នគរបាលក្រុងដូនកែវ ឃាត់ខ្លួនជនសង្ស័យម្នាក់ ពាក់ព័ន្ធករណីហិង្សាដោយចេតនា និងធ្វើឲ្យខូចខាតដោយចេតនា
ខេត្តតាកែវ៖ជនសង្ស័យម្នាក់ ដែលជាប់ពាក់ព័ន្ធករណីហិង្សាដោយចេតនា និងធ្វើឲ្យខូចខាតដោយចេតនា ដែលបានប្រព្រឹត្តកាលពីថ្ងៃសៅរ៍ ទី២៦ ខែសីហា ឆ្នាំ២០២៣ វេលាម៉ោង១៣និង០៩នាទី ត្រូវកម្លាំងនគរបាលក្រុងដូនកែវចាប់ឃាត់ខ្លួន តាមពាក្យបណ្តឹងរបស់ជនរងគ្រោះ ។
សមត្ថកិច្ចបានឲ្យដឹងថា ជនសង្ស័យមានឈ្មោះ ស៊ឹម ពិសាល ភេទប្រុស អាយុ៣០ឆ្នាំ មុខរបរមិនពិតប្រាកដ មានទីលំនៅបច្ចុប្បន្នមិនពិតប្រាកដ បានធ្វើសកម្មភាពយកដុំឥដ្ឋខ្យល់គប់ចូលទៅក្នុងផ្ទះជនរងគ្រោះចំនួន០២គ្រួសារ ដោយជនរងគ្រោះទី០១/ឈ្មោះ ដុម បូរឹទ្ធ ភេទប្រុស អាយុ៤២ឆ្នាំ មុខរបរអាជីវករ មានទីលំនៅភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ ប៉ុន្ដែមិនបណ្តាលឲ្យរងរបួសឡើយ ទី០២/ឈ្មោះ សូ សៀន ភេទស្រី អាយុ៧០ឆ្នាំ មុខរបរនៅផ្ទះ មានទីលំនៅភូមិផ្សារតាកោ សង្កាត់រកាក្នុង ក្រុងដូនកែវ បណ្តាលឲ្យរងរបួសជើងខាងស្ដាំត្រង់ភ្លៅ និងត្រង់ដំបូលផ្ទះធ្លុះ០១កន្លែង។ ក្រោយធ្វើសកម្មភាពភ្លាមៗជនសង្ស័យក៏បានរត់គេចខ្លួន ចំណែកជនរងគ្រោះក៏បានមកដាក់ពាក្យបណ្ដឹងនៅអធិការដ្ឋាននគរបាលក្រុងដូនកែវ។
ក្រោយបានទទួលពាក្យបណ្ដឹងរបស់ជនរងគ្រោះ ដោយអនុវត្តតាមបទបញ្ជាយ៉ាងម៉ឺងម៉ាត់ពីសំណាក់ លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ និងមានការសម្របសម្រួលនីតិវិធីពីសំណាក់ ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ ដឹកនាំបញ្ជាដោយលោកវរសេនីយ៍ឯក ឥន្ទ មណ្ឌល អធិការនគរបាលក្រុងដូនកែវ បានបញ្ជាឲ្យកម្លាំងជំនាញសហការជាមួយកម្លាំងប៉ុស្តិ៍នគរបាលរដ្ឋបាលរកាក្នុង ចុះទៅដល់ទីតាំងកើតហេតុ និងធ្វើការស្រាវជ្រាវ រហូតដល់វេលាម៉ោង១៧និង០០នាទី ថ្ងៃខែឆ្នាំដដែល សមត្ថកិច្ចក៏បានកំណត់មុខសញ្ញាបានរហូតឈានដល់ការឃាត់ខ្លួនជនសង្ស័យបាននៅចំណុចក្នុងវត្តសីហរតនារាម ស្ថិតនៅភូមិឡូរី សង្កាត់រកាក្នុង ក្រុងដូនកែវ យកមកអធិការដ្ឋាននគរបាលក្រុងដូនកែវ ដើម្បីធ្វើការសាកសួរនិងកសាងសំណុំរឿងតាមនីតិវិធីច្បាប់៕ ដោយ ៖ លោក ផូង បញ្ញា
