ពិធីបុណ្យពុទ្ធាភិសេកព្រះពុទ្ធបដិមាអង្គធំ ៣ ព្រះអង្គ និងព្រះសីវលី៦ព្រះអង្គ នៅវត្តច័ន្ទសុីសាមគ្គីរតនារាម ស្រុកអូជ្រៅ
ខេត្តបន្ទាយមានជ័យ៖ព្រះពុទ្ធបដិមាអង្គធំចំនួន ៣ព្រះអង្គ និងព្រះស៊ីវលីចំនួន៦ព្រះអង្គ ដែលត្រូវបានចំណាយថវិកាអស់ចំនួន ៧ម៉ឺនដុល្លារសហរដ្ឋអាមេរិក ដែលជាសទ្ធាជ្រះថ្លាពីព្រះសង្ឃសប្បុរសជនពុទ្ធបរិស័ទក្នុងនិងក្រៅប្រទេសរួបរួមសាមគ្គីគ្នាកសាង ជាទីគោរពសក្ការបូជា ស្ថិតនៅក្នុងវត្តច័ន្ទស៊ីសាមគ្គីរតនារាម នៅក្នុងស្រុកអូរជ្រៅ ខេត្តបន្ទាយមានជ័យបានធ្វើពិធីបុណ្យឆ្លងពុទ្ធាភិសេកព្រះអង្គធំ នាព្រឹកថ្ងៃទី១៨ ខែធ្នូ ឆ្នាំ២០២៣ ក្រោមអធិបតីភាពលោកជំទាវឧកញ៉ាអគ្គមហាឧបាសិកាពុទ្ធសាសនូបត្ថម្ភក៍ ម៉ៅ ម៉ាល័យ កែ គឹមយ៉ាន និងលោក លី សុវណ្ណារិទ្ធ អភិបាលរងខេត្តបន្ទាយមានជ័យ។
លោក លី សុវណ្ណារិទ្ធ អភិបាលរងខេត្ត បានសម្តែងនូវការកោតសរសើរដោយស្មោះចំពោះទឹកប្រទ័យទឹកចិត្តជ្រះថ្លារបស់ព្រះតេជគុណ សប្បុរសជនជិតឆ្ងាយ ដែលបានរួបរួមសាមគ្គីផ្ដើមកសាងនូវសមិទ្ធផលនានាក្នុងវត្តនេះឲ្យមានការរីកចម្រើនគួរឲ្យកត់សម្គាល់និងសម្រាប់ប្រជាពុទ្ធបរិស័ទធ្វេីបុណ្យផ្សេងៗ ។
លោកអភិបាលរងខេត្ត បានបន្តថា ជាមួយនឹងការថ្លែងនូវអំណរគុណនិងការកោតសរសើរដោយស្មោះប្រកបដោយក្ដីរីករាយនិងមោទនភាពដ៏ក្រៃលែ ដែលបានឃើញកម្លាំងសាមគ្គីធម៌ដ៏ប្រសើរ រវាងព្រះសង្ឃនិងពុទ្ធសាសនិកតែមានការគាំទ្រយ៉ាងពេញទំហឹងពីរាជរដ្ឋាភិបាលដែលមានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជាប្រមុខដឹកនាំដ៏ឈ្លាសវៃ ដែលបានផ្តល់នូវសិទ្ធិសេរីភាពយ៉ាងទូលំទូលាយដល់បង ប្រជាពលរដ្ឋគ្រប់រូបក្នុងការគោរពប្រតិបត្តិហាងជំនឿសាសនានានានៅក្នុងប្រទេសកម្ពុជាយើង។និងមានសាសនាផ្សេងៗទៀតតាំងនៅជាទីគោរពបូជាដែលសាសនា នីមួយៗសុទ្ធសឹងតែមានការប្រៀនប្រដៅអោយមនុស្សធ្វើជាអំពើកុសល ការគោរពធម៌វិន័យ ក៏មិនខុសពីការគោរពច្បាប់របស់រដ្ឋ និងសំដៅឲ្យមនុស្សស្គាល់អំពើបុណ្យបាបខ្លាច និងស្អប់ខ្ពើមនូវអំពើទុច្ចរិតអបាយមុខផ្សេងៗដែលប្រាសចាកពីសីលធម៌និងវិន័យសាសនាដូចជាផ្ទុយនឹងច្បាប់របស់រដ្ឋដូចគ្នាដែរ។ ម្យ៉ាងវិញទៀតសាសនាទាំងឡាយដែលមាននៅក្នុងប្រទេសកម្ពុជាយើងបច្ចុប្បន្នគឺមានសុខដុមនឹងគ្នាយ៉ាងត្រជាក់ត្រជុំប្រកបដោយសន្តិភាពទាំងផ្លូវកាយនិងផ្លូវចិត្តរូបរួមគ្នាក្នុងគោលដៅតែមួយតែសេចក្ដីសុខក្សេមក្សាន្ត និងចូលរួមអភិវឌ្ឍនៃសង្គមជាតិ៕
