អាវុធហត្ថ ខេត្តបន្ទាយមានជ័យ បញ្ជូនជនសង្ស័យម្នាក់ ទៅតុលាការពាក់ព័ន្ធករណី លួចគាស់ផ្ទះប្រជាពលរដ្ឋ នៅក្រុងប៉ោយប៉ែត
ខេត្តបន្ទាយមានជ័យ៖ជនសង្ស័យម្នាក់ ដែលជាប់ពាក់ព័ន្ធករណីលួច ដែលបានប្រព្រឹត្តកាលពីវេលាម៉ោង២១និង០០នាទី ថ្ងៃទី១៨ ខែធ្នូ ឆ្នាំ២០២២ នៅចំណុចភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ត្រូវកម្លាំងមូលដ្ឋានកងរាជអាវុធហត្ថក្រុងប៉ោយប៉ែត ចាប់ឃាត់ខ្លួនកាលពីវេលាម៉ោង១០និង៤៣នាទី ថ្ងៃទី១៩ ខែធ្នូ ឆ្នាំ២០២២ បន្ទាប់ពីទទួលបានពាក្យបណ្តឹងពីជនរងគ្រោះឈ្មោះ ឯក រ៉ូ ភេទប្រុស អាយុ២៨ឆ្នាំ ជនជាតិខ្មែរ បច្ចុប្បន្នស្នាក់នៅចំណុចខាងលើ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឱ្យដឹងថា ជនសង្ស័យមានឈ្មោះ ឌី ម៉ូវ ភេទប្រុស អាយុ១៨ឆ្នាំ ជនជាតិខ្មែរ បច្ចុប្បន្នស្នាក់នៅភូមិបឹងជង្រុក ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។
លោកវរសេនីយ៍ត្រី នួន នីណារ៉ូ បន្តថា ៖ កាលពីវេលាម៉ោង២១និង០០នាទីថ្ងៃទី១៨ ខែធ្នូ មានករណីលួចគាស់បន្ទប់ជួលមួយកន្លែងនៅម្ដុំនាគទិព្វ ពេលគាស់បន្ទប់បានហើយ ជនសង្ស័យ បានចូលទៅក្នុងបន្ទប់ជួលតែគ្មានសម្ភារៈលួច ក៏បានដើរចេញមកវិញ ក៏ត្រូវបានម្ចាស់ផ្ទះមកទាន់ហើយប្តឹងអាវុធហត្ថឱ្យឃាត់ខ្លួនភ្លាមៗតែម្តង។ក្រោយពីឃាត់ខ្លួន កម្លាំងមូលដ្ឋានកងរាជអាវុធហត្ថ ក្រុង បានសួរនាំជនសង្ស័យ បានសារភាពថា រូបខ្លួនពិតជា បានធ្វើសកម្មភាពលួចគាស់ផ្ទះរបស់ជនរងគ្រោះពិតប្រាដងមែន។ ដោយផ្អែកចម្លើយសារភាព និងមានវត្ថុតាង ជនសង្ស័យ ត្រូវបានបញ្ជូនមកកាន់បញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើស បានឱ្យដឹងថា បច្ចុប្បន្ន ជនសង្ស័យត្រូវបានកម្លាំងជំនាញ កងរាជអាវុធហត្ថខេត្ត បញ្ជូនទៅសាលាដំបូងខេត្តហើយនៅព្រឹកថ្ងៃអង្គារ ទី២០ ខែធ្នូ ឆ្នាំ២០២២ ដើម្បីចាត់ការបន្តតាមនិតិវិធី៕
