បុរសល្មោភកាមម្នាក់ ត្រូវនគរបាលក្រុងប៉ោយប៉ែត ចាប់ឃាត់ខ្លួន ក្រោយពីទទួលបានពាក្យបណ្តឹងពីជនរងគ្រោះ ពាក់ព័ន្ធករណីចាប់រំលោភប្អូនថ្លៃ
ខេត្តបន្ទាយមានជ័យ៖បន្ទាប់ពីទទួលបានពាក្យបណ្តឹងពីជនរងគ្រោះ ពាក់ព័ន្ធករណីបុរសល្មោភកាមម្នាក់ ព្យាយាមចាប់រំលោភប្អូនថ្លៃរបស់ខ្លួនមិនបានសម្រេច បែកការណ៍ព្រោះប្រពន្ធមកទាន់ ត្រូវកម្លាំងនគរបាលក្រុងប៉ោយប៉ែត ចាប់ឃាត់ខ្លួនសួរនាំ ។
នគរបាលប៉ុស្តិ៍ប៉ោយប៉ែត បានឲ្យដឹងថា យោងការរៀបរាប់ក្នុងពាក្យបណ្តឹង ក្មេងស្រីរងគ្រោះឈ្មោះ ឡ ម.ថ.ន រស់នៅភូមិទំនប់ក៥ សង្កាត់/ក្រុងប៉ោយប៉ែត បានអះអាងថា ឈ្មោះ សូយ សី ភេទប្រុស អាយុ៣៣ឆ្នាំ បានធ្វើសកម្មភាព ស្ទាបអង្អែលប្រដាប់ភេទ (ប្រទូសគេខ្មាស់) ខ្លួនជាច្រើនលើកនៅក្នុងបន្ទប់ កាលពីថ្ងៃទី២១ ខែធ្នូ ឆ្នាំ២០២២ វេលាម៉ោង៩និង០០នាទី ពេលនោះបងថ្លៃរបស់នាង បានព្យាយាមអោបថើបបើតមាត់នាង ហើយនាងបានព្យាយាមរើបំរ៉ាស់និងចាប់ដៃ រុញច្រានចេញពីបន្ទប់។ ក្រោយមកនៅថ្ងៃទី២២ ខែធ្នូ ឆ្នាំ២០២២ វេលាម៉ោង៩យប់ ខណះពេលដែលនាងកំពុងដេកក្នុងបន្ទប់ បងថ្លៃប្រុសឈ្មោះ សូយ សី បានដើរពីផ្ទះរបស់ខ្លួនរួចមកលបលួចចូលក្នុងបន្ទប់របស់នាងម្តងទៀត ដោយបានចាប់អោប ច្របាច់ដោះ និងបានលូកដៃចូលក្នុងខោស្ទាបអង្អែលប្រដាប់ភេទនាង ហើយនិយាយថា បងស្រលាញ់អូន ពេលនោះនាងបានព្យាយាមរើបំរ៉ាស់ និងរុញច្រាន តែរើមិនរួច សំណាងល្អបងស្រីបង្កើតរបស់នាងឈ្មោះ ឡោះ ម៉ារីនី ដើរមកបើកទ្វារបន្ទប់ ក៏ស្រាប់តែឃើញប្ដីគាត់ឱបពីក្រោយ ក៏ចាប់អូសទៅក្រៅផ្ទះហើយជេរវ៉ៃឈ្លោះគ្នា ។នាងបញ្ជាក់ថា រឿងនេះខ្លួនក៏ធ្លាប់ប្រាប់បងស្រីដែរ ពេលនេះគាត់បានឃើញច្បាស់ផ្ទាល់ភ្នែកទើបសម្រេចប្តឹង។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹង នៅថ្ងៃទី២៥ ខែធ្នូ ឆ្នាំ២០២២ថា នៅចំពោះមុខសមត្ថកិច្ចជនសង្ស័យ សូយ សី បានសារភាពថា រូបគេពិតជាបានប្រព្រឹត្តដូច្នោះមែន។ យោងបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ក្រោយសួរនាំជនសង្ស័យត្រូវបានបញ្ជូនទៅ ការិយាល័យនគរបាលប្រឆាំងការជួញដូរមនុស្ស និងការពារអនីតិជន ដើម្បីកសាងសំណុំរឿងបញ្ជូនទៅតុលាការចាត់តាមនិតិវិធីបន្ត៕
