ក្រុមការងារសាខាកាកបាទក្រហមកម្ពុជាខេត្តបន្ទាយមានជ័យ ចុះសួរសុខទុក្ខ និងនាំយកអំណោយចែកជូនដល់អ្នកផ្ទុកមេរោគអេដស៍ ក្នុងឱកាសទិវាពិភពលោកប្រយុទ្ធនិងជំងឺអេដស៍ ១ធ្នូ ២០២២
ខេត្តបន្ទាយមានជ័យ៖ឯកឧត្តម អ៊ុំ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ ព្រមទាំងលោកជំទាវ ជ័យ ណារី អ៊ុំ រាត្រី អនុប្រធានកិត្តិយសសាខា បានដឹកនាំក្រុមការងារសាខា អនុសាខា ក្រុម កក្រក សង្កាត់ អ្នកស្ម័គ្រចិត្ត និងយុវជន កក្រក បានចុះសួរសុខទុក្ខ
និងនាំយកអំណោយមនុស្សធម៌របស់សាខាទៅចែកជូនដល់អ្នកផ្ទុកមេរោគអេដស៍ កាលពីរសៀលថ្ងៃទី១២ ខែធ្នូ ឆ្នាំ២០២២ ក្នុងឱកាសទិវាពិភពលោកប្រយុទ្ធ និងជំងឺអេដស៍១ធ្នូ ឆ្នាំ២០២២ ក្រោមប្រធានបទ“ធ្វើអោយមានសមភាព“។
ពិធីនេះបានប្រារព្ធធ្វើឡើងនៅបរិវេណអនុវិទ្យាល័យអង្គាបុស្ស ស្ថិតនៅក្នុងសង្កាត់កោះពងសត្វ ក្រុងសិរីសោភ័ណ ដែលមានអ្នកទទួលផលចំនួន៤៣នាក់ មកពី ២សង្កាត់ ក្នុងក្រុងសិរីសោភ័ណ ក្នុងនោះមកពីសង្កាត់កោះពងសត្វចំនួន ១៧នាក់ និងមកពីសង្កាត់ភ្នៀតចំនួន២៦នាក់។
ក្នុងឱកាសសាកសួរសុខទុក្ខនោះដែរ ឯកឧត្តមប្រធានបាននាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំតំបន់អាស៊ី ប៉ាស៊ីហ្វិក ឆ្លើយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា។ ម៉្យាងវិញទៀតឯកឧត្តមប្រធានក៏បានចូលរួមលើកទឹកចិត្តដល់អ្នកផ្ទុកមេរោគទាំងអស់កុំអោយអស់សង្ឃឹមក្នុងជីវិត ត្រូវប្រឹងប្រែងថែរក្សាសុខភាពអោយបានល្អប្រសើរ ព្រោះក្នុងរយៈពេលប៉ុន្មានឆ្នាំកន្លងមកនេះរាជរដ្ឋាភិបាល និងកាកបាទក្រហមកម្ពជាមានយុទ្ធសាស្រ្តកាត់បន្ថយ និងលប់បំបាត់ជំងឺអេដស៍អោយអស់ក្នុងរយៈពេលប៉ុន្មានឆ្នាំទៀតនេះ។
អំណោយដែលសាខាកាកបាទក្រហមកម្ពុជាខេត្ត នាំមកនាពេលនេះក្នុងមួយនាក់ៗទទួលបាន អង្ករ២៥គីឡូក្រាម, មី១កេស, ត្រីខ១យួរ, ទឹកត្រី៣ដប, ប្រេងឆា១ដប, ប្រេងកូឡា១ដប, ទឹកដោះគោឆៅ១ឡូតិ៍, ទឹកដោះគោខាប់២កំប៉ុង, ទឹកសណ្តែក១យួរ, ស្ករស២គីឡូក្រាម, នំប្រៃ១ថង់, អាវយឺតកមូល៥, ជែលលាងសម្អាតដៃ៤ដប និង ថវិកាមួយចំនួនផងដែរ៕
