លោកឧត្តមសេនីយ៍ទោ សិទ្ធិ ឡោះ ដឹកនាំកិច្ចប្រជុំផ្សព្វផ្សាយផែនការការពារ សន្តិសុខ សណ្តាប់ធ្នាប់ ជូនឯកឧត្តម នាយឧត្តមសេនីយ៍ ហ៊ុន ម៉ាណែត ដែលអញ្ជើញសំណេះសំណាលជាមួយ សមាជិក សមាជិការ នៅខេត្តបន្ទាយមានជ័យនាពេលខាងមុខ
ខេត្តបន្ទាយមានជ័យ៖នៅរសៀលថ្ងៃទី១៧ ខែមិថុនា ឆ្នាំ២០២៣នេះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដឹកនាំកិច្ចប្រជុំផ្សព្វផ្សាយផែនការការពារ សន្តិសុខ សណ្តាប់ធ្នាប់ ជូនឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ដែលអញ្ជើញជួបសំណេះសំណាលជាមួយ សមាជិក សមាជិការ ក្នុងខេត្តបន្ទាយមានជ័យនាពេលខាងមុខ ។កិច្ចប្រជុំនេះ បានធ្វើឡើងនៅស្នងការដ្ឋាននគរបាលខេត្តបន្ទាយមានជ័យ ដោយបមានការអញ្ជើញចូលរួមពីលោក លោកស្រី ឧត្តមសេនីយ៍ត្រី វរសេនីយ៍ ស្នងការរង លោក នាយ នាយរង ការិយាល័យជំនាញ លោក វរសេនីយ៍ អធិការ នៃអធិការដ្ឋាននគរបាល ក្រុង–ស្រុក ។
លោកឧត្តមសេនីយ៍ត្រី ផាត ផល្លី ស្នងការរង បានឡើងអានផែនការផ្សព្វផ្សាយដល់កម្លាំង និង បែងចែកការងារ គោលដៅ ទទួលខុសត្រូវការពារ លើកិច្ចការ ការពារ សន្តិសុខ សុវត្ថិភាព សណ្តាប់ធ្នាប់នេះ ។
លោកឧត្តមសេនីយ៍ទោ សិទ្ធិ ឡោះ មានប្រសាសន៍ដល់ថ្នាក់ដឹកនាំក៏ដូចជាមន្រ្តីដែលមានឈ្មោះក្នុងបញ្ជីផែនការត្រូវខិតខំប្រឹងប្រែង អនុវត្តន៍ការងារ តួនាទីភារកិច្ច និងការពារសន្តិសុខ សណ្តាប់ធ្នាប់ តាមផែនការដែលបានគ្រោងទុកឲ្យបានល្អ ដើម្បីធានារក្សាបាននូវ សន្តិសុខ សណ្តាប់ធ្នាប់សាធារណៈ សុវត្ថិភាព ជូនថ្នាក់ដឹកនាំជាន់ខ្ពស់ ឱ្យបាន ១០០% ៕
