នគរបាលស្រុកត្រាំកក់ ឃាត់ខ្លួនមុខសញ្ញាចំនួន២នាក់ ដែលធ្វើសកម្មភាពបាញ់ចំពាមកៅស៊ូទៅលើកញ្ចក់រថយន្ត
ខេត្តតាកែវ៖ជនសង្ស័យចំនួន២នាក់មិនស្គាល់អត្តសញ្ញាណ ប្រដាប់ដោយចំពាមកៅស៊ូគ្រាប់ដុំថ្ម បានធ្វើសកម្មភាព បាញ់ទៅលើកញ្ចក់រថយន្តកុងតាន័រ ដែលជារបស់ឈ្មោះ ញឿនសីហា ភេទប្រុសអាយុ ១៨ ឆ្នាំ រស់នៅភូមិឈើទាលជ្រុំ ឃុំក្រាំងលាវ ស្រុកបាទី ខេត្តតាកែវ នៅថ្ងៃទី១១ ខែកញ្ញា ឆ្នាំ២០២៣ វេលាម៉ោង២៤និង ៣០ នាទីរំលងអាធ្រាត្រ នៅចំណុចក្រោមស្ពានអាកាស ផ្សារអង្គតាសោម ស្ថិតនៅភូមិអង្គតាសោម ឃុំអង្គតាសោម ស្រុកត្រាំកក់ ចំកញ្ចក់ពីមុខ ភ្នែកខាងស្ដាំ ចំនួនមួយកន្លែងធ្វើឲ្យបែកប្រេះស្រាំ ត្រូវបានកម្លាំងនគរបាលស្រុកត្រាំកក់ ចាប់ឃាត់ខ្លួន។
បើតាមនគរបាលបានឲ្យដឹងថា ក្រោយទទួលបានបណ្ដឹងផ្ទាល់មាត់ ពីជនរងគ្រោះ នឹងដោយមានបទបញ្ជាពីលោកឧត្តមសេនីយ៍ទោ ស្នងការ និងមានការសម្របសម្រួលពីឯកឧត្តមព្រះរាជអាជ្ញា សាលាដំបូងខេត្ត កម្លាំងជំនាញអធិការដ្ឋាននគរបាលស្រុកត្រាំកក់ សហការជាមួយកម្លាំងប៉ុស្តិ៍នគរបាលរដ្ឋបាលអង្គតាសោមដឹកនាំដោយលោកវរសេនីយ៍ឯក ឌុក ធីយ៉ា អធិការនៃអធិការដ្ឋាននគរបាលស្រុកត្រាំកក់ បានចុះទៅដល់កន្លែងកើតហេតុភ្លាមៗ ធ្វើការស្រាវជ្រាវរហូតឈានដល់ការឃាត់ខ្លួនបានជនសង្ស័យចំនួនពីរនាក់ យកមកសួរនាំ។
ជនសង្ស័យដែលកម្លាំងឃាត់ខ្លួនមានឈ្មោះ យ៉ន អ៊ីវ ភេទប្រុស អាយុ១៨ឆ្នាំ រស់នៅភូមិអង្គតាសោម ឃុំអង្គតាសោម ស្រុកត្រាំកក់ ធ្លាប់ជាប់ពន្ធនាគារក្នុងករណីអំពើលួចនិងឈ្មោះ ញ៉ាញ់ សម្បត្តិ ភេទប្រុស អាយុ១៦ឆ្នាំ រស់នៅភូមិព្រៃស្រោង ឃុំអង្គតាសោម ស្រុកត្រាំកក់ ធ្លាប់ជាប់ពន្ធធនាគារ ក្នុងករណីអំពើលួច (ជាអ្នកយកចំពាមបាញ់កញ្ចក់រថយន្ត )។បច្ចុប្បន្នជនសង្ស័យខាងលើសមត្ថកិច្ចកំពុងសាកសួរ ដើម្បីកសាងសំណុំរឿងចាត់ការតាមនីតិវិធីច្បាប់ ៕ ដោយ ៖ លោក ផូង បញ្ញា
