ស្រវឹងបើករថយន្តព្រុសលឿនដូចព្យុះ បុកផាសអេបពីក្រោយប៉ើងបាសជើង មនុស្សខ្ទាតចេញរងបួសធ្ងន់ រួចបើកគេច២គីឡូម៉ែត្រ ត្រូវម៉ូតូនិងផាសអេបតាមទាន់ចាប់ក្របួចបាន
ខេត្តបន្ទាយមានជ័យ៖បុរសម្នាក់រងរបួសធ្ងន់ ត្រូវបានដឹកបញ្ជូនយកទៅសង្គ្រោះនៅឯមន្ទីរពេទ្យភ្លាមៗ ក្នុងហេតុការណ៍គ្រោះថ្នាក់ចរាចរណ៍ ដែលបង្កឡើងដោយបុរសម្នាក់បើកបររថយន្តម៉ាកព្រុសលឿនដូចព្យុះក្នុងស្ថានភាពស្រវឹង បានបុកផាសអេបពីក្រោយប៉ើងបាសជើង មនុស្សខ្ទាតចេញ នៅតាមបណ្តោយផ្លូវជាតិលេខ៥ មុខផ្លូវចូលខេធីវីស្កាយ ក្នុងភូមិអូរជ្រៅ សង្កាត់អូរជ្រៅ ក្រុងប៉ោយប៉ែត នៅវេលាម៉ោង៤និង២០នាទីទាបភ្លឺ ថ្ងៃទី២២ ខែតុលា ឆ្នាំ២០២៣ រួចបើករថយន្តគេច២គីឡូម៉ែត្រ ត្រូវម៉ូតូនិងផាសអេបតាមទាន់ចាប់ក្របួចបាន។
បើតាមប្រភពព័ត៌មានបានឲ្យដឹងថា នៅមុនពេលកើតហេតុផាសអេប បើកបរដោយបុរសម្នាក់ធ្វើដំណើរពីលិចទៅកើត លុះមកដល់ចំណុចកើតហេតុក៏ស្រាប់តែមានរថយន្តព្រុសពណ៌ស ពាក់ផ្លាកលេខ ភ្នំពេញ2B.8214 បើកបរក្នុងល្បឿនលឿន ស្របទិសគ្នាពីក្រោយ ផាសអេប បានបុកគូថផាសអេបចំហៀងខាងឆ្វេង បណ្តាលឲ្យបុរសម្នាក់ដែលបើកបរផាសអេប ខ្ទាតចេញ កណ្តាលឲ្យរងរបួសធ្ងន់ ផាសអេបក្រឡាប់បាសជើងទៅក្បែរចិញ្ចើមផ្លូវ។
ប្រភពដដែលបានបន្តថា ក្រោយពេលកើតហេតុអ្នកបើកបរបង្កបានព្យាយាមបើករថយន្តគេច តែត្រូវបានម៉ូតូផាសអេបនៅកន្លែងហេតុការណ៍បានតាមដេញស្ទាក់ចាប់ទាន់ដោយសារតែផ្លូវខាងមុខមានការជួសជុលថ្មី ទើបរថយន្តបង្អន់លឿនធ្វើឲ្យពួកគាត់ដេញចាប់ស្ទាក់បានតែម្តង។
ក្រោយពេលកើតហេតុ ភ្លាមៗ ក្រុមយុវជនសង្គ្រោះបឋមក្រុងប៉ោយប៉ែត ដែលដឹកនាំដោយលោក នួន នីគីដា បានយកជនរងគ្រោះទៅសង្គ្រោះនៅមន្ទីរពេទ្យ ចំណែកសមត្ថកិច្ចជំនាញចរាចរណ៍ផ្លូវគោកបានធ្វើការវាស់វែង ឃាត់ខ្លួនជនបង្កដែលជាអ្នកបើកបរ បានបញ្ជាក់ថា តៃកុងរថយន្តបង្កស្រវឹងស្រាជោគជាំ ហើយសមត្ថកិច្ចបាននាំទាំងរថយន្ត ផាសអេប រួមទាំងអ្នកបើកបរ យកទៅអធិការដ្ឋាននគរបាលក្រុងប៉ោយប៉ែត ដើម្បីដោះស្រាយគ្នានៅពេលក្រោយ៕
