គណៈបញ្ជាការឯកភាព ខេត្តបន្ទាយមានជ័យ បន្តយុទ្ធនាការដាំដើមឈើ នៅព្រៃលិចទឹកតំបន់៣ បឹងទន្លេសាប
ខេត្តបន្ទាយមានជ័យ៖នាថ្ងៃទី០៦ ខែកុម្ភៈ ឆ្នាំ២០២២ គណៈបញ្ជាកាឯកភាពខេត្តបន្ទាយមានជ័យ ដឹកនាំដោយឯកឧត្តម អ៊ុំ រាត្រី ប្រធានគណៈបញ្ជាការឯកភាពខេត្ត និងជាអភិបាលខេត្ត ឯកឧត្តម ខេង ស៊ុំ ប្រធានក្រុមប្រឹក្សាខេត្ត មេបញ្ជាការ/រង ប្រធាន/អនុប្រធានមន្ទីរ អង្គភាព ស្នងការរង មន្ត្រីរាជការស៊ីវិល និងយុវជន ជាង៥០០នាក់ បានបន្តយុទ្ធកាដាំកូនឈើចម្រុះលើកទី៧ បានចំនួន៣.១០០ដើម នៅតំបន់៣ បឹងទន្លេសាប នៅ២គោលដៅ នៅចំណុចរហាលតាឡុងភូមិស្រណាល និងភូមិដូនឡឹកក្នុងឃុំសំបួរ ស្រុកមង្គលបូរី ។
សម្រាប់កូនឈើ៣.១០០ដើម/គ្រាប់ ដែលត្រូវបានយកមកដាំនោះរួមមាន៖ដើមឬស្សី ១.០០០ដើម ,រាំងទឹក ៦០០ដើម និងគ្រាប់ត្នោត១.៥០០គ្រាប់។បូកនឹង៦លើកមកហើយ ការដាំកូនឈើ គ្រាប់ត្នោតបានជាង១៦.០០០ដើម/គ្រាប់។
នាឱកាសនោះឯកឧត្តម អ៊ុំ រាត្រី បានថ្លែងអគុណ ចំពោះការចូលរួមយ៉ាងសស្រាក់សស្រាំរបស់ថ្នាក់ដឹកនាំខេត្ត មន្ត្រីរាជការ មន្ទីរអង្គភាព កងកម្លាំងប្រដាប់អាវុធទាំងអស់ អាជ្ញាធរដែនដីគ្រប់ថ្នាក់ យុវជន ដែលបានចូលរួមចំណែកដាំឈើឡើងវិញ ដើម្បីការពារធនធានធម្មជាតិ ព្រៃលិចទឹកសាបរបស់យើង តាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
ឯកឧត្តមបញ្ជាក់ថា: ការដាំកូនឈើឡើងវិញនេះ គឺដើម្បីបង្ហាញពីការចូលរួមទាំងអស់គ្នា ក្នុងការចូលរួមទប់ស្កាត់ការកាប់រានទន្ទ្រានខុសច្បាប់ លើដីព្រៃលិចទឹកតំបន់៣ នៃទំនាបបឹងទន្លេសាប៕
