អាវុធហត្ថខេត្តបន្ទាយមានជ័យ បញ្ជូនខ្លួនជនសង្ស័យ៣នាក់ ទៅតុលាការ ពាក់ព័ន្ធករណីលួចម៉ូតូ និងប្រើប្រាស់ដោយខុសច្បាប់នូវសារធាតុញៀន ខណៈម្នាក់ទៀតរត់គេចខ្លួន
(បន្ទាយមានជ័យ )៖កម្លាំងមូលដ្ឋានកងរាជអាវុធហត្ថក្រុងសិរីសោភ័ណ ដឹកនាំដោយលោក វរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុង នៅវេលាម៉ោង០៧និង០០នាទីថ្ងៃទី០៣ ខែមេសា ឆ្នាំ២០២៤ បានធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យចំនួន០៣នាក់ ១–ឈ្មោះ ឡេង សក្កា (ហៅសាក់) ភេទប្រុស អាយុ១៧ឆ្នាំ ជនជាតិខ្មែរ បច្ចុប្បនស្នាក់នៅ ភូមិគោរដ្ឋាន សង្កាត់អូរអំបិល ក្រុងសិរីសោភ័ណ ,២.ឈ្មោះ ហេវ សៀវហូវ (បៀក) ភេទប្រុស អាយុ២០ឆ្នាំ ជនជាតិខ្មែរ ទីលំនៅបច្ចុប្បន្នភូមិក្បាលស្ពាន សង្កាត់ម្នាក់ ក្រុងសិរីសោភ័ណ ,៣.ឈ្មោះ សាំ ពិសិដ្ឋ ភេទប្រុស អាយុ១៦ឆ្នាំ ជនជាតិខ្មែរ ទីលំនៅបច្ចុប្បន្នភូមិខ្លាកូនចាស់ សង្កាត់កំពង់ចាស់ ក្រុងសិរីសោភ័ណ ចំណែបក្ខពួកម្នាក់ទៀតបានរត់គេចខ្លួនបាត់ ពាក់ព័ន្ធករណីលួចម៉ូតូ និងប្រើប្រាស់ដោយខុសច្បាប់នូវសារធាតុញៀន ដែលប្រព្រឹត្តកាលពីវេលាម៉ោង១៣និង៣០នាទី ថ្ងៃទី០២ ខែមេសា ឆ្នាំ២០២៤ នៅចំណុចបន្ទប់ជួល ស្ថិតក្នុងភូមិគោរដ្ឋាន សង្កាត់អូរអំបិល ក្រុងសិរីសោភ័ណ។ ការឃាត់ខ្លួននេះបានធ្វើឡើងតាមពាក្យបណ្តឹងរបស់ជនរងគ្រោះឈ្មោះ ធួន វិសាល ភេទប្រុស អាយុ២៦ឆ្នាំ បច្ចុប្បន្ន ស្នាក់នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ ។
លោក វរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុង បានឱ្យដឹងថា កាលពីវេលាកេីតហេតុជនរងគ្រោះបានជិះម៉ូតូម៉ាកហុងដាឌ្រីម ពណ៌ខ្មៅ ផលិតឆ្នាំ២០២០ ពាក់ផ្លាកលេខ បន្ទាយមានជ័យ 1V-2472 ចំនួន០១គ្រឿង ឌុបប្រពន្ធមកពីផ្សារ និងបានទុកម៉ូតូនៅមុខបន្ទប់ជួលដែលរូបខ្លួនស្នាក់នៅចំណុចខាងលេី រួចហូបបាយជាមួយប្រពន្ធកូន ហេីយសម្រាកលង់លក់ លុះដល់វេលាម៉ោង១៥និង០០នាទី ថ្ងៃដដែល ពេលចេញពីបន្ទប់ស្រាប់តែបាត់ម៉ូតូ និងបានមកដាក់ពាក្យបណ្ដឹងនៅមូលដ្ឋានកងរាជអាវុធក្រុងសិរីសោភ័ណ។ ក្រោយពីទទួលបានពាក្យបណ្ដឹងលោកបានដឹកនាំ កម្លាំងមូលដ្ឋានកងរាជអាវុធហត្ថក្រុង ចុះស្រាវជ្រាវ រហូតកំណត់មុខសញ្ញា និងបានសហការជាមួយកម្លាំងមូលដ្ឋានកងរាជអាវុធហត្ថក្រុងប៉ោយប៉ែត វេលាម៉ោង១៥និង៤០នាទី ថ្ងៃទី០២ ខែមេសា ឃាត់ខ្លួនបានជនសង្ស័យចំនួន៣នាក់ នៅចំណុចភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែតខណៈបក្ខពួកម្នាក់ទៀតបានរត់គេចខ្លួនបាត់ និងបានចាប់យកវត្ថុតាង ១.ម៉ូតូម៉ាកហុងដាឌ្រីម ពណ៌ខ្មៅ ផលិតឆ្នាំ២០២០ ពាក់ផ្លាកលេខ បន្ទាយមានជ័យ 1V-2472 ចំនួន០១គ្រឿង(ប្រគល់ជូនជនរងគ្រោះវិញ),២.ម៉ូតូម៉ាកហុងដាឃ្លិច ពណ៌ខ្មៅ ផលិតឆ្នាំ២០១៩ ពាក់ផ្លាកលេខ បាត់ដំបង 1AH-0240 ចំនួន០១គ្រឿង(មធ្យោបាយប្រព្រឹត្តបទល្មេីស) ហើយនាំមកមូលដ្ឋានកងរាជអាវុធហត្ថក្រុងសិរីសោភ័ណ ព្រមទាំងធ្វើតេស្តទឹកនោម លើជនសង្ស័យទាំង០៣នាក់ ឃើញមានសារធាតុញៀន។ ក្រោយឃាត់ខ្លួន និងសួរចម្លេីយ ជនសង្ស័យ បានឆ្លើយសារ ភាពថា ពួកខ្លួនពិតជាប់ពាក់ព័ន្ធលើករណីលួចម៉ូតូ និងប្រើប្រាស់ដោយខុសច្បាប់នូវសារធាតុញៀន ពិតប្រាកដមែន។ ដោយផ្អែកលេីចម្លេីយសារភាព និងមានវត្ថុតាងជាក់ស្តែង កម្លាំងមូលដ្ឋានកងរាជអាវុធហត្ថក្រុង បានកសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថ ខេត្ត ចាត់ការបន្តតាមនីតិវិធី ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មេីស បានឱ្យដឹងថា បច្ចុប្បន្នជនសង្ស័យ ទាំង៣នាក់ ត្រូវបានបញ្ជូនទៅសាលាដំបូងខេត្តហើយ នៅរសៀលថ្ងៃទី០៤ ខែមេសា ឆ្នាំ២០២៤នេះ ដើម្បីអនុវត្តតាមនីតិវិធី ៕
