ពិធីទទួល និងដង្ហែរ អារាធនាព្រះបរមសារីរិកធាតុ យាងមកពីប្រទេសស្រីលង្កា មកប្រតិស្ឋានក្នុង វត្តឃោសត្ថារាម(ស្រះត្រាច ) សង្កាត់អូរជ្រៅ ក្រុងប៉ោយប៉ែត
ខេត្តបន្ទាយមានជ័យ៖នាចុងសប្តាហ៍នេះនៅច្រកអន្តរជាតិប៉ោយប៉ែត មានរៀបចំពិធីទទួល និងដង្ហែរ អារាធនាព្រះបរមសារីរិកធាតុ យាងមកពីប្រទេសស្រីលង្កា មកប្រតិស្ឋានក្នុង វត្តឃោសត្ថារាម(ស្រះត្រាច ) សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។ ទិដ្ឋភាពនេះជាសក្ខីភាពឆ្លុះបញ្ចាំងយ៉ាងប្រត្យក្ស ចំពោះពុទ្ធបរិស័ទសាសនិក ក្នុងការចូលរួមប្រារព្ធពិធីបុណ្យ ពិសាខបូជា ក្រោមបរិយាកាសសុខដុមរមនាសាសនា មហាសាមគ្គីក្នុងសង្គមជាតិទាំងមូល សំដៅលើកស្ទួយព្រះពុទ្ធសាសនា ឲ្យកាន់តែរីកចម្រើនរុងរឿងតទៅ និងជាពិសេស ក្រោមម្លប់ដ៏ត្រជាក់ក្សេមក្សាន្ត នៃអង្គ សម្ដេច ព្រះបរមនាថ នរោត្តម សីហមុនីព្រះមហាក្សត្រនៃព្រះរាជាណាចក្រកម្ពុជា និងក្រោមការដឹកនាំដ៏ភ្លឺស្វាងរបស់សម្ដេចអគ្គមហាសេនាបតីតេជោហ៊ុនសែនអតី នាយករដ្ឋមន្ត្រី ដែលបច្ចុប្បន្នជាប្រធានព្រឹទ្ធសភាជាតិនៃព្រះរាជាណាចក្រកម្ពុជាដែលជាមគ្គទេសក៏ឯក បាននាំមកនូវ សុខសន្តិភាពនិងឯកភាពជាតិយ៉ាងពេញលេញ។
ជាមួយគ្នានោះ ព្រះសមណញាណ ណាប់ ម៉ឺន ព្រះរាជាគណៈថ្នាក់កិត្តិយស ព្រះបាឡាត់គណខេត្ត បានកោត សរសើរ ចំពោះព្រះមន្ត្រីសង្ឃ ព្រះសង្ឃ អាចារ្យ គណៈ កម្មការ សីលវន្ត សីលវតី អារាមិកជន ដែលបានខិតខំប្រតិបត្តិខ្លួន និងជួយអប់រំដល់ពុទ្ធបរិស័ទ តាមលំអានខ្លឹមសារពុទ្ធ វចនៈ មានព្រះត្រៃបិដកជាគោល ជម្រះនូវសេចក្តីសៅហ្មងទាំងឡាយទាំងពួង តាមគន្លងព្រះធម៌ មានសេចក្តីជ្រះថ្លា ការប្រមូលផ្តុំកម្លាំង ថែរក្សាការពារ សន្តិភាព ស្ថេរភាព សាមគ្គីភាព ជំរុញការកសាងជាតិ ឆ្ពោះទៅរកភាពជុំរឿង រុងរឿង ម្យ៉ាងទៀត សូមអនុវត្តឱ្យបានត្រឹមត្រូវ នូវគោលនយោបាយរបស់រាជរដ្ឋាភិបាល ដែលបានកំណត់ថា ៖ ការគោរពសិទ្ធិ សេរីភាពខាងជំនឿ សាសនា លើកស្ទួយព្រះពុទ្ធសាសនាជាសាសនារបស់រដ្ឋ និងបង្កលក្ខណះសម្បត្តិល្អដល់ សកម្មភាពនៃសាសនាផ្សេងៗទៀត ដោយផ្អែកលើមូលដ្ឋាន ជៀសវាងការរើសអើង ការបែងចែកភាពខុសគ្នាខាង ជំនឿនិងសាសនា។
ក្នុងឱកាសនោះដែរ លោក គាត ហ៊ុល អភិ បាលក្រុង ប៉ោយប៉ែត បានមាន ប្រសាសន៍ថ្លែងអំណរព្រះគុណ និងអរគុណយ៉ាងជ្រាលជ្រៅបំផុត ចំពោះសម្តេច ព្រះ រាជាគណៈ ព្រះមន្ត្រីសង្ឃសាលាគណ សាលា អនុគណគ្រប់លំដាប់ថ្នាក់ ជា ពិសេស ព្រះសោកុណធម្មវង្ស (វសកៈបញ្ញាអក្ខា) ព្រះចៅអធិការវត្តឥន្ទ្រវិហារព្រះអារាមហ្លួង ព្រះគ្រូធម្មធរ ប៊ុន សើម (រតនរង្សី) ព្រះលេខានុការវត្តឥន្ទ្រវិហារព្រះអារាមហ្លួង ព្រះវរធម្មញាណ ពេជ្រ ចាន់សីហា ព្រះចៅអធិការវត្តស្រះត្រាច លោកតាអាចារ្យ គណៈកម្មការវត្ត ដែលបានជួយសម្របសម្រួល និងស្នើសុំ អារាធនា ព្រះបរមសារីរិកធាតុ ពីសម្តេចព្រះសង្ឃរាជប្រទេសស្រីលង្កាយកមកតម្កល់ប្រតិស្ថានទុកនៅក្នុងវត្តឃោសត្ថារាម ស្រះត្រាច សង្កាត់អូរជ្រៅ ក្រុងប៉ោយប៉ែត សម្រាប់ជាប្រយោជន៍ដល់ ទេវតា និងមនុស្សទាំងឡាយធ្វើការគោរព សក្ការៈបូជា ដោយស្មារតីយកចិត្តទុកដាក់ទទួលខុសត្រូវខ្ពស់ និងមានការឯកភាពគ្នា សាមគ្គីគ្នាយ៉ាងល្អប្រសើររហូតមកដល់ថ្ងៃរៀបចំកម្មវិធីនាពេល នេះ។
សូមបញ្ជាក់ថា៖ ពិធីអារាធនា ទទួលព្រះបរមសារីរិក ធាតុ យាងមកពីប្រទេសស្រីលង្កា មកតម្កល់ប្រតិស្ថានក្នុងវត្តឃោសត្ថារាម (ស្រះត្រាច)តាមការប្រោសព្រះរាជប្រទានពីសម្តេចព្រះសង្ឃរាជនិកាយព្រះឧបាលីស្លាមវង្ស និងរដ្ឋាភិបាលប្រទេសស្រីលង្កា ដោយមានការស្នើសុំ ពីព្រះគ្រូចៅអធិការ អាចារ្យ គណៈកម្មការ និងពុទ្ធបរិស័ទចំណុះ ជើងវត្តឃោសត្ថារាមស្រះត្រាច ក្នុងគោលបំណងយកមកតម្កល់ប្រតិស្ថានធ្វើការគោរពសក្ការបូជា សម្រាប់ជា ប្រយោងជន៍ដល់ទេវតា និងមនុស្សទាំងឡាយ។ពិធីនេះដោយមានការ យាង និមន្ត និងអញ្ជើញ ចូលរួម ជា កិត្តិយស ដោយសម្តេច ព្រះរាជាគណៈ ព្រះមេគណ ព្រះអនុគណៈ ព្រះមន្ត្រីសង្ឃ ព្រះចៅអធិការវត្ត ព្រះថេរានុត្ថេរៈ ថ្នាក់ដឹកនាំ មន្ត្រីរាជការ ថ្នាក់ដឹកនាំ ក្រុមយុវជន លោកគ្រូ អ្នកគ្រូ សិស្សានុសិស្ស ព្រមទាំងអាចារ្យ គណៈកម្មការ និងពុទ្ធបរិស័ទ ជិតឆ្ងាយយ៉ាងច្រើនកុះករ៕
