុណ និងគោរពជូនពរ ឯកឧត្តមប្រធាន និងសមាជិក សមាជិការ ទាំងអស់ ឲ្យជួបតែពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
