សត្វក្របីមួយក្បាល រត់ចូលទីប្រជុំជនដេញជល់(វ័ធ)ប្រជាពលរដ្ឋ ដែលកំពុងធ្វើដំណើរ បណ្ដាលឲ្យរងរបួសស្រាល ៣នាក់ និងធ្ងន់២នាក់ ដឹកបញ្ជូនទៅសង្គ្រោះនៅឯមន្ទីរពេទ្យបង្អែកប៉ោយប៉ែត
ខេត្តបន្ទាយមានជ័យ៖ ប្រជាពលរដ្ឋជាច្រើននាក់ នៅជុំវិញផ្សារអគ្គៈ និងផ្សារត្រី ក្នុងក្រុងប៉ោយប៉ែត ខេត្តបន្ទាយមានជ័យ មានការភ្ញាក់ផ្អើល និងភ័យស្លន់ស្លោ រត់ចែកជើងគ្នា ដោយសារតែមានសត្វក្របីមួយក្បាលមិនដឹងជាមកពីខាងណានោះទេ បានរត់ចូលក្នុងទីប្រជុំជន ដេញជល់(វ័ធ)ប្រជាពលរដ្ឋ ដែលកំពុងធ្វើដំណើរតាមផ្លូវសាធារណៈ ដូចមានកំហឹងជាមួយអ្នកណាអញ្ចឹង បណ្ដាលឲ្យមនុស្សប្រុសស្រីចំនួន ៣នាក់ រងរបួសស្រាល និងធ្ងន់ ២នាក់ ដឹកបញ្ជូនទៅសង្គ្រោះនៅឯមន្ទីរពេទ្យបង្អែកប៉ោយប៉ែតភ្លាមៗ នៅព្រឹកថ្ងៃទី១២ ខែមិថុនា ឆ្នាំ២០២៣ ។
ក្រោយពីរទទួលបានព័ត៌មាននេះភ្លាមកម្លាំងនគរបាលក្រុងប៉ោយប៉ែត អាជ្ញាធរមូលដ្ឋាន ប្រជាការពារភូមិ រួមនឹងប្រជាពលរដ្ឋជាច្រើននាក់ បានរួមគ្នាតាមចាប់រហូតមកដល់ចំណុចខាងក្រោយសាលាព្រហ្មនិមិត្ត ស្ថិតនៅក្នុងភូមិក្បាលស្ពាន ២ សង្កាត់អូរជ្រៅ ក្រុងប៉ោយប៉ែត សត្វក្របីមួយក្បាលនេះ បានរត់ចូលផ្ទះប្រជាពលរដ្ឋ ក៏ត្រូវចាប់បាននៅវេលាថ្ងៃត្រង់ ។
បើតាមប្រភពប្រជាពលរដ្ឋបានឲ្យដឹងថា នៅមុនពេលកើតហេតុគេបានឃើញសត្វក្របីមួយក្បាលនេះ បានរត់ចេញពីសង្កាត់ផ្សារកណ្ដាល ពោលគឺពីកើតទៅលិច ក៏ស្រាប់តែចូលដេញជល់(វ័ធ)ប្រជាពលរដ្ឋ ដែលកំពុងធ្វើដំណើរទាំងកំរោល នៅក្នុងបរិវេណផ្សារអគ្គៈ និងផ្សារត្រី ក្នុងក្រុងប៉ោយប៉ែត បណ្ដាលឱ្យមានអ្នករងរបួសស្រាល និងធ្ងន់ ព្រមទាំងខូចខាតនូវសម្ភារៈមួយចំនួនទៀតផង។ក្រោយពីចាប់បានសត្វក្របី ដែលបង្កឲ្យមានមនុស្សរងរបួសនិងខូចខាតម៉ូតូ សមត្ថកិច្ចកំពុងធ្វើការស្រាវជ្រាវរកម្ចាស់ ដើម្បីឲ្យចូលខ្លួនមកទទួលខុសត្រូវ។
ជាប់ជាមួយនឹងករណីសត្វក្របីជល់(វ័ធ)មនុស្សនៅទីប្រជុំជននេះដែរ ប្រជាពលរដ្ឋបានស្នើឲ្យអាជ្ញាធរមានចំណាត់ការឲ្យបានតឹងរឹងបំផុតទៅលើម្ចាស់សត្វក្របី ពិសេសសត្វគោតែម្តងដែលកំពុងតែប្រលែងយ៉ាងអាណាធិបតេយ្យនៅទីប្រជុំជន់ ក្នុងក្រុងប៉ោយប៉ែត ពីព្រោះរយៈការកន្លងមកនេះសត្វទាំងនេះតែងតែដើរអុកឡុក ចូលស៊ីដំណាំ និងជល់ឆ្កឹះបំផ្លាញទ្រព្យសម្បត្តិ របស់ពួកគាត់ ពិសេសយប់ព្រលប់ដើរ ដេកនៅលើទ្រូងផ្លូវ និងជុះអាចម៍ពាសវាពាសកាលនៅលើផ្លូវបង្កជាគ្រោះថ្នាក់ចរាចរណ៍ជាយក្សប្រហេតុជារឿយៗផងដែរ ។
ពាក់ព័ន្ធករណីខាងលើនេះដែររយៈការកន្លងមកនេះ អាជ្ញាធរមូលដ្ឋាន បានដើរចាប់ប្រមូលសត្វគោ ក្របី ដែលព្រលែងឱ្យដើរយ៉ាងអាណាធិបតេយ្យនៅទីប្រជុំជន ឱ្យម្ចាស់ចូលខ្លួនមកធ្វើកិច្ចសន្យា ជាច្រើនលើកច្រើនសារមកហើយដែរ រហូតសាលាក្រុងប៉ោយប៉ែតបានចេញលិខិតព្រមានចាត់វិធានការ ចំពោះម្ចាស់សត្វគោ ក្របី ដែលនូវតែបន្តព្រលែងមិនស្ដាប់តាមការណែនាំរបស់អាជ្ញាធរទៀតផង៕
សូមអញ្ជើញទស្សនាវីដេអូរសកម្មភាពសត្វក្របីដេញជល់(វ័ធ) ដែលមានដូចខាងក្រោម៖
