បុរសម្នាក់ជិៈម៉ូតូពេលយប់ភ្លើងសូវភ្លឺ បានបុកសត្វក្របីទាំងហ្វូងដែលកំពុងដើរដេកលើផ្លូវ បណ្តាលរបួសធ្ងន់ ដឹកបញ្ជូនទៅសង្គ្រោះនៅឯមន្ទីរពេទ្យ
ខេត្តបន្ទាយមានជ័យ៖សត្វគោជាច្រើនក្បាលតែងតែដើរអុកឡុកនៅតាមភូមិ ឃុំ សង្កាត់ និងទីប្រជុំជនក្នុងក្រុងប៉ោយប៉ែត ពិសេសដេកនៅលើទ្រូងផ្លូវជាហេតុបង្កជាគ្រោះថ្នាក់ផ្សេងៗដល់ប្រជាពលរដ្ឋជារើយៗ ក្នុងនោះអាជ្ញាធរក្រុង ក៏បានប្រកាសព្រមានចាត់វិធានការតាមផ្លូវច្បាប់ចំពោះម្ចាស់សត្វគោ ដែលប្រលែងយ៉ាងអណាធិបតេយ្យទៀតផង រហូតមកដល់ពេលនេះសត្វគោ ក្របី នូវតែប្រលែងឲ្យដើរដេកនៅតាមទីប្រជុំជន ពិសេសនៅលើទ្រូងផ្លូវសាធារណៈដដែល មិនឃើញអាជ្ញាធរមានចំណាត់ការទល់តែសោះ។ទាំងនេះគេចាត់ទុកថា ការព្រមាននិងបទបញ្ជារបស់អាជ្ញាធរក្រុងសាបដូចទឹកមាត់។
ជាក់ស្តែងដូចជាករណីគ្រោះថ្នាក់ចរាចរណ៍កាលយប់ថ្ងៃទី១៩ ខែកក្តដា ឆ្នាំ២០២៣ នៅមុខស្តង់តាងួន ស្ថិតភូមិប៉ាលិលេយ្យ២ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ គឺបង្កឡើងដោយសត្វគោទាំងហ្វូងដើរដេកលើផ្លូវ ក៏ត្រូវបានបុរសម្នាក់ជិៈម៉ូតូបុក បណ្តាលឲ្យរងរបួសធ្ងន់ ត្រូវបានក្រុមយុវជនសង្គ្រោះបឋម ក្រុងប៉ោយប៉ែត ដឹកនាំដោយលោក នួន នីគីដា ដឹកបញ្ជូនទៅសង្គ្រោះនៅឯមន្ទីពេទ្យបង្អែកក្រុងប៉ោយប៉ែតភ្លាម ដោយសារស្ថានភាពជនរងគ្រោះមានសភាពធ្ងន់ធ្ងរដោយបែកក្បាលហូរឈាម ក្អួតចេញឈាមតាមមាត់ និងត្រចៀក។
ពាក់ព័ន្ធករណីខាងលើនេះមន្ត្រីនគរបាលប៉ុស្តិ៍សង្កាត់ផ្សារកណ្តាលបានប្រាប់ថា៖នៅពេលគ្រោះថ្នាក់ចរាចរណ៍កើតឡើងជនរងគ្រោះបានជិៈម៉ូតូតាមផ្លូវពេលយប់ភ្លើងសូវភ្លឺ បានបុកចូលហ្វូងក្របី ដែលដេកលើផ្លូវប្រមាណជាង១០ក្បាល បណ្តាលដួលរបួសធ្ងន់ ត្រូវបានបញ្ជូនទៅកាន់មន្ទីពេទ្យ។
មន្ត្រីនគរបាលប៉ុស្តិ៍បានបញ្ជាក់ថា៖ក្រោយសត្វក្របីទាំងហ្វូងលេងអាណាធិបតេយ្យដើរដេកលើផ្លូវបង្កឲ្យគ្រោះថ្នាក់ដល់អ្នកដំណើរពេលយប់បណ្តាលគ្រោះថ្នាក់ មន្ត្រីនគរបាលជំនាញបានដេញសត្វក្របីទៅជាយក្រុងហើយកំពុងស្រាវជ្រាវរកម្ចាស់ក្របី បើឃើញសត្វក្របីដើរដេកតាមផ្លូវទាំងហ្វូងកណ្តាលក្រុងប៉ោយប៉ែតបង្កមានគ្រោះថ្នាក់និងប៉ៈពាល់សណ្តាប់ធ្នាប់ និងមានវិធានការចាប់ចងទុក ដើម្បីរកមុខម្ចាស់ចាត់ការតាមច្បាប់៕
