បុរសជាងសំណង់ម្នាក់ ត្រូវរថយន្តកុងតឺន័ររបស់ថៃ កិនចេញខួរ រួចបើកគេចត្រូវសមត្ថកិច្ចចាប់បានភ្លាមៗ នៅក្រុងប៉ោយប៉ែត
ខេត្តបន្ទាយមានជ័យ៖ ពិតជាគួរឲ្យរន្ធត់ណាស់ បុរសជាជាងសំណង់ម្នាក់ ត្រូវរថយន្តកុងតឺន័ររបស់ជនជាតិថៃ បុកកិនចេញខួរ បណ្ដាលឲ្យស្លាប់ភ្លាមៗនៅនឹងកន្លែងបង្ករការភ្ញាក់ផ្អើល រួចរថយន្តបង្កបើកគេចខ្លួន ក៏ត្រូវសមត្ថកិច្ចតាមចាប់បានភ្លាមៗ។ ហេតុការណ៍ដ៏គួរឲ្យរន្ធត់នេះបានកើតឡើងនៅវេលាម៉ោងជិត ៦ល្ងាច ថ្ងៃទី០៤ ខែមិថុនា ឆ្នាំ២០២៣ នៅលើកំណាត់ផ្លូវជាតិលេខ៥ ត្រង់ចំណុចផ្លូវចូលស្តង់តាងួន ស្ថិតនៅក្នុងភូមិគីឡូម៉ែត្រលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
បើតាមការឲ្យដឹងពី ឈ្មោះ សាន មុំ (ហៅទូច) អាយុ៣៧ឆ្នាំ ត្រូវជាប្រពន្ធជនរងគ្រោះបានឲ្យដឹងថា ជនរងគ្រោះមានឈ្មោះ សេង (ហៅ ក្តាម) អាយុ៤៩ឆ្នាំ មុខរបរកម្មករសំណង់ ស្រុកកំណើតនៅខេត្តបាត់ដំបង មានកូនចំនួន៤នាក់ ស្រី៣នាក់ ស្នាក់នៅផ្ទះជួលបច្ចុប្បន្ន ក្នុងបុរី ធីធី ស្ថិតក្នុងភូមិអូជ្រៅ សង្កាត់អូរជ្រៅ ក្រុងប៉ោយប៉ែត ។
ប្រពន្ធជនរងគ្រោះបន្តថា ថ្ងៃនេះពោលគឺថ្ងៃកើតហេតុជនរងគ្រោះជា(ប្តី)បានសម្រាកពីការងារចេញដើរបាត់ពីផ្ទះមួយថ្ងៃទៅហើយ លុះមកដល់វេលាកើតហេតុទើបទទួលបានដំណឹងថា ត្រូវរថយន្តកិនស្លាប់ ធ្វើឲ្យខ្លួនរន្ធត់រកពាក្យអ្វីនិយាយពុំបាន ។
ពាក់ព័ន្ធករណីគ្រោះថ្នាក់ចរាចរណ៍ដ៏រន្ធត់នេះដែរ បើតាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តធុនធំប្រភេទដឹកទូកុងតឺន័ររបស់ថៃ បើកបរក្នុងទិសដៅពីលិចទៅកើត។ចំណែកជនរងគ្រោះបើកបរម៉ូតូ ពីកើតទៅលិចពោលគឺបញ្ច្រាសទិសគ្នា លុះមកដល់ចំណុចកើតហេតុខាងលើមិនដឹងជាយ៉ាងម៉េចនោះទេ ក៏ត្រូវបានរថយន្តដឹកទូកុងតឺន័ររបស់ជនជាតិថៃ បុកកិនបណ្ដាលឲ្យធ្លាយខួរចេញមកក្រៅយ៉ាងរន្ធត់ ក្រោយពីកើតហេតុភ្លាមរថយន្តបង្កបានព្យាយាមបើកគេច ភ្លាមនោះកម្លាំងអធិការដ្ឋាននគរបាលក្រុងប៉ោយប៉ែត បានស្ទាក់ឃាត់បានភ្លាមៗផងដែរ ។
ក្រោយពីកើតហេតុកម្លាំងសមត្ថកិច្ចបានចុះជួយអន្តរាគមន៍ភ្លាមៗ ដោយសម្រួលចរាចរណ៍ជៀសវាងការកកស្ទះ និងធ្វើការវេចខ្ចប់សាកសពដាក់លើរថយន្តផ្ទាល់ខ្លួនរបស់លោក នួន នីគីដា ដឹកយកទៅដាក់នៅក្នុងវត្តថ្មី ក្នុងក្រុងប៉ោយប៉ែត ដើម្បីរងចាំសាច់ញាតិមកទទួលធ្វើបុណ្យតាមប្រពៃណី ។
សូមបញ្ជាក់ផងដែរថា លោក នួន នីគីដា គឺជាអាជីវករមួយរូបដែលតែងតែជួយខាងផ្នែកមនុស្សធម៌ យ៉ាងសកម្ម នៅពេលប្រជាពលរដ្ឋមានបញ្ហាផ្សេងៗ ពិសេសជួបគ្រោះថ្នាក់ចរាចរណ៍តែម្តង លោកតែងតែយករថយន្តផ្ទាល់ខ្លួនរបស់លោកទៅជួយសង្គ្រោះបឋម និងដឹកបញ្ជូនទៅកាន់មន្ទីរពេទ្យ ព្រមទាំងជួយដឹកសាកសពទៅកាន់លំនៅឋានប្រគល់ឲ្យសាច់ញាតិទៀតផង៕
