មន្ដ្រីជាន់ខ្ពស់នៅក្រសួងមហាផ្ទៃម្នាក់ កំពុងប្រើអំណាចចាក់ដីលុបយកចំណីទន្លេរ សាងសង់ជាភូមិគ្រឹះដ៏ស្គឹមស្គៃជារបស់ផ្ទាល់ខ្លួន នៅឃុំកំពង់អូស ស្រុកពញាឮ
ខេត្តកណ្តាល៖ប្រជាពលរដ្ឋជាច្រើនគ្រួសារបានលើឡើងថា មានមន្ដ្រីជាន់ខ្ពស់នៅក្រសួងមហាផ្ទៃម្នាក់ កំពុងប្រើអំណាចចាក់ដីរំលោភយកចំណីទន្លេរយកមកធ្វើជាកម្មសិទ្ធិផ្ទាល់ និងសាងសង់ភូមិគ្រឹះដ៏ស្គឹមស្គៃ និងផ្ទះលំហែរ ដោយពុំមានអាជ្ញាធរ ភូមិ ឃុំ ឬ ស្រុករូបណាហ៊ានមកអើយពើរឡើយ។ ទីតាំងដែលកំពុងធ្វើសកម្មភាពចាក់ដីលុបរំលោភយកចំណីទន្លេស្ថិតត្រង់ចំនុចភូមិបឹងក្តុល ឃុំកំពង់អូស ស្រុកពញាឮ ខេត្ដកណ្ដាល។ ក្រោយពីទទួលបាន ប្រភពព័ត៌មានពីប្រជាពលរដ្ឋដែលរស់នៅក្នុងភូមិឃុំខាងលើ អង្គភាពសារព័ត៌មានយើងបានចុះទៅផ្ដិតយករូបភាព និងវីដេអូជាក់ស្ដែង នៅត្រង់ចំណុចដែលកំពុងធ្វើសកម្មភាពចាក់ដីលុបទន្លេរនោះ ឃើញថា ពិតមានសកម្មភាពចាក់ដីនិងថ្ម ចូលទន្លេជាច្រើនម៉ែត្រដូចជាការលើកឡើងរបស់ប្រជាពលរដ្ឋពិតប្រាកដមែន។
សកម្មភាពការចាក់លុបដី និងថ្ម ចូលក្នុងទន្លេគឺមានប្រវែងប្រហែលជិត ១០០ម៉ែត្រ ដែលផ្ទុយពីច្បាប់នៃការគ្រប់គ្រងច្រាំងទន្លេរ ដែលទុកចន្លោះ ៥០ម៉ែត្រ បែរជាការរំលោភយកសម្បត្ដិរដ្ឋមកធ្វើជាកម្មសិទ្ធិផ្ទាល់ខ្លួន។ បុរសម្នាក់ជាមេការ ដែលមើលការខុសត្រូវជំនួសម្ចាស់ភូមិគ្រឹះខាងលើ កំពុងបញ្ជាគ្រឿងចឱ្យសកម្មភាពឈូសឆាយរុញចាក់ដីនិងថ្មលុបទន្លេ បានប្រាប់សារព័ត៌មានយើងដឹងអោយដឹងថា ដោយសារតែមានការបាក់របងចាស់របស់ពួកគាត់បានបាក់ចូលទន្លេទើបគាត់ចាប់ផ្ដើមរុះរើ និងចាក់ចូលបន្ថែម ដើម្បីទប់កុំឲ្យបាក់ហូរចូលទន្លេ ហើយទីតាំងដីខាងលើនេះជារបស់ឯកឧត្តមម្នាក់ជាមន្ដ្រីជាន់ខ្ពស់ថ្នាក់នាយឧត្ដមសេនីយ៍ ដែលកំពុងបំពេញការងារនៅក្រសួងមហាផ្ទៃ ហើយការចាក់យកចំណីទន្លេរនេះគឺដើម្បីដែលរៀបចំសាងសងធ្វើជាភូមិគ្រឹះ និងផ្ទះលំហែរ។
តើការចាក់ដីនិងថ្មលុបទន្លេរអនុលោមតាមច្បាប់ដែលឬទេ? និងមានច្បាប់ស្នើសុំចាក់លុបទន្លេរចេញពីអាជ្ញាធរមូលដ្ឋានដែលឬទេ? បុរសម្នាក់ជាមេការ បានលើឡើងថា លោកបានរាយការណ៍ទៅអាជ្ញាធរមូលដ្ឋាន និងលោកអភិបាលរងរួចហើយ ទើបគាត់បន្តរធ្វើកាចាក់ដីនិងថ្មនេះ។ ករណីចាក់ដីលុបទន្លេរខាងលើនេះ លោកមេឃុំកំពង់អូស បានប្រាប់ថា គាត់មិនទាន់បានដឹងច្បាស់នោះទេ ហើយលោកនឹងចុះទៅពិនិត្យបន្ថែម ។ រីឯលោកអភិបាលរងស្រុកពញាឮ ហេង គឹមហៀង ទទួលបន្ទុកឃុំកំពង់អុស បានប្រាប់មកសារព័ត៌មានយើងថា សុំចាំបន្តិចខ្ញុំសាកសួរទៅអាជ្ញាធរ និង ម្ចាស់ដីសិន ព្រោះអីខ្ញុំមិនបានក្តាប់ព័ត៌មាននេះច្បាស់ទេ ឥឡូវខ្ញុំជាប់ប្រជុំដោះស្រាយបញ្ហានៅសាលាស្រុក ។
ប្រភពពីប្រជាពលរដ្ឋដែលរស់នៅក្បែរទីតាំងខាងលើនិងម្ចាស់ដែលមានដីនៅជាប់ៗនឹងគ្នាបាន ឲ្យដឹងថា ពេលពួកគាត់ចាក់ដីធ្វើរបង គឺធ្វើតាមអាជ្ញាធរកំណត់ឲ្យត្រឹមណាគឺត្រឹមហ្នឹង គឺមិនអនុញ្ញាតឱ្យធ្វើការចាក់ដីលើសចូលក្នុងទន្លេទេ ប៉ុន្ដែតែជាក់ស្ដែងដីអ្នកធំ គឺអាចចាក់រំលោភហួសរហូតចូលជិតពាក់កណ្ដាលទន្លេ ដោយម្ចាស់ដីលើកឡើងក្រោមហេតុផលថា ដើម្បីទប់ច្រាំង ទើបមិនមានអាជ្ញាធររូបណាមកអើពើនោះទេ។
ប្រជាពលរដ្ឋម្នាក់បានលើកឡើងបន្តថា ការចាក់ដីនៅភូមិឃុំខាងលើនេះសុទ្ធតែជារបស់អ្នកធំ និងអ្នកមានអំណាចគ្រាក់ៗ ដែលអាជ្ញាធរមូលដ្ឋានមិនហ៊ានធ្វើអ្វីនិងប៉ះប៉ាល់ពួកគាត់នោះទេ។ ដែលបណ្ដែតបណ្ដោយចាក់ចូលទន្លេបែបនេះសំរាប់ធ្វើផ្ទះលំហែរបស់ពួកគាត់ទៅវិញ បើជាប្រជាពលរដ្ឋសាមញ្ញ និងមន្ត្រីតូចតាច គឺហ៊ានធ្វើបែបនេះនោះទេ។ ប្រជាពលរដ្ឋដែលប្រកបរបរនេសាទ និងប្រជាពលរដ្ឋរស់នៅជុំវិញទីនោះស្នើសុំទៅកាន់លោកអភិបាលស្រុក លោក ថន សុវណ្ណា និងឯកឧត្តមអភិបាលខេត្ត គង់ សោភ័ណ្ឌ មេត្តាត្រួតពិនិត្យ នឹងចាត់ការឲ្យមានតម្លាភាពសម្រាប់ប្រជាពលរដ្ឋទាំងអស់ដែលរស់នៅទីតាំងភូមិឃុំខាងលើចំពោះការចាក់ដីចូលទន្លេរបស់អ្នកមានលុយ និងមានអំណាច ផងទាន។
ពាក់ព័ន្ធករណីខាងលើនេះអង្គភាពសារព័ត៌មានយើងខ្ញុំបានធ្វើការទំនាក់ទំនងទៅ ឯកឧត្ដម គង់ សោភ័ណ្ឌ អភិបាលនៃគណៈអភិបាលខេត្តកណ្ដាល តាមរយៈលេខទូរស័ព្ទតែតេចូលពុំមានអ្នកទទួលនោះទេ។តែទោះយ៉ាងនេះក្តីអង្គភាពសារព័ត៌មានយើងរង់ចាំការបំភ្លឺពីភាគីពាក់ព័ន្ធ រៀងរាល់ម៉ោងធ្វើការតាមរបបអ្នកសារព័ត៌មាន ៕មានវគ្គបន្ត
