ឯកឧត្តម អ៊ុំ រាត្រី និងលោកជំទាវ បាននាំយកទេយ្យវត្ថុ និងទៀនព្រះវស្សា ប្រគេនជូនព្រះសង្ឃគង់ចាំព្រះវស្សាទាំង ២៣ វត្ត ក្នុងស្រុកថ្មពួក
ខេត្តបន្ទាយមានជ័យ៖ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងលោកជំទាវ ជ័យ ណារី អ៊ុំ រាត្រី បាននាំយកទេយ្យវត្ថុ និងទៀនព្រះវស្សា ប្រគេនជូនព្រះសង្ឃគង់ចាំព្រះវស្សាទាំង ២៣ វត្ត ក្នុងស្រុកថ្មពួក នៅវត្តពោធិវាលថ្មពួក ឃុំថ្មពួកស្រុកថ្មពួក នាព្រឹកថ្ងៃអង្គារ ១៥ កើត ខែទុតិយាសាឍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១ ខែសីហា ឆ្នាំ២០២៣។
ពិធីនេះក៏មានការអញ្ជើញចូលរួមពី លោក ឈឿន ក្រៃយ៉ុង អភិបាលរងខេត្ត និងជាអនុប្រធានគណៈកម្មាធិការគណបក្សខេត្ត និងជាប្រធានក្រុមការងារចុះជួយមូលដ្ឋានស្រុកថ្មពួក លោក ព្រឹម សាលី ប្រធានសាខាពន្ធដារខេត្ត លោក លោកស្រីមន្រ្តីរាជការ និងសហការី ព្រមទាំងប្រជាពុទ្ធបរិស័ទយ៉ាងច្រើនកុះករផងដែរ។
ឯកឧត្តម អ៊ុំ រាត្រី បានមានប្រសាសន៍ថា តាំងតែពីដើមរហូតមកដល់បច្ចុប្បន្ន វត្តអារាមបានចូលរួមអភិវឌ្ឍន៍សង្គមកម្ពុជាស្ទើរគ្រប់វិស័យ ដូច្នេះការនាំយកទៀនព្រះវស្សា និង ទេយ្យវត្ថុ គ្រឿងឧបភោគបរិភោគ នាពេលនេះ គឺជាការចូលរួមចំណែកមួយ សម្រាប់ជួយសម្រួលផ្គត់ផ្គង់ទំនុកបម្រុងដល់ព្រះសង្ឃគង់ចាំព្រះវស្សា អស់កាលត្រីមាសដែលមានរយៈពេលបីខែ ។
ឯកឧត្តម អ៊ុំ រាត្រី បានមានប្រសាសន៍ថ្លែងអំណរគុណ ដល់លោកយាយ លោកតា និងប្រជាពលរដ្ឋនៅក្នុងស្រុកថ្មពួក ទាំងអស់ដែលកន្លងមក បានបោះឆ្នោតគាំទ្រគណបក្សប្រជាជនកម្ពុជា ឲ្យទទួលបានជ័យជំនះយ៉ាងភ្លុកទឹកភ្លូកដី សម្រាប់ការបោះឆ្នោតជ្រើសតាំងតំណាងរាស្ត្រនាតិកាលទី ៧ នេះ។ ប្រព្រឹត្តទៅក្នុងបរិយាកាសដ៏ល្អប្រសើរ ដែលបរិយាកាសនយោបាយទូទៅមានស្ថិរភាពនិងភាពស្ងប់ស្ងាត់ល្អ ខណៈដែលស្ថាន ភាពសេដ្ឋកិច្ចជាតិក៏មានសុខភាពល្អ រីឯជីវភាពប្រជាពលរដ្ឋក៏មានលក្ខណៈកាន់តែប្រសើរឡើងៗជាលំដាប់។
សូមបញ្ជាក់ផងដែរថា ទេយ្យវត្ថុ និងទៀនព្រះវស្សា ដែលយកមកប្រគេនដល់ព្រះសង្ឃគង់ចាំព្រះវស្សាទាំង២៣ វត្ត ក្នុង១វត្ត ទទួលបាន អង្ករ ៥០ គីឡូក្រាម ,មី ៥ កេះ ,ទឹកស៊ីអ៊ីវ ៥យួរ,ទឹកត្រី ៥ យួរ, ទឹកបរិសុទ្ធវីតាល់ដបធំ២កេស ស្លាដក់ ២ ធុង ទៀនវស្សាមួយគូ និងថវិកា ៦០ ម៉ឺនរៀល(ថវិកាសរុប ១៣,៨ លានរៀល) យាយជីតាជី និងប្រជាពុទ្ធបរិស័ទជាង ២០០នាក់ ទទួលបានសារុងម្នាក់មួយផងដែរ។ ចុកងបញ្ចប់ នៃកម្មវិធីគណៈអធិបតីបានស្រោចស្រពសុគន្ធវារី និងពិធីរាប់បាត្រដល់ព្រះសង្ឃផងដែរ៕
