កងកម្លាំងត្រូវតែឆ្លងកាត់វគ្គហ្វឹកហាត់យកជំនាញមកថែរក្សាសន្តិសុខ សណ្តាប់ធ្នាប់ ជូនប្រជាពលរដ្ឋ និងប្រទេសជាតិ
(កំពង់ចាម)៖ថ្លែងក្នុងពិធីសំណេះសំណាល និងជូនដំណើរយោធិន នៃកងរាជអាវុធហត្ថខេត្តកំពង់ចាម ដែលទើបជ្រើសរើសថ្មី ចំនួន៤០នាក់ ទៅហ្វឹកហ្វឺន នៅភ្នំជុំរាយ នាព្រឹកថ្ងៃទី១៧ ខែមេសា ឆ្នាំ២០២៣ នៅទីបញ្ជាការដ្ឋានកងរាជអាវុធហត្ថខេត្តកំពង់ចាម ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណៈបញ្ជាការឯកភាពខេត្ត បានមានប្រសាសន៍ថា កងកម្លាំងត្រូវតែឆ្លងកាត់វគ្គហ្វឹកហាត់យកចំណេះ ជំនាញមកថែរក្សាសន្តិសុខ សណ្តាប់ធ្នាប់ ជូនប្រជាពលរដ្ឋ និងប្រទេសជាតិ។
ជាមួយគ្នានោះដែរឯកឧត្តម អភិបាលខេត្ត បានបញ្ជាក់ថា កងកម្លាំងយោធិន នៃកងរាជអាវុធហត្ថទាំង ៤០នាក់ ដែលត្រូវទៅហ្វឹកហ្វឺនរយៈពេល ១ឆ្នាំ សូមឱ្យកម្លាំងទាំងអស់ធ្វើការហ្វឹកហាត់ សិក្សារៀនសូត្រ ដោយយកចិត្តទុកដាក់ឲ្យបានចប់ ទៅតាមកម្មវិធីសិក្សា ដើម្បីយកចំណេះជំនាញទាំងនោះ មកបម្រើផលប្រយោជន៍ដល់ប្រជាពលរដ្ឋ និងប្រទេសជាតិ ។បន្ទាប់ពីឆ្លងកាត់ការហ្វឹកហ្វឺនរយៈពេលមួយឆ្នាំ កងកម្លាំងទាំង ៤០នាក់ នេះ និងក្លាយទៅជាមន្ត្រីនគរបាលយុត្តិធម៌ ដោយសារការហ្វឹកហ្វឺននោះ រៀនទាំងយុទ្ធសាស្ត្រ, វិធីសាស្រ្ត , ការប្រើប្រាស់អាវុធយុទ្ធភណ្ឌ និងបន្តសិក្សាអំពីជំនាញច្បាប់ ផងដែរ ដើម្បីឲ្យមន្ត្រីយើង ចេះកសាងសំណុំរឿងបញ្ជូនទៅតុលាការ ។
ក្នុងឱកាសនោះដែរ អភិបាលខេត្តកំពង់ចាម ក៏បាននាំយកអំណោយសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ផ្ដល់ជូនដល់កម្លាំងយោធិននៅកងរាជអាវុធហត្ថទាំង ៤០នាក់ ក្នុងម្នាក់ៗទទួលបាន ៖ មី ២កេស , ត្រីខកំប៉ុង ២យួរ , ក្រម៉ា ១ , និងថវិកាចំនួន ២០ម៉ឺនរៀល៕
