ឯកឧត្តម នាយឧត្តមសេនីយ៍ ហ៊ុន ម៉ាណែត និងលោកជំទាវ ឧបត្ថម្ភស័ង្កសី ជូនប្រជាពលរដ្ឋរងគ្រោះដោយគ្រោះមហន្តរាយធម្មជាតិផ្សេងៗ
(បន្ទាយមានជ័យ)៖នាថ្ងៃសុក្រ ៥ រោ៦ខែបឋមាសាឍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៧ ខែកក្កដា ឆ្នាំ២០២៣ ស័ង្កសី ចំនួន៧០០០សន្លឹកដែលជាអំណោយដ៏ថ្លៃថ្លារបស់ឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក និងលោកជំទាវ ពេជ ចន្ទមុន្នី ផ្តល់ជូនអង្គភាព កងពលតូចថ្មើរជើង លេខ៥១ សម្រាប់ជួយដល់គ្រួសារយោធិន និងប្រជាពលរដ្ឋ ដែលមានជីវភាពជួបការលំបាក ជាពិសេសប្រជាពលរដ្ឋរងគ្រោះដោយគ្រោះមហន្តរាយធម្មជាតិផ្សេងៗ ដូចជាខ្យល់កន្រ្តាក់ និងទឹកជំនន់។ ល។
អំណោយត្រូវបានក្រុមការងារជំនួយការ ឯកឧត្តម នាយឧត្តមសេនីយ៍ មេបញ្ជាការកងទ័ពជើងគោក ប្រគល់ជូន មេបញ្ជាការ កងពលតូចថ្មើរជើងលេខ៥១ ដើម្បីរក្សាទុក នៅទីបញ្ជាការ កងពល និងបែងចែកមួយចំនួន ជូនតាមអង្គភាពវរសេនាតូច ចំនួន ៣ ឈរជើងនៅជិតបន្ទាត់ព្រំដែនកម្ពុជា–ថៃ ដើម្បីធានាបានការជួយសង្រ្គោះដល់ប្រជាពលរដ្ឋបានទាន់ពេលវេលា តាមសំណូមពររបស់អាជ្ញាធរមូលដ្ឋាន។
លោកឧត្តមសេនីយ៍ត្រី សឹង្ហ ទុំ មេបញ្ជាការ កងពលតូចថ្មើរជើងលេខ៥១ ជំនួសមុខឲ្យ នាយទាហាន នាយទាហានរង និងពលទាហាន នៃអង្គភាព កងពលតូចថ្មើរជើងលេខ៥១ សូមគោរពថ្លែងអំណរគុណយ៉ាងជ្រាលជ្រៅបំផុត ជូនចំពោះ ឯកឧត្តម នាយឧត្តមសេនីយ៍ ហ៊ុន ម៉ាណែត និងលោកជំទាវ ដែលតែងតែយកចិត្តទុកដាក់គិតគូរដល់សុខទុក្ខ ការរស់នៅ របស់យោធិន គ្រួសារយធិន និងបងប្អូនអតីតយុទ្ធជន សំដៅលើកកម្ពស់គុណភាព ការរស់នៅរបស់កងទ័ពឲ្យកាន់តែប្រសើរ ក៏ដូចជាប្រជាពលរដ្ឋជួបការលំបាក និងជួបគ្រោះមហន្តរាយធម្មជាតិផ្សេងៗ៕
