អាជ្ញាធរក្រុងសិរីសោភ័ណ អំពាវនាវឲ្យមានការប្រុងប្រយ័ត្ន ក្រោយពីមានប្រជានេសាទបង់សំណាញ់ជាប់កូនក្រពើបានជាបន្តបន្ទាប់
ខេត្តបន្ទាយមានជ័យ៖អាជ្ញាធរអំពាវនាវដល់អ្នកចុះស្ទឹងសិរីសោភ័ណឲ្យមានប្រុងប្រយ័ត្ន ខណៈប្រជាពលរដ្ឋនៅភូមិថ្មី សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យបានទៅបង់សំណាញ់(បង់ត្រី)ក្នុងស្ទឹងសិរីសោភ័ណ ក៏ជាប់បានសត្វក្រពើមួយក្បាលដែលមានទម្ងន់៤គីឡូក្រាម ហើយមកទល់ថ្ងៃទី៣១ ខែកក្កដា ឆ្នាំ២០២៣ នេះ ក៏សម្រេចលក់ឲ្យគេយកទៅធ្វើម្ហូបក្លែមស្រា ។
អ្នកស្រី ថ្លាង គីវ អាយុ៥៧ឆ្នាំ អ្នកភូមិផ្សេងទៀតដែលប្រកបរបររាវលៀស រាល់ថ្ងៃក្នុងស្ទឹងសិរីសោភ័ណ ប្រាប់អ្នកសារព័ត៌មានថា ខ្លួនមិនដែលព្រួយបារម្ភអ្វីទេឬខ្លាចសត្វក្រពើក្នុងស្ទឹងឡើយព្រោះកង្វល់ជីវភាពវាធំជាង។ហើយពេលកូនប្រុសគាត់ឈ្មោះជឹម លី អាយុ២៩ឆ្នាំ ជាអ្នកបង់សំណាញ់បានបង់ជាប់បានកូនក្រពើនោះ គាត់ក៏មិនភ្ញាក់ផ្អើលប៉ុន្មានដែរ ព្រោះក្នុងស្ទឹងនេះ អ្នកនេសាទតែងបង់សំណាញ់ឬដាក់មងបានកូនក្រពោះជាញយៗដែរ ជួនបាន៦គីឡូក្រាម,៥គីឡូក្រាមនិងតូចជាងនេះ។
ចំណែកប្រជានេសាទឈ្មោះ ជឹម លី អាយុ២៩ឆ្នាំ បានឲ្យដឹងដែរថា: ដូចសព្វមួយដងកាលពីព្រឹកថ្ងៃទី៣០ ខែកក្កដា ខ្លួននិងអ្នកភូមិទៅនេសាទត្រី ដោយខ្លះបបក់ ដាក់សន្ទូចរនងឬបង្កៃ បង់សំណាញ់ រាយមងក្នុងស្ទឹង។តែពេលនោះ មានអ្នកភូមិដែលរាយមងថា ឃើញក្បាលក្រពើតូចល្មមមួយហែបពីទឹក ទើបខ្លួនប្រញាប់យកសំណាញ់ទៅបង់ជាប់ ហើយនាំគ្នាដោះវាយ៉ាងប្រយ័ត្នខ្លាចវារើឬខាំមុត។
ប្រជានេសាទរូបនេះបានបន្តថា ទោះជាឃើញកូនក្រពើនោះ ខ្លួនក៏មិនសូវជាខ្លាចថា មានសត្វក្រពើធំជាម៉ែឪឬបងប្អូនវានៅក្បែរនោះដែរ។មកទល់ល្ងាចថ្ងៃទី៣១ ខែកក្កដា ប្រជានេសាទបានលក់កូនក្រពើទៅអោយអ្នកចង់ធ្វើម្ហូបពីសាច់ក្រពើ ពោលគឺមិនបានយកវាទៅព្រលែងនៅទីអភិរក្សអោយចិញ្ចឹមអីដែរ ។
លោកហួត សារឺ ចៅសង្កាត់ភ្នៀតបានឲ្យដឹងដែរថា ប្រជានេសាទដែលបង់សំណាញ់បានកូនក្រពើនោះ នៅជិតខាងផ្ទះលោក ។ដោយសារប្រជានេសាទឧស្សាហ៍បង់សំណាញ់និងដាក់មងជាប់កូនក្រពើបន្តបន្ទាប់ ទើបនាំអោយមានការសង្ស័យថា ក្នុងស្ទឹងសិរីសោភ៍ណ អាចមានមេនិងឪវា ។ហេតុនេះអាជ្ញាធរមានសមត្ថកិច្ច សំណូមពរនិងព្រមាន សូមបងប្អូនប្រជាពលរដ្ឋនៅក្នុងសង្កាត់និងក្រៅសង្កាត់ដែលប្រើប្រាស់ទឹកឬចុះក្នុងស្ទឹងប្រកបរបរនេសាទ សូមឲ្យមានការប្រុងប្រយ័ត្នផង“ការពារប្រសើរជាងព្យាបាល ” ៕
