អង្គការគ្រួសារកុមារអភិវឌ្ឍន៍(FRA)កោះតៃវ៉ាន់ ប្រគេននិងផ្ដល់អាហាររូបកណ៍ដល់សមណនិស្សិត និងនិស្សិតចំនួន៣៨អង្គ/នាក់ នៅពុទ្ធិកវិទ្យាល័យ សម្ដេចជាស៊ីមក្រុងសិរីសោភ័ណ
ខេត្តបន្ទាយមានជ័យ៖សមណៈនិស្សិត និងនិស្សិតចំនួន ៣៨ អង្គ/នាក់ ដែលកំពុងសិក្សាមានជីវភាពខ្វះខាត ត្រូវបានអង្គការគ្រួសារកុមាអភិវឌ្ឍ ហៅកាត់FRA នៃកោះតៃវ៉ាន់ បានប្រគេននឹងផ្តល់នូវអាហារូបករណ៍នៅព្រឹកថ្ងៃទី២០ ខែធ្នូ ឆ្នាំ២០២២ នៅពុទ្ធិកវិទ្យាល័យ សម្ដេចជាស៊ីមក្រុងសិរីសោភ័ណ ខេត្តបន្ទាយមានជ័យ ក្នុងមួយអង្គ/នាក់ទទួលបាន ៥០០ដុល្លារសហរដ្ឋអាមេរិក សម្រាប់បន្តនៃការសិក្សាពីឆ្នាំ២០២៣។
លោកស្រី យ៉ាំង អួយលីន ដែលជានាយិកាអង្គការគ្រួសារកុមារអភិវឌ្ឍន៍ ប្រចាំនៅកម្ពុជាបានមានប្រសាសន៍បញ្ជាក់ផងដែរថា ថវិកាទាំងអស់ដែលអង្គការ បានប្រគល់ដល់សមណៈសិស្ស និស្សិតនាពេលនេះ គឺបានមកពីការកៀងគររកមូលនិធិពីសប្បុរសជននានា ដែលរស់នៅលើទឹកដីនៃកោះតៃវ៉ាន់ ដែលគាត់មានសន្ដានចិត្តអាណិតស្រឡាញ់ដល់ប្រជាជនកម្ពុជា ពិសេសគឺវិស័យសិក្សាអប់រំ ដែលជាវិស័យអាទិភាពដ៏មានសារៈសំខាន់សម្រាប់បង្កើតនូវធនធានមនុស្ស។
លោកស្រីនាយិកា បានបន្តថា ប្រទេសមានធនធានមនុស្សច្រើន ជាប្រទេសដែលមានការរីកចម្រើនខ្លាំង ផ្ទុយទៅវិញបើខ្វះនូវធនធានមនុស្សប្រទេសនោះនិងខ្សត់ខ្សោយជាក់ជាពុំខាន ដូចនេះតម្រូវឲ្យយើងទាំងអស់គ្នា ខិតខំរៀនសូត្រឲ្យដល់ថ្នាក់កម្រិតឧត្តមដើម្បីយកនូវចំណេះដឹង មកបម្រើគ្រួសារនិងប្រទេសជាតិ។លោកស្រីបន្តថា លោកស្រីនឹងខិតខំស្វែងរកថវិកាដើម្បីផ្គត់ផ្គង់ដល់សាមណសិស្ស និស្សិតជាបន្តបន្ទាប់ទៀតរៀងរាល់ឆ្នាំ។
លោក បៀវ ថាន ប្រធានមន្ទីរធម្មការនិងសាសនាខេត្តបន្ទាយមានជ័យបានសម្តែងនូវអំណរគុណយ៉ាងជ្រាលជ្រៅចំពោះលោកស្រីនាយិកា ដែលតែងតែយកចិត្តទុកដាក់ទៅឧបត្ថម្ភដល់សាមណសិស្សនិស្សិត ដែលមានជីវភាពខ្វះខាតលើការសិក្សា នេះគឺជាទឹកចិត្តសប្បុរសធម៌ដ៏ថ្លៃថ្លាស្ដែងឲ្យឃើញពីការគិតគូររបស់លោកស្រី ប្រកបដោយទឹកចិត្តស្មោះសនិងក្ដីអាណិតស្រឡាញ់ ចំពោះជនជាតិខ្មែរជាពិសេសព្រះសង្សដែលកំពុងសិក្សារៀនសូត្រនៅសាលាពុទ្ធិកសិក្សាក៏ដូចជាគ្រឹះស្ថានសិក្សានានា៕
