មេបញ្ជាការកងរាជអាវុធហត្ថខេត្តបន្ទាយមានជ័យ រួមនឹងមន្ត្រីក្រោមឱវាទ អញ្ជើញចូលរួមពិធីបំពាក់ឋានន្តរសក្តិ គ្រឿងឥស្សរិយយស ជូនយោធិននៃកងរាជអាវុធហត្ថសោធននិវត្តន៍ និងពិការ ត្រៀមនផ្ទេរចេញក្នុងឆ្នាំ២០២២ ក្រោមអធិបតីភាពនាយឧត្តមសេនីយ៍ សៅ សុខា
(បន្ទាយមានជ័យ )៖ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ រួមនឹងមេបញ្ជាការរង នាយសេនាធិការរង ប្រធានមន្ទីរទាំង៧ មេបញ្ជាការមូលដ្ឋានកងរាជអាវុធហត្ថ ក្រុង–ស្រុកទាំង៩ នៅព្រឹកថ្ងៃទី១៦ ខែវិច្ឆិកា ឆ្នាំ២០២២ អញ្ជើញចូលរួមពិធីសំណេះសំណាល បំពាក់ឋានន្តរសក្តិ គ្រឿងឥស្សរិយយស ជូនយោធិននៃកងរាជអាវុធហត្ថសោធននិវត្តន៍ និងពិការ ត្រៀមផ្ទេរចេញក្នុងឆ្នាំ២០២២ ចំនួន១១នាក់ នៃបញ្ជាការដ្ឋានកងរាជអាវុធហត្ថខេត្ត ក្រោមអធិបតីភាពដ៏ខ្ពង់ខ្ពស់ នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស តាមរយៈប្រព័ន្ធបញ្ជូនរូបភាព និងសម្លេង ( VIDEO CONFERENCE ) ។
ឆ្លៀតនាឱកាស នោះដែរលោកឧត្តមសេនីយ៍ត្រី បោន ប៊ិន ក៏បានសំណេះសំណាល និងបានរំលឹកពីវរៈភាពដ៏អង់អាចក្លាហានរបស់យោធិននៃកងរាជអាវុធហត្ថខេត្ត ចូលសោធននិវត្តន៍ និងពិការ ដែលបានពលីកម្មយ៉ាងធំធេងក្នុងបុព្វហេតុការពារជាតិមាតុភូមិ។លោកឧត្តមសេនីយ៍ត្រី បោន ប៊ិន ក៏បានបញ្ជាក់ថា ដោយមានការយកចិត្តទុក្ខដាក់ពីលោកនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស បើទោះជាបីជាបងប្អូនយោធិនចូលនិវត្តន៍យ៉ាងណាក៏ដោយ ក្នុងនាមអាវុធហត្ថ នៅតែជាគ្រួសារតែមួយ និងនៅបន្តគិតគូរពីសុខទុក្ខរបស់បងប្អូនជានិច្ច ដោយមិនទុកបងប្អូនចោលឡើយ។
បន្ទាប់ពីបំពាក់ឋានន្តរសក្តិ គ្រឿងឥស្សរិយយស ជូនយោធិននៃកងរាជអាវុធហត្ថសោធននិវត្តន៍ចំនួន០៨រូប និងពិការ ចំនួន០៣រូប នាយឧត្តមសេនីយ៍ សៅ សុខា ក៏បានឧបត្ថម្ភ ថវិកាលើកទឹកចិត្ត ជូនយោធិន ក្នុងម្នាក់៥០ម៉ឺនរៀល ព្រមជាមួយគ្នានោះចំពោះយោធិន នៃកងរាជអាវុធហត្ថសោធននិវត្តន៍ និងពិការ នៅក្នុងបញ្ជាការដ្ឋានអាវុធហត្ថខេត្តបន្ទាយមានជ័យទាំង១១រូប លោកឧត្តមសេនីយ៍ត្រី បោន ប៊ិន ក៏បានចូលរួមឧបត្ថម្ភថវិកាលើកទឹកចិត្ត ក្នុងម្នាក់ ៤០ម៉ឺនរៀល ផងដែរ៕
