ពិធីសម្ភោធដាក់ឱ្យប្រើប្រាស់ជាផ្លូវការ នូវសមិទ្ធផលនានា ក្នុងវត្ត ព្រហ្មសាគរ ហៅវត្តបទត្រង់ រួមជាមួយប្រាង(ចេតិយ) ស្ពានឆ្លងអូរត្រង់មុខវត្ត ផ្លូវក្រាលគ្រួសក្រហម ដែលជាអំណោយរបស់ឯកឧត្តមអោម ចន្ថា ទីប្រឹក្សាក្រសួងមហាផ្ទៃ
ខេត្តបន្ទាយមានជ័យ៖ សមិទ្ធផលនានានៅក្នុងវត្តព្រហ្មសាគរ ហៅវត្តបទត្រង់ដែលស្ថិតក្នុងភូមិបទត្រង់ ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ រួមជាមួយប្រាង(ចេតិយ) ស្ពានឆ្លងអូរត្រង់មុខវត្ត ផ្លូវក្រាលគ្រួសក្រហមឆ្ពោះទៅភូមិបទត្រង់ ដែលជាអំណោយដ៏ថ្លៃថ្លារបស់ឯកឧត្តមអោម ចន្ថា ទីប្រឹក្សាក្រសួងមហាផ្ទៃ ដែលជាចំណងដៃសម្រាប់វត្ថុអនុស្សាវរីយ៍ជូនដល់វត្តព្រហ្មសាគរហៅវត្តបទត្រង់ ដែលនៅទីជនបទដាច់ឆ្ងាយកណ្ដោចកណ្ដែងជាងគេ ត្រូវបានសម្ភោធដាក់ឱ្យប្រើប្រាស់ជាផ្លូវការនាព្រឹកថ្ងៃទី១៤ ខែសីហា ឆ្នាំ២០២៣ ក្រោមអធិបតីភាពឯកឧត្តមអោម ចន្ថា ទីប្រឹក្សាក្រសួងមហាផ្ទៃ លោក លី សុវណ្ណារិទ្ធ អភិបាលរងខេត្តបន្ទាយមានជ័យ តំណាងឯកឧត្តម អ៊ុំ រាត្រី អភិបាលនៃគណៈអភិបាលខេត្ត។
លោក ស៊ុន ង៉ុយ អភិបាលរង ស្រុកព្រះនេត្រព្រះ តំណាងលោក ឃូ ពៅ អភិបាលស្រុក បានមានមតិស្វាគមន៍ និងរាយការណ៍ជូនពីប្រវត្តិសង្ខេបខ្លីៗ ពីរឆ្នាំចុងក្រោយ នៃស្រុកព្រះនេត្រព្រះ បានអភិវឌ្ឍន៍លើផ្នែកហេដ្ឋារចនាសម្ព័ន្ធមានដូចជា ផ្លូវលំ ផ្លូវក្រាលគ្រួស ផ្លូវបេតុង ផ្លូវកៅស៊ូ ប្រឡាយទឹកក្នុងឆ្នាំ២០២២ និងឆ្នំា២០២៣ មានការប្រែប្រួល ប្រសើរឡើង ជាបន្តបន្ទាប់ក្រោមការដឹកនាំដ៏ឆ្លៀសវៃរបស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងមានការចូលរួមសហការទ្រាំទ្រ គ្រប់តួអង្គពាក់ព័ន្ធទាំង ស្ថាប័នរដ្ឋ សប្បុរសជន អង្គការជាដៃគូនានា វិស័យឯកជន ជាពិសេសការឧបត្ថម្ភទ្រាំទ្រ ពីរឯកឧត្តម នាយឧត្តមសេនីយ៍ កែ គឹម យ៉ាន និងលោកជំទាវ បានជួយទ្រាំទ្រអភិវឌ្ឍន៍លើវិស័យ រួមទាំងផ្នែកហេដ្ឋារចនាសម្ព័ន្ធផ្លូវលំ នៅតាមមូលដ្ឋានជាច្រើនខ្សែគួរកត់សម្គាល់ផងដែរ។ចំពោះផ្លូវរងផលប៉ះពាល់ដោយទឹកជំនន់មួយចំនួនធំ ត្រូវបានក្រុមការងារថ្នាក់ជាតិ ថ្នាក់ខេត្ត ថ្នាក់ស្រុក និងថ្នាក់ឃុំ បានជួសជុល ដើម្បីបង្ករភាពងាយស្រួល ដល់ប្រជាពលរដ្ឋ ក្នុងការធ្វើដំណើរ និងដឹកកសិផលផ្សេងៗផងដែរ។
ជាមួយគ្នានោះដែរលោក លី សុវណ្ណារិទ្ធ អភិបាលរង បានថ្លែងអរគុណចំពោះប្រជាពលរដ្ឋក្នុងឃុំប្រាសាទដែលបានជឿទុកចិត្ត និងបោះឆ្នោតជូនគណបក្សប្រជាជនកម្ពុជា ។បន្ទាប់ពីសំណេះសំណាលជាមួយបងប្អូនប្រជាពលរដ្ឋ រួចមកឯកឧត្តម អោម ចន្ថា ទីប្រឹក្សាក្រសួងមហាផ្ទៃ និងលោកជំទាវ បាននាំយកអំណោយសប្បុរសចែកជូនដល់លោកយាយ លោកតា និងពុទ្ធបរិស័ទចំណុះជើងវត្ត ក្នុងវត្តព្រហ្មសាគរ ហៅវត្តបទត្រង់ ជាអនុស្សាវរីយ៍ផងដែរ ៕
