សាខាកាកបាទក្រហមខេត្តបន្ទាយមានជ័យ បើកវគ្គផ្សព្វផ្សាយ ស្ដីពីចលនាកាកបាទក្រហមដល់និស្សិត នៃសាកលវិទ្យាល័យ បៀលប្រាយខេត្តបន្ទាយមានជ័យ
ខេត្តបន្ទាយមានជ័យ៖នៅព្រឹកថ្ងៃទី២៤ ខែតុលា ឆ្នាំ២០២៣ មន្ត្រីសាខាកាកបាទក្រហមខេត្តបន្ទាយមានជ័យដែលដឹកនាំដោយលោកជំទាវ ឆាន់ ច័ន្ទសោភា អនុប្រធានគណៈកម្មាធិការសាខាកាកបាទក្រហមខេត្ត បានអញ្ជើញបើកវគ្គផ្សព្វផ្សាយពីចលនាកាកបាទក្រហម ដល់និស្សិត គ្រឹះស្ថានសិក្សានៃសាកលវិទ្យាល័យបៀលប្រាយសាខាខេត្តបន្ទាយមានជ័យ ក្នុងគោលបំណង ដើម្បីបានយល់នូវគោលការណ៍គ្រឹះទាំង ៧របស់កាកបាទក្រហម ដែលដឹកនាំដោយលោកជំទាវ ឆាន់ ច័ន្ទសោភា អនុប្រធានគណៈកម្មាធិការសាខាកាកបាទក្រហមខេត្ត។
លោកជំទាវ ឆាន់ ច័ន្ទសោភា បានមានប្រសាសន៍ថា កាកបាទក្រហមកម្ពុជាគឺជាស្ថាប័នមនុស្សធម៌ធំជាងគេក្នុងព្រះរាជាណាចក្រកម្ពុជា ហើយកាកបាទក្រហមកម្ពុជាដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានគឺប្រកាន់នូវគោលការណ៍គ្រឹះទាំងប្រាំពីររួមមាន ភាពមនុស្សធម៌ ភាពមិនលំអៀង ឯកភាពឯករាជភាព អព្យាក្រឹតភាព និងសេវាកម្មស្ម័គ្រចិត្ត។
លោកជំទាវអនុប្រធានបានបន្តថា ក្នុងស្ថានភាពដែលរាជរដ្ឋាភិបាលកម្ពុជាបើកប្រទេសឡើងវិញលើគ្រប់វិស័យក្រោយជំងឺកូវីដ១៩ ក្នុងស្មារតីដោះស្រាយការលំបាកលើកកម្ពស់ជីវភាពនិងសុខុមាលភាពរបស់ប្រជាពលរដ្ឋងាយរងគ្រោះ កាកបាទក្រហមកម្ពុជាបានបំផុសនូវកម្លាំងមនុស្សធម៌ជាពិសេសសប្បុរសជនគ្រប់មជ្ឈដ្ឋានឲ្យចូលរួមជាមួយសមាគមជាតិ តាមរយៈយុទ្ធនាការរួមគ្នាជាមួយកាកបាទក្រហម ដោះស្រាយបញ្ហាប្រឈមនានា នឹងបន្តពង្រឹងភាពធន់សហគមន៍។
លោកជំទាវបានបន្តថា ពិភពលោកកំពុងស្ថិតនៅក្នុងរបត់នៃការផ្លាស់ប្តូរយ៉ាងស្មុគស្មាញ ប្រឈមដោយបញ្ហាប្រទាក់ក្រឡាគ្នាជម្លោះប្រដាប់អាវុធការប្រែប្រួលអាកាសធាតុបានបង្កឲ្យមានគ្រោះមហន្តរាយកាន់តែញឹកញាប់និងធ្ងន់ធ្ងរជាងមុន ចំពោះមនុស្សសត្វនិងរុក្ខជាតិ ជំងឺឆ្លងពិតមែនតែគេអាចគ្រប់គ្រងបានមួយកម្រិតប៉ុន្តែវីរុសបម្លែងថ្មី និងជំងឺផ្សេងផ្សេងទៀតកំពុងលេចឡើងជាបន្តបន្ទាប់ ទោះបីជាពិភពលោក និងក្នុងតំបន់កំពុងប្រឈមនឹងបញ្ហាជាច្រើនបែបនេះក្ដីក៏ព្រះរាជាណាចក្រកម្ពុជាបន្តស្ថិតនៅក្រោមម្លប់សន្តិភាពស្ថិរភាពនយោបាយនិងការអភិវឌ្ឍលើគ្រប់វិស័យ ធ្វើឱ្យកាកបាទក្រហមកម្ពុជានៅតែបំពេញតួនាទីជាជំនួយការឲ្យអាជ្ញាធរសាធារណៈក្នុងវិស័យមនុស្សធម៌ ចំណែកជាមួយរាជរដ្ឋាភិបាលក្នុងការបន្តលើកកម្ពស់គោលការណ៍គ្រឹះនិងតម្លៃមនុស្សធម៌កែលម្អជីវភាពរស់នៅរបស់ប្រជាជន កាត់បន្ថយភាពងាយរងគ្រោះ និងជួយប្រជាពលរដ្ឋតាមផ្ទះ កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នាមិនទុកឲ្យនរណាម្នាក់ ស្លាប់ដោយអត់អាហារនោះឡើយ។ ចុងក្រោយមន្ត្រីសាខាកាកបាទក្រហមខេត្ត រួមមានលោកស្រី សុខ លាភា និងលោកស្រី មឿត លាភា បានឡើងធ្វើបទបង្ហាញស្ដីពីជីវប្រវត្តិសង្ខេបរបស់កាកបាទក្រហមនិងអឌ្ឍចន្ទក្រហមដល់និស្សិតនៃសាកលវិទ្យាល័យបៀលប្រាយបន្ទាយមានជ័យផងដែរ៕
