ក្តាមឈូសចំនួន៥០ របស់សមាគមន៍មូលនិធិ កត្តញ្ញូប្រទេសថៃ ត្រូវបានប្រគល់ជូនតាមបណ្តាវត្តអារាមក្នុងស្រុកម៉ាឡៃ តាមរយៈលោកលោកវរសេនីយ៍ ទោ មាស ម៉េងហួង
(បន្ទាយមានជ័យ)៖សមាគមន៍មូលនិធិ កត្តញ្ញូ សាខាខេត្តស្រះកែវ ប្រទេសថៃ បានធ្វើការសហការជាមួយលោកវរសេនីយ៍ ទោ មាស ម៉េងហួង មេបញ្ជាការរង វរសេនាតូចនគរបាលការពារព្រំដែនគោកលេខ៨១៥ នៃស្នងការដ្ឋាននគរបាលខេត្តបន្ទាយមានជ័យ ប្រទេសកម្ពុជា បាននាំយកក្តាមឈូសចំនួន៥០ ប្រគល់ជូនតាមបណ្តាវត្តអារាមមួយចំនួន ក្នុងស្រុកម៉ាឡៃ នៅព្រឹកថ្ងៃទី២០ ខែសីហា ឆ្នាំ២០២៣។
តំណាងសមាគមន៍មូលនិធិ កត្តញ្ញូ បានបង្ហាញអារម្មណ៍រីករាយ ដែលបានរួមចំណែកជួយដល់ប្រជាពលរដ្ឋប្រទេសកម្ពុជា និងបានឲ្យដឹងថា សមាគមន៍ គឺមានសាខា គ្រប់ខេត្ត ក្រុងក្នុងប្រទេសថៃ នឹងតែងតែជួយដល់ប្រជាជនដែលមានជីវភាពខ្វះខាតទាំងក្នុង និងក្រៅប្រទេស។
លោកវរសេនីយ៍ ទោ មាស ម៉េងហួង មេបញ្ជាការរង វរសេនាតូចនគរបាលការពារព្រំដែនគោកលេខ៨១៥ បានធ្វើការថ្លែងអំណរគុណ ដល់សមាគមន៍មូលនិធិ កត្តញ្ញូ សាខាខេត្តស្រះកែវ ប្រទេសថៃ ដែលបានផ្តល់ជំនួយនាពេលនេះ ។ជាពិសេសនេះជាអំណោយសប្បុរធម៌របស់សមាគមន៍ គឺបានបង្ហាញអំពីកិច្ចសហប្រតិបត្តិការ និងទំនាក់ទំនងល្អរវាងប្រជាជនកម្ពុជា និងថៃ ផងដែរ។
លោកបានឲដឹងថា ក្តាមឈូសដែលទទួលបានចំនួន៥០ នេះ លោកនឹងចែកជូនបន្តតាមវត្តអារាមនានា ក្នុងស្រុកម៉ាឡៃ ដើម្បីតម្កល់ទុក សម្រាប់ប្រជាពលរដ្ឋមានជីវភាពខ្វះខាត ដែលបានទទួលមរណភាពដើម្បីរៀបចំពិធីបុណ្យតាមប្រពៃណីឲ្យបានសមរម្យ៕
