ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានចុះចែកអំណោយជូនដល់បងប្អូនប្រជាពលរដ្ឋ រស់នៅទីទួលមានសុវត្ថិភាព
ខេត្តបន្ទាយមានជ័យ៖បងប្អូនប្រជាពលរដ្ឋសរុបចំនួន ១០០ គ្រួសារកំពុងបន្តស្នាក់នៅទីទួលមានសុវត្ថិភាព ដោយសារផ្ទះពួកគាត់លិចលង់ដោយទឹកជំនន់មិនទាន់ស្រកផុត ក្នុងនោះប្រជាពលរដ្ឋមកពី ភូមិព្រៃឫស្សី ភូមិព្រះពន្លា និងភូមិបី សង្កាត់ព្រះពន្លាចំនួន ៣០គ្រួសារ រស់នៅបេនឡានថ្មីក្នុងក្រុងសិរីសោភ័ណ និង៧០ គ្រួសារទៀតស្នាក់នៅទីទួលមានសុវត្ថិភាពក្នុងឃុំបទត្រង់ នាព្រឹកថ្ងៃទី២៧ ខែតុលា ឆ្នាំ២០២៣ ត្រូវបានឯកឧត្តម អ៊ុំ រាត្រី អភិបាលខេត្តបន្ទាយមានជ័យ អមដំណើរដោយ លោក ឃ្លោក នួយ អភិបាលរងខេត្ត បានអញ្ជើញចុះសាកសួរសុខទុក្ខដល់កន្លែងស្នាក់នៅផ្ទាល់ ព្រមទាំងបាននាំយកនូវអំណោយមួយចំនួនមកផ្ដល់ជូន ពួកគាត់កំពុងមានការខ្វះខាតក្នុងជីវភាព។
ឯកឧត្តម អ៊ុំ រាត្រី បានមានប្រសាសន៍ថា រាជរដ្ឋាភិបាលកម្ពុជានាបច្ចុប្បន្ននេះដែលដឹកនាំដោយ សម្ដេច មហាបវរធិបតី ហ៊ុន ម៉ាណែន គឺគិតគូពីសុខទុក្ខរបស់ បងប្អូន ពុកម៉ែជានិច្ច ហើយមិនទុកឱ្យបងប្អូនណាម្នាក់ចោល និងអត់អាហារស្លាប់នោះឡើយ។ ក្នុងនោះផងដែរឯកឧត្តមក៏បានចូលរួមសោកស្ដាយ ចំពោះបងប្អូនដែលទទួលរងគ្រោះ លិចផ្ទះសំបែង ផលដំណាំផ្សេងៗ ហើយសង្ឃឹមថាពេលបងប្អូនពុកម៉ែវិលត្រឡប់ទៅរស់នៅផ្ទះសំបែងវិញនោះ និងបន្តខិតខំធ្វើការរកទទួលទាននិងដាំដំណាំ បន្លែ ចិញ្ចឹមសត្វ ឡើងវិញដើម្បីជួយទ្រទ្រង់សេដ្ឋកិច្ចគ្រួសារ។
ចុងក្រោយឯកឧត្តមក៏បានធ្វើការផ្ដាំផ្ញើដល់បងប្អូនប្រជាពលរដ្ឋទាំងអស់ ពេលវិលត្រឡប់ទៅផ្ទះសំបែងវិញនោះ សូមធ្វើការប្រុងប្រយ័ត្នចំពោះសត្វអាសេរពិស ព្រមទាំងហាមប្រាមដល់កូនចៅ ក្មេងតូចៗ ពួកគាត់តែងតែសប្បាយនិងការលេងទឹក ព្រោះថារយៈកន្លងមកមានមនុស្សស្លាប់ដោយសារលង់ទឹក នៅក្នុងខេត្តបន្ទាយមានជ័យសរុបចំនួន ១១ នាក់ ភាគច្រើនជាក្មេងៗ។
គួរបញ្ជាក់ថា អំណោយដែលបានផ្ដល់ជូនបងប្អូននាឱកាសនេះ ក្នុង១គ្រួសារៗទទួលបាន អង្ក ១៥ គីឡូក្រាម ឃីត ១ថង់ រួមមានគ្រឿង ឧបភោគ បរិភោគ មួយចំនួនផងដែរ៕
