រថយន្តធន់ធំ និងម៉ូតូ បុកគ្នាយ៉ាងពេញទំហឹង បណ្តាលអោយមនុស្ស ២នាក់បានស្លាប់ នៅស្រុកព្រៃនប់
ខេត្តព្រះសីហនុ៖មនុស្សចំនួន ២នាក់បានស្លាប់ក្នុងហេតុការណ៍គ្រោះថ្នាក់ចរាចរណ៍ រវាងរថយន្តធន់ធំ និងម៉ូតូ កាលពីវេលាម៉ោង ២២និង៥០នាទីយប់ថ្ងៃទី១១ ខែកក្កដា ឆ្នាំ២០២៣ លើដងផ្លូវជាតិលេខ៤ ចន្លោះគីឡូម៉ែត្រលេខ ១៧៦–១៧៧ ស្ថិតនៅក្នុងភូមិឃុំជើងគោ ស្រុកព្រៃនប់ ខេត្តព្រះសីហនុ។
ប្រភពព័ត៌មានបានអោយដឹងថា ករណីគ្រោះថ្នាក់ចរាចរណ៍ដែលបានកើតឡើងនេះគឺរវាងរថយន្ដ ១គ្រឿង ម៉ាក FUSO ពាក់ផ្លាកលេខ កំពងស្ពឺ ៣A-៨៩៧២ ស្លាកលេខសណ្ដោងរ៉ឺម៉ក់ ភ្នំពេញ ៤A-៩១៧៥ ទិសដៅពី ភ្នំពេញ ឆ្ពោះទៅខេត្តព្រះសីហនុ នាក់បើកបរមិនស្គាល់អត្តសញ្ញាណ លុះមកដល់ចំណុចខាងលើ បានបុកជាមួយម៉ូតូ ១គ្រឿងម៉ាក HONDA DREAM ពណ៌ខ្មៅ ពាក់ស្លាកលេខ ព្រះសីហនុ ១J-០៦៥៧ ទិសដៅផ្ទុយគ្នា បើកបរដោយឈ្មោះ ទ្រី ប៊ុនធឿន ភេទប្រុស អាយុ៣២ឆ្នាំ មានទីលំនៅភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ និងអ្នករួមដំណើរ ១នាក់ឈ្មោះ យោ គៀក ភេទប្រុស អាយុ២៣ឆ្នាំ មានទីលំនៅភូមិកែវផុស ឃុំកែវផុស ស្រុកស្ទឹងហាវ បានបុកចំពីមុខផ្នែកខាងឆ្វេង បណ្ដាលអោយភាគីខាងម៉ូតូ នាក់រួមដំណើរស្លាប់ភ្លាមៗនៅកន្លែងកើតហេតុ និងអ្នកបើកបរបានស្លាប់ ពេលបញ្ជូនទៅដល់មន្ទីពេទ្យ។
ក្រោយកើតហេតុអ្នកបើកបររថយន្ដបានបើកគេចខ្លួន លុះដល់ជិតរង្វង់មូលស្ទឹងហាវ បានឈប់រថយន្ត រត់គេចខ្លួនបាត់ ។សាកសព ត្រូវបានកម្លាំងអាវុធហត្ថស្រុកព្រៃនប់ ដឹកប្រគល់ជូនសាច់ញាតិយកធ្វើបុណ្យតាមប្រពៃណី៕
